ಕೋವಿಡ್ 19 ಸೋಂಕಿತ ಬಾಲಕಿ ಡಿಸ್ಚಾರ್ಜ್‌

Team Udayavani, Jun 12, 2020, 7:13 AM IST

ಚಿಕ್ಕಬಳ್ಳಾಪುರ: ಕೋವಿಡ್ 19 ಪಾಸಿಟಿವ್‌ ಕಂಡು ಬಂದ ಹಿನ್ನೆಲೆಯಲ್ಲಿ ನಗರದ ಕೋವಿಡ್‌-19 ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಒಂದು ವರ್ಷದ ಬಾಲಕಿ ಗುರುವಾರ ಸಂಪೂರ್ಣ ಚೇತರಿಕೆ ಕಂಡು ಡಿಸ್ಚಾರ್ಜ್‌ ಆದ ಸಂತಸ  ಪೋಷಕರಲ್ಲಿ ಒಂದೆಡೆ, ಮತ್ತೂಂದೆಡೆ ತೂಕದಲ್ಲಿ ಹೆಚ್ಚಳವಾಗಿ ಗಮನ ಸೆಳೆದಿದ್ದಾಳೆ.

ಅಪೌಷ್ಟಿಕತೆಯಿಂದ ಬಳಲುತ್ತಿದ್ದ ಸೋಂಕಿತ ಬಾಲಕಿಯನ್ನು ಕೋವಿಡ್‌-19 ಆಸ್ಪತ್ರೆಯ ಐಸೋಲೇಷನ್‌ ವಾರ್ಡ್‌ನಲ್ಲಿ ಮೇ 25 ರಂದು ಚಿಕಿತ್ಸೆಗೆ ದಾಖಲಿಸಲಾಗಿತ್ತು. ಈ ವೇಳೆ ಬಾಲಕಿ 7.4 ಕೆ.ಜಿ.ತೂಕ ಇದ್ದಳು. ಇದೀಗ ಕ್ವಾರಂಟೈನ್‌ ಮುಗಿದು ಎರಡು ಬಾರಿ ನಡೆಸಿದ ಗಂಟಲು ದ್ರವದ ಮಾದರಿ ಪರೀಕ್ಷೆಯಲ್ಲಿ ನೆಗೆಟಿವ್‌ ಬಂದಿದ್ದು,  ಗುರುವಾರ ಕೋವಿಡ್‌-19 ಆಸ್ಪತ್ರೆಯಿಂದ ಬಿಡುಗಡೆಯಾದ ಸಂದರ್ಭದಲ್ಲಿ ಬಾಲಕಿಯ ತೂಕ 8.7 ಕೆ.ಜಿ.ಗೆ ಹೆಚ್ಚಳ ಕಂಡಿದೆ. ಸಾಮಾನ್ಯವಾಗಿ ಯಾವುದೇ ವ್ಯಕ್ತಿ ಅಥವಾ ಮಕ್ಕಳು ಸೋಂಕಿಗೆ ತುತ್ತಾದರೆ ಸೊರಗುವುದು ಸಾಮಾನ್ಯ.

ಆದರೆ ಈ ಬಾಲಕಿಯ ತೂಕದಲ್ಲಿ ಹೆಚ್ಚಳ  ಆಗಿರುವುದು ಪೋಷಕರ ಸಂತಸಕ್ಕೆ ಕಾರಣವಾಗಿದೆ. ಆಸ್ಪತ್ರೆಯಿಂದ ಬಿಡುಗಡೆಯಾಗುವ ವೇಳೆ ಜಿಲ್ಲಾಸ್ಪತ್ರೆಯ ತಜ್ಞರು, ವೈದ್ಯಕೀಯ ಸಿಬ್ಬಂದಿ ಉಪಸ್ಥಿತಿ ಇದ್ದು ಬಾಲಕಿಗೆ ಚಪ್ಪಾಳೆ ತಟ್ಟಿ ಶುಭ ಕೋರಿದರು. ಜಿಲ್ಲಾಸ್ಪತ್ರೆಯ ಮಕ್ಕಳ ತಜ್ಞರ ಸಲಹೆ, ಸೂಚನೆಯಂತೆ ಬಾಲಕಿಗೆ ಅಗತ್ಯ ಪೌಷ್ಟಿಕ  ಆಹಾರ ನೀಡಲಾಗಿದ್ದರಿಂದ ತೂಕದಲ್ಲಿ ಹೆಚ್ಚಳ ಕಂಡಿದೆ.