ಮುಂಬಯಿ ಗಣೇಶೋತ್ಸವಕ್ಕೆ ಸುಪ್ರೀಂ ಒಲವಿಲ್ಲ

Team Udayavani, Aug 22, 2020, 1:33 AM IST

ಹೊಸದಿಲ್ಲಿ: ಮುಂಬಯಿ ಗಣೇಶೋತ್ಸವಕ್ಕೆ ಸೇರುವ ಜನರನ್ನು ನಿಯಂತ್ರಿಸುವುದೇ ಕಷ್ಟ. ಗಣೇಶೋತ್ಸವಕ್ಕೆ ಅನುಮತಿ ನೀಡಲು ನಮಗೆ ಒಲವಿಲ್ಲ ಎಂದು ಸುಪ್ರೀಂಕೋರ್ಟ್‌ ಅಭಿಪ್ರಾಯಪಟ್ಟಿದೆ. ಮುಂಬಯಿಯ ಜೈನಮಂದಿರಗಳಲ್ಲಿ ಪರ್ಯುಷಣ ಆಚರಣೆಗೆ ಅವಕಾಶ ಕೋರಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯನ್ನು ಸುಪ್ರೀಂ ಕೋರ್ಟ್‌ ಶುಕ್ರವಾರ ಕೈಗೆತ್ತಿಕೊಂಡಿತ್ತು. ಈ ವೇಳೆ ಮುಖ್ಯ ನ್ಯಾ| ಎಸ್‌.ಎ. ಬೋಬ್ದೆ, ಮುಂಬಯಿ ಗಣೇಶೋತ್ಸವ ಬಗ್ಗೆ ನ್ಯಾಯಪೀಠದ ಅಭಿಪ್ರಾಯ ತಿಳಿಸಿದ್ದಾರೆ.

ಮುಂಬಯಿನ ದಾದರ್‌, ಬೈಕುಲಾ ಮತ್ತು ಚೆಂಬೂರ್‌ನ 3 ಜೈನ ಮಂದಿರಗಳಲ್ಲಿ ಪರ್ಯುಷಣ ಆಚರಿಸಲು ಸುಪ್ರೀಂ ಕೋರ್ಟ್‌ ಅನುಮತಿ ಕಲ್ಪಿಸಿದೆ. ಆಚರಣೆ ವೇಳೆ ಗರಿಷ್ಠ 5ಕ್ಕಿಂತ ಹೆಚ್ಚಿನ ಜನರು ಮಂದಿರದೊಳಗೆ ಇರಬಾರದು ಎಂದೂ ಷರತ್ತು ವಿಧಿಸಿದೆ.

ಮಹಾರಾಷ್ಟ್ರ ಆಕ್ಷೇಪ: ಒಂದು ಸಮುದಾಯದ ಹಬ್ಬದ ಆಚರಣೆಗೆ ಅನುಮತಿ ನೀಡಿದರೆ, ಬೇರೊಂದು ಸಮುದಾಯದವರೂ ಇದೇ ಬೇಡಿಕೆಯನ್ನೇ ಮುಂದಿಡಬಹುದು. ಆಗ ಪರಿಸ್ಥಿತಿ ನಿಯಂತ್ರಿಸುವುದು ಕಷ್ಟವಾಗ ಬಹುದು ಎಂದು ಮಹಾರಾಷ್ಟ್ರ ಸರಕಾರ ಪರ ಪಕೀಲ ಅಭಿಷೇಕ್‌ ಮನು ಸಿಂಘ್ವಿ ವಾದಿಸಿದರು.