ಹೀರೋಗೆ ಪೈರಸಿ ಕಾಟ: ರಿಷಭ್‌ ಶೆಟ್ಟಿ ಆಕ್ರೋಶ!

Team Udayavani, Mar 9, 2021, 11:25 AM IST

ಕಳೆದ ವಾರ ರಿಷಭ್‌ ಶೆಟ್ಟಿ ನಾಯಕನಾಗಿ ನಟಿಸಿ, ನಿರ್ಮಿಸಿರುವ “ಹೀರೋ’ ಚಿತ್ರ ರಾಜ್ಯಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದೆ. “ಹೀರೋ’ ಚಿತ್ರಕ್ಕೆ ಎಲ್ಲ ಕಡೆಗಳಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ ಎನ್ನುವಾಗಲೇ, ಚಿತ್ರ ಪೈರಸಿ ಕಾಪಿಗಳು ಹರಿದಾಡುತ್ತಿರುವುದು ಚಿತ್ರತಂಡಕ್ಕೆ ದೊಡ್ಡ ತಲೆ ನೋವು ತರಿಸಿದೆ.

ಈ ಬಗ್ಗೆ ಮಾತನಾಡಿರುವ ನಾಯಕ ನಟ ಕಂ ನಿರ್ಮಾಪಕ ರಿಷಭ್‌ ಶೆಟ್ಟಿ, “ಕೊರೊನಾ ಸಮಯದಲ್ಲಿ ಎಲ್ಲರೂ ಹೊರಗೆ ಬರೋದಕ್ಕೆ ಹೆದರುತ್ತಿದ್ದಾಗಲೇ, ಜನರನ್ನು ಮನರಂಜಿಸಬೇಕು ಅನ್ನೋ ಕಾರಣಕ್ಕೆ ಸಾಕಷ್ಟು ರಿಸ್ಕ್ ತೆಗೆದುಕೊಂಡು, ಅತಿ ಕಡಿಮೆ ಅವಧಿಯಲ್ಲಿ, ಕೇವಲ 24 ಜನ ಸೇರಿಕೊಂಡು ಈ ಸಿನಿಮಾ ಮಾಡಿದ್ದೇವೆ. ಸಿನಿಮಾ ರಿಲೀಸ್‌ ಆದ ಬಳಿಕ ಎಲ್ಲ ಕಡೆಗಳಿಂದಲೂ ಒಳ್ಳೆಯ ರೆಸ್ಪಾನ್ಸ್‌ ಸಿಗ್ತಿದೆ. ಇದು ಖುಷಿಯ ವಿಷಯವಾದ್ರೂ, ಸಿನಿಮಾ ರಿಲೀಸ್‌ ಆದ ಮೂರೇ ದಿನದಲ್ಲಿ ಪೈರಸಿ ಕಾಪಿಗಳು ಸೋಶಿಯಲ್‌ ಮೀಡಿಯಾಗಳಲ್ಲಿ ಹರಿದಾಡುತ್ತಿದೆ. ಇದು ನಿಜಕ್ಕೂ ನಮಗೆ ಬೇಸರ ತಂದಿದೆ’ ಎನ್ನುತ್ತಾರೆ.

“ಸಿನಿಮಾ ಥಿಯೇಟರ್‌ನಲ್ಲಿ ಇನ್ನೂ ಓಡುತ್ತಿರುವಾಗಲೇ ಪೈರಸಿ ಕಾಪಿಗಳು ಹೊರಬಂದಿವೆ. ಪೈರಸಿ ಕಾಪಿಗಳು ಎಷ್ಟು ಹರಿದಾಡುತ್ತಿವೆಯೆಂದರೆ, ನಾವು ಕಳೆದ ಎರಡು – ಮೂರು ದಿನಗಳಿಂದ ಕೂತು ಲಿಂಕ್‌ಗಳನ್ನು ಹುಡುಕಿ ಡಿಲೀಟ್‌ ಮಾಡಿದಷ್ಟು, ಹರಿದಾಡುತ್ತಿವೆ. ಥಿಯೇಟರ್‌ ಒಳಗೆ ಕ್ಯಾಮೆರಾ ತೆಗೆದುಕೊಂಡು ಹೋಗಿ ಇಡೀ ಸಿನಿಮಾ ಶೂಟ್‌ ಮಾಡಿಕೊಂಡು ಬರುತ್ತಾರೆ ಅಂದ್ರೆ, ಅದರಲ್ಲಿ ಥಿಯೇಟರ್‌ನವರ ಜವಾಬ್ದಾರಿಯೂ ಇದೆ. ಥಿಯೇಟರ್‌ ಒಳಗೆ ಕ್ಯಾಮೆರಾ, ಮೊಬೈಲ್‌ಳನ್ನು ಹೇಗೆ ಅಲೋ ಮಾಡುತ್ತಾರೆ ಎಂಬುದೇ ಗೊತ್ತಾಗುತ್ತಿಲ್ಲ’ ಎನ್ನುತ್ತಾರೆ ರಿಷಭ್‌ ಶೆಟ್ಟಿ.

“ಯಾರಿಗಾದರೂ, ಸೋಶಿಯಲ್‌ ಮೀಡಿಯಾದಲ್ಲಿ ಅಥವಾ ಬೇರೆ ಎಲ್ಲಾದರೂ, “ಹೀರೋ’ ಸಿನಿಮಾದ ಪೈರಸಿ ಕಾಪಿ ಅಥವಾ ಲಿಂಕ್‌ ಸಿಕ್ಕರೆ ಮನಗೆ ಕಳುಹಿಸಿ. ನಾವು ಅದನ್ನು ತೆಗೆಸುವ ಕೆಲಸ ಮಾಡುತ್ತೇವೆ’ ಎಂದಿರುವ ರಿಷಭ್‌ ಶೆಟ್ಟಿ, “ಆದಷ್ಟು ಪೈರಸಿ ಕಾಪಿ ನೋಡುವ ಬದಲು ಥಿಯೇಟರ್‌ಗೆ ಬಂದು ಸಿನಿಮಾ ನೋಡಿ. ನಮ್ಮ ಪರಿಶ್ರಮಕ್ಕೆ ಆಗ ಬೆಲೆ ಸಿಕ್ಕಂತಾಗುತ್ತದೆ’ ಎಂದು ಮನವಿ ಮಾಡಿದ್ದಾರೆ.