ಯೋಗಿಗೆ ಟೈಟಲ್ ಯೋಗ
Team Udayavani, Mar 12, 2018, 11:18 AM IST
ಅಂತೂ ದ್ವಾರಕೀಶ್ ಚಿತ್ರದಡಿ ನಿರ್ಮಾಣವಾಗುತ್ತಿರುವ 51ನೇ ಚಿತ್ರಕ್ಕೆ ಹೆಸರು ಸಿಕ್ಕಿದೆ. ಚಿತ್ರತಂಡವು “ಅಮ್ಮಾ ಐ ಲವ್ ಯೂ’ ಎಂಬ ಟೈಟಲ್ ಬೇಕೆಂದು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಮನವಿ ಸಲ್ಲಿಸಿತ್ತು. ಈಗ ಮಂಡಳಿಯು ಚಿತ್ರತಂಡಕ್ಕೆ ಆ ಹೆಸರು ನೀಡುವ ಮೂಲಕ ಪ್ರಕರಣಕ್ಕೆ ಇತಿಶ್ರೀ ಹಾಡಿದೆ.
“ಅಮ್ಮಾ ಐ ಲವ್ ಯೂ’ ಎಂಬ ಹೆಸರಿನಲ್ಲೇ ಚಿತ್ರದ ಚಿತ್ರೀಕರಣವಾಗಿದ್ದರೂ ಮತ್ತು ಅದೇ ಹೆಸರಿನಲ್ಲಿ ಚಿತ್ರವನ್ನು ಬಿಡುಗಡೆ ಮಾಡಬೇಕೆಂದು ಚಿತ್ರತಂಡದವರು ಹೊರಟಿದ್ದರೂ, ಚಿತ್ರತಂಡದವರಿಗೆ ಟೈಟಲ್ ಸಿಕ್ಕಿರಲಿಲ್ಲ. ಇನ್ನೂ ಹೆಸರು ಸಿಗದ ಕಾರಣ, ಪ್ರಚಾರವನ್ನೂ ಮಾಡುವಂತಿರಲಿಲ್ಲ. ಇಷ್ಟಕ್ಕೂ ಯಾಕೆ ಟೈಟಲ್ ಸಿಗಲಿಲ್ಲ ಎಂದರೆ ಅದಕ್ಕೆ ಕಾರಣವೂ ಇದೆ.
ಅದೇನೆಂದರೆ, ವಾಣಿಜ್ಯ ಮಂಡಳಿಯಲ್ಲಿ “ಅಮ್ಮ’ ಎಂಬ ಹೆಸರು ಬೇರೆ ನಿರ್ಮಾಪಕರ ಹೆಸರಿನಲ್ಲಿ ದಾಖಲಾಗಿತ್ತು. ಹಾಗಾಗಿ ಸ್ವಲ್ಪ ಗೊಂದಲವಾಗಿ ಚಿತ್ರದ ಹೆಸರು ಸಿಕ್ಕಿರಲಿಲ್ಲ. ಈಗ ಆ ಟೈಟಲ್ನ ಅವಧಿ ಮುಗಿದಿರುವುದರಿಂದ, ವಾಣಿಜ್ಯ ಮಂಡಳಿಯು ದ್ವಾರಕೀಶ್ ಚಿತ್ರ ಅವರಿಗೆ “ಅಮ್ಮಾ ಐ ಲವ್ ಯೂ’ ಹೆಸರನ್ನು ಕೊಟ್ಟಿದೆ.
ಈಗ ಹೆಸರು ಸಿಕ್ಕಿರುವುದರಿಂದ, ಚಿತ್ರದ ಪ್ರಚಾರವನ್ನು ಆದಷ್ಟು ಬೇಗ ಶುರು ಮಾಡಿ, ಚಿತ್ರವನ್ನು ಬಿಡುಗಡೆ ಮಾಡುವುದಾಗಿ ಹೇಳುತ್ತಾರೆ ಯೋಗಿ ದ್ವಾರಕೀಶ್. ಅಂದ ಹಾಗೆ, “ಅಮ್ಮಾ ಐ ಲವ್ ಯೂ’ ಚಿತ್ರವನ್ನು ಕೆ.ಎಂ. ಚೈತನ್ಯ ನಿರ್ದೇಶಿಸಿದ್ದು, ಚಿರಂಜೀವಿ ಸರ್ಜಾ, ನಿಶ್ವಿಕಾ ನಾಯ್ಡು, ಸಿತಾರಾ ಮುಂತಾದವರು ನಟಿಸಿದ್ದಾರೆ.