Mahadevpur ಠಾಣೆ ಆವರಣದಲ್ಲಿದ್ದ 60 ಕ್ಕೂ ಹೆಚ್ಚು ವಾಹನಗಳು ಭಸ್ಮ

Team Udayavani, Apr 13, 2023, 7:06 PM IST

ಮಹದೇವಪುರ: ಜಪ್ತಿ ಮಾಡಿ ವಶಪಡಿಸಿಕೊಂಡಿದ್ದ ವಾಹನಗಳಿಗೆ ಆಕಸ್ಮಿಕವಾಗಿ ಬೆಂಕಿ ಅಂಟಿಕೊಂಡ ಪರಿಣಾಮ ಆವಲಹಳ್ಳಿ ಪೊಲೀಸ್ ಠಾಣಾ ಆವರಣದಲ್ಲಿದ್ದ ಸುಮಾರು 60 ಕ್ಕೂ ಹೆಚ್ಚು ವಾಹನಗಳು ಬೆಂಕಿಗೆ ಆಹುತಿಯಾಗಿರುವ ಘಟನೆ ಗುರುವಾರ ನಡೆದಿದೆ.

ಮಧ್ಯಾಹ್ನ ಸುಮಾರು 12.30 ರ ಸಮಯದಲ್ಲಿ ಸಣ್ಣ ಪ್ರಮಾಣದಲ್ಲಿ ವಾಹನಗಳಲ್ಲಿ ಕಾಣಿಸಿಕೊಂಡ ಬೆಂಕಿಯು ನೋಡ ನೋಡುತ್ತಲೇ ಬೆಂಕಿಯ ಕೆನ್ನಾಲಗೆಯಾಯಿತು. ಬೆಂಕಿಯನ್ನು ನಂದಿಸಲು ಹೊಸಕೋಟೆ ಅಗ್ನಿ ಶಾಮಕ ಸಿಬಂದಿ ಸತತ ಎರಡು ಗಂಟೆ ಕಾರ್ಯಚರಣೆ ಮಾಡಿ ಮೂರು ವಾಹನಗಳಲ್ಲಿ ಬೆಂಕಿಯ ಆರಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಪೊಲೀಸ್ ಠಾಣೆ ಹಿಂಭಾಗ 3 ಎಕರೆ ಜಾಗದಲ್ಲಿ ಸಣ್ಣದಾಗಿ ಬೆಂಕಿ ಕಾಣಿಸಿಕೊಂಡು ಗಾಳಿ ಹೆಚ್ಚಾಗಿರುವುದರಿಂದ ವಿವಿಧ ಪ್ರಕರಣಗಳಲ್ಲಿ ಜಪ್ತಿ ಮಾಡಿ ಪೊಲೀಸ್ ಠಾಣಾ ಆವರಣದಲ್ಲಿ ನಿಲ್ಲಿಸಲಾಗಿದ್ದ ವಾಹನಗಳಿಗೆ ಬೆಂಕಿ ಅಂಟಿಕೊಂಡು 8 ಆಟೋ, 8 ಕಾರು,45ಬೈಕ್ ಗಳು ಸೇರಿ ಸುಮಾರು 60 ಹೆಚ್ಚು ವಾಹನಗಳು ಬೆಂಕಿಗೆ ಆಹುತಿಯಾಗಿವೆ ಎಂದು ಐಜಿ ರವಿಕಾಂತೆಗೌಡ ಮಾಹಿತಿ ನೀಡಿದರು.

ಬೆಂಕಿ ಯಾವುದರಿಂದ ಬಂತು ಎಲ್ಲಿಂದ ಬಂತು ಎಂದು ತನಿಖೆ ಮಾಡಲು ಪೋಲಿಸರಿಗೆ ಸೂಚಿಸಲಾಗಿದೆ ಎಂದರು.ಪೊಲೀಸ್ ಠಾಣೆಗೆ ಅಥವಾ ಠಾಣೆ ಯ ಸ್ವತ್ತು,ದಾಖಲೆ ಗಳಿಗೆ ಯಾವುದೇ ರೀತಿಯ ಹಾನಿಯಾಗಿಲ್ಲ . ತನಿಖೆ ಮಾಡಿದ ನಂತರ ಬೆಂಕಿ ಎಲ್ಲಿಂದ ಬಂತು ಯಾವುದರಿಂದ ಬಂತು ಮುಂದೆ ಈ ರೀತಿಯ ಅನಾಹುತ ಆಗದಂತೆ ಕ್ರಮ ಕೈಗೊಳ್ಳಲು ಪೊಲೀಸ್ ಠಾಣೆ ಅಧಿಕಾರಿಗಳಿಗೆ ಸೂಚಿಸಿದರು.