ಕೋವಿಡ್ ಲಾಕ್ ಡೌನ್: ಲೂಡೋ ಆಡುವಾಗ ಕೆಮ್ಮಿದ್ದಕ್ಕೆ ಪಿಸ್ತೂಲ್ ನಿಂದ ಗುಂಡು ಹಾರಿಸಿದ!
ಉದ್ದೇಶಪೂರ್ವಕವಾಗಿಯೇ ತನಗೆ ಕೋವಿಡ್ ಸೋಂಕು ತಗುಲಿಸಬೇಕೆಂದು ಕೆಮ್ಮಿರುವುದಾಗಿ ಜಗಳ ತೆಗೆದಿದ್ದ.
Team Udayavani, Apr 15, 2020, 10:55 PM IST
ನೋಯ್ಡಾ:ಲೂಡೋ ಗೇಮ್ ಆಡುವ ಸಂದರ್ಭದಲ್ಲಿ 25 ವರ್ಷದ ಯುವಕ ಕೆಮ್ಮಿದ್ದಕ್ಕೆ ಕೋವಿಡ್ ಸೋಂಕು ಇದೆ ಎಂದು ಆರೋಪಿಸಿ ಗುಂಡು ಹೊಡೆದಿರುವ ಘಟನೆ ಗ್ರೇಟರ್ ನೋಯ್ಡಾದಲ್ಲಿ ನಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ಮಂಗಳವಾರ ರಾತ್ರಿ ದಯಾನಗರ್ ಗ್ರಾಮದ ಜಾರ್ಚಾ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ. ನಾಲ್ವರು ಒಟ್ಟಾಗಿ ಲೂಡೋ ಗೇಮ್ ಆಡುತ್ತಿದ್ದಾಗ ಈ ಘಟನೆ ನಡೆದಿದೆ ಎಂದು ವರದಿ ವಿವರಿಸಿದೆ.
ಪ್ರಶಾಂತ್ ಹಾಗೂ ಇತರ ಮೂವರು ಲೂಡೋ ಆಡುತ್ತಿದ್ದಾಗ ಗುಲ್ಲು ಎಂಬಾತ ಆಗಮಿಸಿದ್ದ. ಈ ವೇಳೆ ಪ್ರಶಾಂತ್ ಕೆಮ್ಮಿದ್ದ. ಇದರಿಂದ ಆಕ್ರೋಶಗೊಂಡ ಗುಲ್ಲು ಉದ್ದೇಶಪೂರ್ವಕವಾಗಿಯೇ ತನಗೆ ಕೋವಿಡ್ ಸೋಂಕು ತಗುಲಿಸಬೇಕೆಂದು ಕೆಮ್ಮಿರುವುದಾಗಿ ಜಗಳ ತೆಗೆದಿದ್ದ. ವಾಗ್ವಾದ ವಿಪರೀತಕ್ಕೆ ಹೋದಾಗ ಗುಲ್ಲು ಪಿಸ್ತೂಲ್ ನಿಂದ ಪ್ರಶಾಂತ್ ಗೆ ಶೂಟ್ ಮಾಡಿಬಿಟ್ಟಿರುವುದಾಗಿ ವರದಿ ತಿಳಿಸಿದೆ.
ಪ್ರಶಾಂತ್ ನನ್ನು ಕೂಡಲೇ ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆರೋಪಿಗಳ ವಿರುದ್ಧ ಎಫ್ ಐಆರ್ ದಾಖಲಿಸಲಾಗಿದ್ದು, ಅವರನ್ನು ಹಿಡಿಯಲು ತಂಡ ರಚಿಸಿರುವುದಾಗಿ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.