ಸಂವಿಧಾನ ತಿದ್ದುಪಡಿಗೆ ಪುಟಿನ್‌ ಇಂಗಿತ! ರಷ್ಯಾ ಪಿಎಂ ರಾಜೀನಾಮೆ

Team Udayavani, Jan 15, 2020, 10:14 PM IST

ಮಾಸ್ಕೊ: ದೇಶದ ಸಂವಿಧಾನದಲ್ಲಿ ಆಮೂಲಾಗ್ರ ಬದಲಾವಣೆ ತರಲು ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್‌ ನಿರ್ಧರಿಸಿದ್ದಾರೆ. ಅದಕ್ಕೆ ಪೂರಕವಾಗಿ ಪ್ರಧಾನಿ ಡಿಮಿಟ್ರಿ ಮಡ್ವಡೇವ್‌ ರಾಜೀನಾಮೆ ನೀಡಿದ್ದು, ಅದನ್ನು ಅಂಗೀಕರಿಸಲಾಗಿದೆ. ಅವರಿಗೆ ಈಗ ಅಧ್ಯಕ್ಷರ ಭದ್ರತಾ ಸಮಿತಿಯ ಉಪ ಮುಖ್ಯಸ್ಥ ಹುದ್ದೆಯ ಹೊಣೆ ನೀಡಲಾಗಿದೆ.

ಇದೇ ವೇಳೆ, ಸರ್ಕಾರಿ ವಾಹಿನಿ ಮೂಲಕ ದೇಶವನ್ನುದ್ದೇಶಿಸಿ ಮಾತನಾಡಿದ ಪುಟಿನ್‌ ಹೊಸ ತಿದ್ದುಪಡಿ ಮೂಲಕ ಸಂಸದರು ಪ್ರಧಾನಿಯನ್ನು ಮತ್ತು ಸಂಪುಟ ಸದಸ್ಯರನ್ನು ಆಯ್ಕೆ ಮಾಡುವ ಅಧಿಕಾರ ಹೊಂದಿರುತ್ತಾರೆ.

ಇದರಿಂದ ಆಡಳಿತ ಮತ್ತು ಅಧಿಕಾರದಲ್ಲಿ ಸಂಸತ್ತಿನ ಪಾತ್ರ ಮಹತ್ವ ಪಡೆಯಲಿದೆ ಎಂದು ಹೇಳಿದ್ದಾರೆ. ಪುಟಿನ್‌ ಅವರ ಹಾಲಿ ಅಧಿಕಾರದ ಅವಧಿ 2024ಕ್ಕೆ ಮುಕ್ತಾಯವಾಗಲಿದೆ. ಹೀಗಾಗಿ, ಅವರ ಮುಂದಿನ ರಾಜಕೀಯ ನಡೆಯ ಬಗ್ಗೆ ಈಗಲೇ ಚರ್ಚೆಗಳು ಶುರುವಾಗಿವೆ.

ಹಾಲಿ ನಿರ್ಧಾರ ಪ್ರಕಟಗೊಂಡಿರುವ ಹಿನ್ನೆಯಲ್ಲಿ ಪುಟಿನ್‌ ತಮ್ಮ ಅಧ್ಯಕ್ಷೀಯ ಅವಧಿ ಮುಗಿದ ಬಳಿಕವೂ ರಷ್ಯಾದ ಆಡಳಿತ ಚುಕ್ಕಾಣಿಯನ್ನು ತಮ್ಮ ಕೈಯಲ್ಲೇ ಹಿಡಿದಿಟ್ಟುಕೊಳ್ಳಲು ಸಂವಿಧಾನಿಕ ತಿದ್ದುಪಡಿ ತರಲು ಹೊರಟಿದ್ದಾರೆ ಎಂಬ ಟೀಕೆ ರಷ್ಯಾದಲ್ಲಿ ವ್ಯಕ್ತವಾಗಿದೆ. ಪ್ರಮುಖ ಪ್ರತಿಪಕ್ಷ ನಾಯಕ ಅಲೆಕ್ಸಿ ನವಾನ್ಲಿ ಟ್ವೀಟ್‌ ಮಾಡಿ ಅಧಿಕಾರದಲ್ಲಿ ಮುಂದುವರಿಯಬೇಕು ಎಂಬ ಇರಾದೆಯನ್ನು ಪರೋಕ್ಷವಾಗಿ ವ್ಯಕ್ತಪಡಿಸಿದಂತಾಗಿದೆ ಎಂದಿದ್ದಾರೆ.