ಭರಾಟೆಯ ಕ್ಲೈಮ್ಯಾಕ್ಸ್ ಬಜೆಟ್ ಲೆಕ್ಕ ಕೇಳಿದರೆ ಕಂಗಾಲಾಗುತ್ತೀರಿ!
Team Udayavani, Oct 16, 2019, 5:28 PM IST
ನಿರ್ದೇಶಕರ ಕನಸನ್ನು ತನ್ನದೇ ಅಂದುಕೊಳ್ಳುವ, ವ್ಯವಹಾರವನ್ನು ಮೀರಿದ ಕಲಾ ಪ್ರೇಮ ಹೊಂದಿರೋ ನಿರ್ಮಾಪಕರ ಸಂಖ್ಯೆ ಕಡಿಮೆಯಿದೆ. ಆದರೆ ಅಂಥವರು ಸಿಕ್ಕು ಒಂದು ಸಿನಿಮಾ ನಿರ್ಮಾಣಗೊಂಡಿತೆಂದರೆ ಅದು ಎಲ್ಲ ಕೋನದಿಂದಲೂ ವಿಶೇಷವಾಗಿಯೇ ಇರುತ್ತೆ. ಸದ್ಯ ಇದೇ ವಾರ ಬಿಡುಗಡೆಯಾಗಲಿರೋ ಭರಾಟೆ ಚಿತ್ರವನ್ನು ನಿರ್ಮಾಣ ಮಾಡಿರುವ ಸುಪ್ರೀತ್ ಕೂಡಾ ಅಂಥಾದ್ದೇ ಮನಸ್ಥಿತಿ ಹೊಂದಿರುವವರು. ಈ ಕಾರಣದಿಂದಲೇ ಅವರು ಪ್ರತಿಯೊಂದು ಪ್ರೇಮಿನಲ್ಲಿಯೂ ಅದ್ದೂರಿಯಾಗಿ ಕಾಣುವಂತೆ ಭರಾಟೆಯನ್ನು ರೂಪಿಸಿದ್ದಾರೆ.
ಯಾವ ಚಿತ್ರವೇ ಆದರೂ ಕ್ಲೈಮ್ಯಾಕ್ಸ್ ಇಡೀ ಚಿತ್ರದ ಸಾರ್ಥಕತೆಯನ್ನು ನಿರೂಪಿಸುತ್ತದೆ. ಒಂದಿಡೀ ಚಿತ್ರ ಪರಿಣಾಮಕಾರಿಯಾಗೋದೇ ಅಲ್ಲಿ. ಇದನ್ನು ಮನಗಂಡೇ ಆರಂಭದಿಂದಲೂ ಚಿತ್ರತಂಡ ಅದ್ದೂರಿ ಕ್ಲೈಮ್ಯಾಕ್ಸಿಗೆ ಪ್ಲಾನು ಮಾಡಿಕೊಂಡಿತ್ತು. ಆದರೆ ಅದನ್ನು ಹಾಗೆಯೇ ಸಾಕಾರಗೊಳಿಸೋದಕ್ಕೆ ಬೇಕಾಗಿದ್ದದ್ದು ಯಾವ ನಿರ್ಮಾಪಕರಾದರೂ ಹಿಂದೆ ಮುಂದೆ ಆಲೋಚಿಸುವಂಥಾ ದೊಡ್ಡ ಮೊತ್ತ. ನಿರ್ದೇಶಕ ಚೇತನ್ ಕುಮಾರ್ ಅದಕ್ಕಾಗಿ ಮಾಡಿಕೊಂಡಿದ್ದ ತಯಾರಿಯನ್ನು ಮೆಚ್ಚಿಕೊಂಡೇ ಸುಪ್ರೀತ್ ಅದಕ್ಕೆ ಒಪ್ಪಿಕೊಂಡಿದ್ದರು.
ಅಂದಹಾಗೆ ಈ ಕ್ಲೈಮ್ಯಾಕ್ಸಿಗಾಗಿ ಕೇವಲ ಸೆಟ್ಗಾಗಿ ಮಾತ್ರವೇ ಸುಪ್ರೀತ್ ಹೂಡಿರೋ ಬಂಡವಾಳ ಎಂಥವರೂ ಅಚ್ಚರಿಗೊಳ್ಳುವಂತಿದೆ. ಯಾಕೆಂದರೆ ಬರೀ ಸೆಟ್ ಹಾಕೋದಕ್ಕೆ ಖರ್ಚಾಗಿರೋದು ಭರ್ತಿ ಅರವತ್ತು ಲಕ್ಷ ರೂಪಾಯಿ. ಅದುವೇ ಭರಾಟೆಯ ಅದ್ದೂರಿತನಕ್ಕೆ ಹಿಡಿದ ಕನ್ನಡಿಯಂತಿದೆ. ಚೇತನ್ ಕುಮಾರ್ ಅವರೊಂದಿಗೆ ಸುಪ್ರೀತ್ರದ್ದು ಹಲವಾರು ವರ್ಷಗಳ ಸ್ನೇಹ . ಅದರಿಂದಾಗಿಯೇ ಅವರು ಈ ಸಿನಿಮಾಗೆ ಬಂಡವಾಳ ಹೂಡಿದ್ದಾರೆ. ಭರಾಟೆಯ ಕಥೆಯ ಬಗ್ಗೆ, ಒಟ್ಟಾರೆ ಚಿತ್ರ ಮೂಡಿ ಬಂದಿರೋ ರೀತಿಯ ಬಗ್ಗೆಯೂ ಸುಪ್ರೀತ್ ಖುಷಿ ಹೊಂದಿದ್ದಾರೆ. ಇದೆಲ್ಲವೂ ಈ ವಾರ ಅಂದರೆ ಹದಿನೆಂಟನೇ ತಾರೀಕಿನಂದು ನಿಮ್ಮೆದುರು ಅನಾವರಣಗೊಳ್ಳಲಿವೆ.