ಬಸವನಾಡಲ್ಲಿ ಶಾಂತ ರೀತಿ ಮತದಾನ

Team Udayavani, Apr 24, 2019, 1:02 PM IST

ವಿಜಯಪುರ: ರಾಜ್ಯದಲ್ಲಿ ನಡೆಯುತ್ತಿರುವ ಲೋಕಸಭೆಯ ಎರಡನೇ ಹಂತದ 14 ಕ್ಷೇತ್ರಗಳಲ್ಲಿ ಮಂಗಳವಾರ ವಿಜಯಪುರ ಜಿಲ್ಲೆಯಲ್ಲಿ ನಡೆದ ಮತದಾನ ಯಾವುದೇ ಅಹಿತಕರ ಘಟಮನೆಗಳಿಗೆ ಅವಕಾಶ ಇಲ್ಲದಂತೆ ಶಾಂತಿ-ಸುವ್ಯವಸ್ಥೆಯಿಂದ ಮುಕ್ತಾಯ ಕಂಡಿದೆ.

ಜಿಲ್ಲೆಯ ಹಲವು ಮತಗಟ್ಟೆಗಳ‌ ಮತಯಂತ್ರಗಳಲ್ಲಿ ಕಾಣಿಸಿಕೊಂಡ ದೋಷದಿಂದಾಗಿ ಕೆಲ ಕಾಲ ಮತದಾನ ವಿಳಂಬವಾಗಿ ಜರುಗಿದ್ದು ಕಂಡು ಬಂದಿದೆ. ಜಿಲ್ಲೆಯ ಇಂಡಿ ತಾಲೂಕಿನಲ್ಲಿ ಮತದಾನದ ಬಳಿಕ ಓರ್ವ ಮಹಿಳೆ ಹೃದಯಾಘಾತದಿಂದ ಮೃತಪಟ್ಟರೆ, ಮತದಾನಕ್ಕಾಗಿ ಓಮನ್‌ ದೇಶದಲ್ಲಿ ಸೇವೆ ಮಾಡುತ್ತಿರುವ ಉಪನ್ಯಾಸಕರೊಬ್ಬರು ತವರು ವಿಜಯಪುರಕ್ಕೆ ಆಗಮಿಸಿ ತಮ್ಮ ಹಕ್ಕು ಚಲಾಯಿಸಿ ಗಮನ ಸೆಳೆದರು. ಹೊಸ ಯುವ ಮತದಾರರಂತೆ ವಯೋವೃದ್ಧ್ದರು ಹಾಗೂ ಅಂಗವಿಕಲರು ಕೂಡ ಪ್ರಜಾಪ್ರಭುತ್ವ ರಕ್ಷಣೆಗಾಗಿ ತಮ್ಮ ಮತದಾನದ ಹಕ್ಕು ಚಲಾಯಿಸಲು ಬದ್ಧತೆ ತೋರಿದ್ದು ವಿಶೇಷ ಎನಿಸಿತ್ತು.

ಮತದಾನ ಆರಂಭಗೊಂಡ ಕೆಲ ಸಮಯದ ಬಳಿಕ ತುರುಸು ಗೊಂಡರೂ ಮಧ್ಯಾಹ್ನದ ವೇಳೆಗೆ ಬಿಸಿಲಿನ ತಾಪಕ್ಕೆ ಅಲ್ಲಲ್ಲಿ ಮತ್ತೆ ಮಂದಗತಿಯಲ್ಲಿ ಮತದಾನ ನಡೆಯಿತು. ಸಂಜೆ ವೇಳೆಗೆ ಮತ್ತೆ ಚುರುಕುಗೊಂಡಿತು. ಬೆಳಗ್ಗೆ 11ಕ್ಕೆ ಶೇ. 18.99ರಷ್ಟಿದ್ದ ಮತದಾನ ಪ್ರಮಾಣ 1 ಗಂಟೆಗೆ ಶೇ. 38.09.14ರಷ್ಟಾಗಿತ್ತು. 3 ಗಂಟೆಗೆ ಶೇ. 43.83ರಷ್ಟಿದ್ದ ಮತದಾನ ಪ್ರಮಾಣ ಮತದಾನ ಮುಕ್ತಾಯದ ಹಂತದಲ್ಲಿ ಶೇ. 60.28 ಮತದಾನವಾಗಿದೆ.

ವಿಜಯಪುರ ಜಿಲ್ಲೆಯ ಇಂಡಿ ತಾಲೂಕಿನ ಐರಸಂಗ ಗ್ರಾಮದ ಮತಟ್ಟೆ ಸಂಖ್ಯೆ 32ರಲ್ಲಿ ಮತದಾನ ಮಾಡಿ ಮತಕೇಂದ್ರದಿಂದ ಹೊರಬಂದ ಮಹಾದೇವಿ ಸಿಂದಖೇಡ್‌(55) ಎಂಬ ಮಹಿಳೆ ಹೃದಯಾಘಾತವಾಗಿ ಸಾವಿಗೀಡಾಗಿದ್ದಾರೆ. ಮತದಾನದ ಬಳಿಕ ಹೊರಬರುತ್ತಲೇ ಕುಸಿದು ಬಿದ್ದ ಅವರನ್ನು ತಕ್ಷಣವೇ ಟಂಟಂ ವಾಹನದಲ್ಲಿ ಆಸ್ಪತ್ರೆಗೆ ದಾಖಲಿಸಿದರೂ ಮಹಿಳೆ ಬದುಕುಳಿಯಲಿಲ್ಲ. ಈ ಘಟನೆಯಿಂದ ಮ್ರತರ ಕುಟುಂಬ ಸದಸ್ಯರ ದುಃಖದ ಕಟ್ಟೆ ಒಡೆದಿತ್ತು.

ಓಮನ್‌ ದೇಶದಲ್ಲಿ ತಾಂತ್ರಿಕ ಕಾಲೇಜಿನಲ್ಲಿ ಉಪನ್ಯಾಸಕರಾಗಿರುವ ಸಂಗಮೇಶ ಏಳಗಿ ಅವರು ಮತದಾನಕ್ಕಾಗಿ ತವರಿಗೆ ಆಗಮಿಸಿ ತಮ್ಮ ಹಕ್ಕು ಚಲಾಯಿಸಿದ್ದಾರೆ. ಓಮನ್‌ನಿಂದ ಮುಂಬ್ಯೆಗೆ ವಿಮಾನದಲ್ಲಿ ಆಗಮಿಸಿ ನಂತರ ರಸ್ತೆ ಮಾರ್ಗವಾಗಿ ವಿಜಯಪುರಕ್ಕೆ ಆಗಮಿಸಿದ ಸಂಗಮೇಶ ಏಳಗಿ, ನಗರದ ಕೆಎಚ್ಬಿ ಕಾಲೋನಿಯಲ್ಲಿರುವ ಮತಟಗಟ್ಟೆ ಸಂಖ್ಯೆ 15ರಲ್ಲಿ ತಮ್ಮ ಹಕ್ಕು ಚಲಾಯಿಸಿದರು.

ಮತಯಂತ್ರಗಳಲ್ಲಿ ದೋಷ ಕಾಣಿಸಿಕೊಂಡ ಕಾರಣ ಇಂಡಿ ಪಟ್ಟಣದ ಮತಗಟ್ಟೆ ಸಂಖ್ಯೆ 261, ಆಲಮೇಲದ ತಾರಾಪುರ ಮತಗಟ್ಟೆ ಸಂಖ್ಯೆ 16, ನಿಡಗುಂದಿ ಪಟ್ಟಣದ ಮತಗಟ್ಟೆ ಸಂಖ್ಯೆ 211 ರಲ್ಲಿ ಮತಯಂತ್ರದ ದೋಷದ ಪರಿಣಾಮ ಸುಮಾರು 1 ಗಂಟೆ ಮತದಾನ ವಿಳಂಬವಾಗಿ ಆರಂಭಗೊಂಡ ಬಗ್ಗೆ ವರದಿಗಳಿವೆ.

ಇಂಥ ಸಣ್ಣಪಪುಟ್ಟ ಸಂಗತಿಗಳ ಹೊರತಾಗಿ ಜಿಲ್ಲೆಯಲ್ಲಿ ಎಲ್ಲಿಯೂ ಯಾವುದೇ ರೀತಿಯ ಅಹಿತಕರ ಘಟನೆಗಳು ಜರುಗದೇ ಜಿಲ್ಲೆಯಾದ್ಯಂತ ಶಾಂತಿ-ಸುವ್ಯವಸ್ಥೆಯಿಂದ ಸುಗಮ ಮತದಾನ ನಡೆದಿದೆ.