ದೇಶದ 523 ಟೋಲ್‌ಗ‌ಳ ಶೇ.25ರಷ್ಟು ಲೇನ್‌ಗಳಲ್ಲಿ ನಗದು, ಫಾಸ್ಟಾಗ್‌ ಪಾವತಿ

Team Udayavani, Dec 17, 2019, 5:50 PM IST

ಹೊಸದಿಲ್ಲಿ: ಫಾಸ್ಟಾಗ್‌ ಕಡ್ಡಾಯದ ದಿನಾಂಕ ವಿಸ್ತರಣೆಯಾಗಿದ್ದರೂ, ಸುಗಮ ಸಂಚಾರಕ್ಕೆ ಅನುಕೂಲ ಕಲ್ಪಿಸುವ ಉದ್ದೇಶದಿಂದ ದೇಶದ 523 ಪ್ರಮುಖ ಟೋಲ್‌ಗ‌ಳಲ್ಲಿ ಶೇ.25ರಷ್ಟು ಲೇನ್‌ಗಳಲ್ಲಿ ನಗದು ಮತ್ತು ಫಾಸ್ಟಾಗ್‌ ಎರಡರ ಸ್ವೀಕೃತಿಗೂ ಅವಕಾಶ ಕಲ್ಪಿಸಲಾಗುವುದು ಎಂದು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಹೇಳಿದೆ.

ಫಾಸ್ಟಾಗ್‌ಗೆ ಹೆದ್ದಾರಿ ಪ್ರಾಧಿಕಾರ ಗಡುವು ನೀಡಿದ ಬೆನ್ನಲ್ಲೇ ಎಲ್ಲ ಟೋಲ್‌ಗ‌ಳಲ್ಲಿ ವ್ಯಾಪಕ ದಟ್ಟನೆ ಕಂಡು ಬಂದಿದೆ. ಫಾಸ್ಟಾಗ್‌ ಇಲ್ಲದಿರುವ ವಾಹನಗಳ ಸಂಖ್ಯೆಗಳೇ ಹೆಚ್ಚಿದ್ದು, ದಟ್ಟನೆಗೆ ಕಾರಣವಾಗಿದೆ.

ಆದ್ದರಿಂದ ಫಾಸ್ಟಾಗ್‌ ಉತ್ತೇಜನಕ್ಕೆ ಮತ್ತು ಸಂಚಾರ ಸುಲಭವಾಗಲು ಶೇ.75 ಫಾಸ್ಟಾಗ್‌ ಲೇನ್‌ಗಳು ಮತ್ತು ಶೇ.25ರಷ್ಟು ಫಾಸ್ಟಾಗ್‌ ಮತ್ತು ನಗದು ಸ್ವೀಕೃತಿ ಲೇನ್‌ಗಳು ಎಂದು ಇಡಲಾಗುವುದು. ಇದರಿಂದ ಪ್ರಯಾಣಿಕರಿಗೂ ಅನುಕೂಲವಾಗಲಿದೆ. ಇದೇ ವೇಳೆ ಸುಗಮ ಸಂಚಾರಕ್ಕೆ, ಗಲಾಟೆ, ಚರ್ಚೆಗಳನ್ನು ತಪ್ಪಿಸಲು ಎಲ್ಲ ಟೋಲ್‌ಗ‌ಳಲ್ಲಿ ಮಾರ್ಷಲ್‌ಗ‌ಳನ್ನು ಇಡಲಾಗುವುದು ಎಂದು ಇಲಾಖೆ ಹೇಳಿದೆ.