ಕಿರುತೆರೆಯಿಂದ ಹಿರಿತೆರೆಗೆ ಕೌಸ್ತುಭ ಮಣಿ ಪಯಣ

Team Udayavani, Apr 4, 2023, 6:16 PM IST

ಕಿರುತೆರೆಯಲ್ಲಿ ನಟಿಸಿ, ಮನೆಮಂದಿಯ ಮೆಚ್ಚುಗೆ ಗಳಿಸಿದ ಅನೇಕ ನಟಿಯರು ಮುಂದೆ ಸಿನಿಮಾದಲ್ಲಿ ಬಿಝಿಯಾಗಿದ್ದಾರೆ. ಈಗಾಗಲೇ ಕಿರುತೆರೆಯಿಂದ ಸಿನಿಮಾಕ್ಕೆ ಬಂದು ಗಟ್ಟಿನೆಲೆಕಂಡುಕೊಂಡಿರುವ ಅನೇಕ ನಟಿಯರು ಇದ್ದಾರೆ. ಈಗ ನವನಟಿ ಕೌಸ್ತುಭ ಮಣಿ ಸರದಿ.

“ನನ್ನರಸಿ ರಾಧೆ’ ಧಾರಾವಾಹಿಯಲ್ಲಿ ಮುಗ್ಧ ಹುಡುಗಿ ಪಾತ್ರದಲ್ಲಿ ಎಲ್ಲರ ಮೆಚ್ಚುಗೆ ಗಳಿಸಿರುವ ಕೌಸ್ತುಭ ಈಗ ಸಿನಿಮಾದತ್ತ ವಾಲಿದ್ದಾರೆ. ಸದ್ಯ ಕೌಸ್ತುಭ “ರಾಮಾಚಾರಿ 2.0′ ಸಿನಿಮಾದಲ್ಲಿ ನಟಿಸಿದ್ದು, ಆ ಚಿತ್ರ ಈ ವಾರ ತೆರೆಕಾಣುತ್ತಿದೆ. ಸಹಜವಾಗಿಯೇ ಚಿತ್ರದ ಮೇಲೆ ಕೌಸ್ತುಭಗೆ ನಿರೀಕ್ಷೆ ಇದೆ.

ಇದನ್ನೂ ಓದಿ:ಪಂತ್ ಗೆ ಜೆರ್ಸಿ ಗೌರವ ನೀಡಿದ್ದಕ್ಕೆ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಬಿಸಿಸಿಐ ಗರಂ

ತೇಜ್‌ ಈ ಸಿನಿಮಾದ ನಾಯಕ. ಜೊತೆಗೆ ನಿರ್ದೇಶನ ಕೂಡಾ ಮಾಡಿದ್ದಾರೆ. ಸಿನಿಮಾದ ಬಗ್ಗೆ ಮಾತನಾಡುವ ನಟ ಕಂ ನಿರ್ದೇಶಕ ತೇಜ್‌, “ಈ ಸಿನಿಮಾದ ಟೈಟಲ್‌ “ರಾಮಾಚಾರಿ 2.0′ ಅಂತಿದ್ದರೂ, ಈ ಹಿಂದೆ ಬಂದ “ರಾಮಾಚಾರಿ’ ಹೆಸರಿನ ಸಿನಿಮಾಗಳಿಗೂ ಇದಕ್ಕೂ ಯಾವುದೇ ಸಂಬಂಧವಿಲ್ಲ. ಸಿನಿಮಾದ ಸಬ್ಜೆಕ್ಟ್ ಗೆ ಹೊಂದಾಣಿಕೆಯಾಗುತ್ತದೆ ಎಂಬ ಕಾರಣಕ್ಕೆ ಈ ಟೈಟಲ್‌ ಇಡಲಾಗಿದೆ. ಯಾರು ಪಾಪ ಮಾಡುತ್ತಾರೋ ಅವರಿಗೆ ಕರ್ಮ ಸುತ್ತಿಕೊಂಡು ಬರುತ್ತದೆ ಎಂಬ ಕರ್ಮ ಸಿದ್ಧಾಂತದ ಸುತ್ತ “ರಾಮಾಚಾರಿ 2.0′ ಸಿನಿಮಾದ ಕಥಾಹಂದರ ಸಾಗುತ್ತದೆ. ಕ್ಲಾಸ್‌ ಸಬ್ಜೆಕ್ಟ್ ಒಂದನ್ನು ಮಾಸ್‌ ಎಲಿಮೆಂಟ್ಸ್‌ ಜೊತೆಗೆ ಪ್ರೇಕ್ಷಕರ ಮುಂದೆ ತರುತ್ತಿದ್ದೇವೆ’ ಎಂದು ಕಥಾಹಂದರದ ಬಗ್ಗೆ ವಿವರಣೆ ನೀಡುತ್ತಾರೆ.

“ರಾಮಾಚಾರಿ 2.0′ ಸಿನಿಮಾದ ಟೈಟಲ್‌ಗೆ “ಕ್ಲಾಸ್‌ ಮೀಟ್ಸ್‌ ಮಾಸ್‌’ ಎಂಬ ಅಡಿಬರಹವಿದ್ದು, ಕ್ಲಾಸ್‌ ಸಬ್ಜೆಕ್ಟ್ ಒಂದು ಮಾಸ್‌ ಆಡಿಯನ್ಸ್‌ಗೆ ಇಷ್ಟವಾಗುವಂತೆ ಈ ಸಿನಿಮಾದಲ್ಲಿ ತೆರೆಮೇಲೆ ಹೇಳಿದ್ದೇವೆ. ಹಾಗಾಗಿ ಸಿನಿಮಾದ ಟೈಟಲ್‌ಗೆ ಇಂಥದ್ದೊಂದು ಅಡಿಬರಹವಿದೆ ಎನ್ನುತ್ತಾರೆ.

“ಪನಾರಮಿಕ್‌ ಸ್ಟುಡಿಯೋಸ್‌’ ಮತ್ತು “ಮೇಘನಾ ಕ್ರಿಯೇಶನ್ಸ್‌’ ಬ್ಯಾನರ್‌ನಲ್ಲಿ ನಿರ್ಮಾಣವಾಗಿರುವ “ರಾಮಾಚಾರಿ 2.0′ ಸಿನಿಮಾದಲ್ಲಿ ನಾಯಕನಾಗಿ ತೇಜ್‌ ಅವರೊಂದಿಗೆ, ಹಿರಿಯ ನಟ ರಾಘವೇಂದ್ರ ರಾಜಕುಮಾರ್‌, ಸ್ಪರ್ಶ ರೇಖಾ, ಚಂದನ, ಸ್ವಾತಿ, ವಿಜಯ್‌ ಚೆಂಡೂರು, ಕೌಸ್ತುಭಾ, ಸಂದೀಪ್‌ ಮಲಾನಿ ಮುಂತಾದವರು ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.