ಜಂಗ್ಲಿ ರಂಗಾಪೂರ ಬೆಟ್ಟದಲ್ಲಿ ಚಿರತೆ ಪ್ರತ್ಯಕ್ಷ; ಸ್ಥಳೀಯರಲ್ಲಿ ಆತಂಕ

Team Udayavani, Oct 26, 2020, 10:24 PM IST

ಗಂಗಾವತಿ: ತಾಲೂಕಿನ ಜಂಗ್ಲಿ ರಂಗಾಪೂರದ ಬೆಟ್ಟ ಪ್ರದೇಶಗಳಲ್ಲಿ ಸೋಮವಾರ ಸಂಜೆ ಚಿರತೆಯೊಂದು ಪ್ರತ್ಯಕ್ಷವಾಗಿ ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ.

ಜಂಗ್ಲಿ ರಂಗಾಪೂರದಿಂದ ಸಾಣಾಪೂರ ಕಡೆ ಹೋಗುವ ಎಡದಂಡೆಯ ಕಾಲುವೆ ಮೇಲಿನ ರಸ್ತೆ ಪಕ್ಕದ ಬೆಟ್ಟದ ಮೇಲೆ ಚಿರತೆ ಕುಳಿತು ರಸ್ತೆಯಲ್ಲಿ ಸಂಚಾರ ಮಾಡುವವರನ್ನು ವೀಕ್ಷಣೆ ಮಾಡುತ್ತಿತ್ತು. ರಸ್ತೆ ಹೋಗುವವರು ತಮ್ಮ ಮೊಬೈಲ್ ಮೂಲಕ ಚಿರತೆ ಪೊಟೊ ತೆಗೆಯುತ್ತಿದ್ದರು.

ಕಳೆದ 15 ದಿನಗಳ ಹಿಂದೆ ಜಂಗ್ಲಿ ರಂಗಾಪೂರ ಬೆಟ್ಟದಲ್ಲಿ ಮಹಿಳೆಯನ್ನು ಮತ್ತು‌‌ ಆನೆಗೊಂದಿ ಮೇಗೋಟ ವಾಲೀಕಿಲ್ಲಾ ಬೆಟ್ಟದಲ್ಲಿ ಪ್ರವಾಸಕ್ಕೆ ಆಗಮಿಸಿದ್ದ 10 ವರ್ಷದ ಬಾಲಕನನ್ನು ಚಿರತೆ ಗಾಯಗೊಳಿಸಿತ್ತು. ನಂತರ ಬೆಟ್ಟಗಳಲ್ಲಿ ಚಿರತೆ ಸೆರೆ ಹಿಡಿಯಲು ಬೋನ್ ಗಳನ್ನು ಇರಿಸಿತ್ತು. ಆನೆಗೊಂದಿ ಹತ್ತಿರ 4 ವರ್ಷದ ಚಿರತೆಯೊಂದು ಸೆರೆ ಸಿಕ್ಕಿತ್ತು. ಈ ಮಧ್ಯೆ ಸೋಮವಾರ ಸಂಜೆ ಪುನಃ ಚಿರತೆ ಪ್ರತ್ಯಕ್ಷವಾಗಿದೆ.