ಹಗಲಲ್ಲೇ ಹೊತ್ತಿಕೊಂಡ ಫ್ಲಡ್‌ಲೈಟ್‌: ಏಕಾಗ್ರತೆ ಕಳೆದುಕೊಂಡ ಜೊಕೋ

Team Udayavani, Jan 21, 2019, 1:05 AM IST

ಮೆಲ್ಬರ್ನ್: ವಿಶ್ವ ನಂ.1 ಟೆನಿಸಿಗ ನೊವಾಕ್‌ ಜೊಕೊವಿಕ್‌ ನೀತಿಸಂಹಿತೆ ಉಲ್ಲಂಘನೆ ಆಪಾದನೆ ಎದುರಿಸಿದ್ದಾರೆ. ಶನಿವಾರದ 3ನೇ ಸುತ್ತಿನ ಪಂದ್ಯದ ವೇಳೆ ಅವರು ಡೆನ್ನಿಸ್‌ ಶಪೊವೊಲೋವ್‌ ವಿರುದ್ಧ ಆಡುತ್ತಿದ್ದರು. 3ನೇ ಸೆಟ್‌ನಲ್ಲಿ 3-0 ಮುನ್ನಡೆಯನ್ನೂ ಸಾಧಿಸಿದ್ದರು. ಸಂಜೆ 5 ಗಂಟೆ ಹೊತ್ತಿಗೆ ಸಾಕಷ್ಟು ಬೆಳಕು ಇದ್ದಾಗಲೇ ಇದ್ದಕ್ಕಿದ್ದಂತೆ ಫ್ಲಡ್‌ಲೈಟ್‌ ಬೆಳಗಿಸಲಾಯಿತು. ಕಣ್ಣು ಕುಕ್ಕಿದ್ದರಿಂದ ದಿಢೀರನೆ ಅವರು ಆಟದ ಮೇಲಿನ ಏಕಾಗ್ರತೆ ಕಳೆದುಕೊಂಡು 3ನೇ ಸೆಟ್‌ ಸೋತರು. ಮುಂದಿನ ಸೆಟ್‌ನಲ್ಲಿ ತಿರುಗಿ ಬಿದ್ದು ಗೆಲುವು ಸಾಧಿಸಿದರು.

ಈ ಹಂತದಲ್ಲಿ ಪ್ರೇಕ್ಷಕನೊಬ್ಬ, “ನೀವು ನರ್ವಸ್‌ ಆಗಿದ್ದೀರಾ?’ ಎಂದು ಅಣಕಿಸಿದ. ಇದರಿಂದ ಸಿಟ್ಟಿಗೆದ್ದ ಜೊಕೋವಿಕ್‌, ಆ ಪ್ರೇಕ್ಷಕನ ವಿರುದ್ಧ ಕಿರುಚಿದರು. ಆಗ ಅಂಪಾಯರ್‌ ಜೊಕೋಗೆ ಎಚ್ಚರಿಕೆ ನೀಡಿದರು. ಸೂರ್ಯನ ಬೆಳಕಿದ್ದಾಗಲೂ ಸಂಘಟಕರು ಫ್ಲಡ್‌ಲೈಟ್‌ ಹಾಕಿದ್ದರ ವಿರುದ್ಧ ಜೊಕೋಗೆ ಅಸಮಾಧಾನವಿದ್ದರೂ, ತಾನು ಕೂಗಿದ್ದು ತಪ್ಪು ಎಂದು ಒಪ್ಪಿಕೊಂಡಿದ್ದಾರೆ.