ಬಜೆಟ್ ಕಿರು ವಿಮರ್ಶೆ; ಕ್ರೀಡಾ ಕ್ಷೇತ್ರಕ್ಕೆ ಒಲಿಂಪಿಕ್ಸ್‌ ವರ್ಷದಲ್ಲಿ ನಿರಾಶಾದಾಯಕ ಬಜೆಟ್‌

Team Udayavani, Feb 1, 2020, 4:22 PM IST

ಹೊಸದಿಲ್ಲಿ: ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತರಾಮನ್ ಶನಿವಾರ ಮಂಡಿಸಿದ ಕೇಂದ್ರ ಬಜೆಟ್‌ನಲ್ಲಿ ಕ್ರೀಡೆಗೆ ವಿಶೇಷ ಪ್ರೋತ್ಸಾಹವೇನೂ ಲಭಿಸಿಲ್ಲ. ಒಟ್ಟು 2826.92 ಕೋ.ರೂ.ಗಳ ಅನುದಾನ ನೀಡಲಾಗಿದೆ. ಇದು ಕಳೆದ ಆರ್ಥಿಕ ವರ್ಷಕ್ಕೆ ಹೋಲಿಸಿದರೆ ಕ್ರೀಡೆಗೆ ಲಭಿಸಿದ 50 ಕೋ.ರೂ. ಹೆಚ್ಚುವರಿ ಅನುದಾನವಾದರೂ ಟೋಕಿಯೊ ಒಲಿಂಪಿಕ್ಸ್‌ ಹಾಗೂ ಇನ್ನಿತರ ಪ್ರಮುಖ ಕ್ರೀಡಾ ವರ್ಷದಲ್ಲಿ ಈ ಅನುದಾನ ಕಡಿಮೆಯೇ ಆಗಿದೆ.

ಬಜೆಟ್‌ನಲ್ಲಿ “ಖೇಲೋ ಇಂಡಿಯಾ’ಕ್ಕೆ ಹೆಚ್ಚಿನ ಉತ್ತೇಜನ ನೀಡಲಾಗಿದೆ. ಇಲ್ಲಿ ಕಳೆದ ಸಲಕ್ಕಿಂತ 291.42 ಕೋ.ರೂ. ಹೆಚ್ಚಳ ಮಾಡಲಾಗಿದೆ. “ಖೇಲೋ ಇಂಡಿಯಾ’ ದೇಶದ ಯುವ ಕ್ರೀಡಾಪಟುಗಳನ್ನು ಗುರುತಿಸಿ ಅವರನ್ನು ಅಂತಾರಾಷ್ಟ್ರೀಯ ಮಟ್ಟಕ್ಕೆ ಸಜ್ಜುಗೊಳಿಸುವ ಕೇಂದ್ರ ಸರಕಾರದ ಕಾರ್ಯಕ್ರಮವಾಗಿದೆ. ಮುಂದೆ ಇಲ್ಲಿನ ಸಾಧಕರು ಒಲಿಂಪಿಕ್ಸ್‌ ಮಟ್ಟದ ತನಕ ಗುರುತಿಸಲ್ಪಡುತ್ತಾರೆ. ಆದರೆ ಒಲಿಂಪಿಕ್ಸ್‌ ಹಾಗೂ ಇನ್ನಿತರ ಅಂತಾರಾಷ್ಟ್ರೀಯ ಮಟ್ಟದ ಸಾಧಕರಿಗೆ ನೀಡಲಾಗುವ ಪ್ರೋತ್ಸಾಹಧನದಲ್ಲಿ ಇಳಿಕೆಯಾಗಿದೆ. ಇದು 111 ಕೋ.ರೂ.ನಿಂದ 70 ಕೋ.ರೂ.ಗೆ ಕುಸಿದಿದೆ.

 ಸಾಯ್‌ ಅನುಧಾನಕ್ಕೂ ಕತ್ತರಿ
ಸ್ಪೋರ್ಟ್ಸ್ ಅಥಾರಿಟಿ ಆಫ್ ಇಂಡಿಯಾಗೆ (ಸಾಯ್‌) ನೀಡಲಾಗುವ ಪ್ರೋತ್ಸಾಹಧನಕ್ಕೂ ಕತ್ತರಿ ಪ್ರಯೋಗವಾಗಿದೆ. ಇಲ್ಲಿನ ಮೊತ್ತ 615 ಕೋ.ರೂ.ನಿಂದ 500 ಕೋ.ರೂ.ಗೆ ಇಳಿದಿದೆ. ಭಾರತದ ಕ್ರೀಡಾ ಬೆಳವಣಿಗೆಯಲ್ಲಿ “ಸಾಯ್‌’ ಪಾತ್ರ ಅತ್ಯಂತ ಮಹತ್ವದ್ದಾಗಿದ್ದು, ಪ್ರತಿಭಾನ್ವಿತ ಕ್ರೀಡಾಪಟುಗಳು ರೂಪುಗೊಳ್ಳುವ ಕೇಂದ್ರ ಇದಾಗಿದೆ.

ಅವರಿಗೆ ತರಬೇತಿ ನೀಡುವ ಜತೆಗೆ ಮೂಲ ಸೌಕರ್ಯ ಹಾಗೂ ಕ್ರೀಡಾ ಪರಿಕರಗಳನ್ನು ಒದಗಿಸುವುದು, ರಾಷ್ಟ್ರೀಯ ಶಿಬಿರಗಳನ್ನು ಏರ್ಪಡಿಸುವುದು, ಪ್ರಯಾಣ ಸೌಲಭ್ಯವನ್ನು ವ್ಯವಸ್ಥೆಗೊಳಿಸುವುದೆಲ್ಲ “ಸಾಯ್‌ ನ ಜವಾಬ್ದಾರಿಯಾಗಿರುತ್ತದೆ. ಅನುದಾನ ಕಡಿತಗೊಂಡ ಕಾರಣ “ಸಾಯ್‌’ ಇನ್ನು ಒಂದು ಮಿತಿಯಲ್ಲಿ ಕಾರ್ಯ ನಿರ್ವಹಿಸಬೇಕಾಗುತ್ತದೆ.

*ಪ್ರೇಮಾನಂದ ಕಾಮತ್