ಗಡಿ ಭಾಗದಲ್ಲಿ ಪೊಲೀಸ್‌ ಭದ್ರತೆ ಹೆಚ್ಚಳ

Team Udayavani, Jul 6, 2020, 4:04 PM IST

ಸಾಂದರ್ಭಿಕ ಚಿತ್ರ

ಸಂಬರಗಿ: ರಾಜ್ಯದ ಗಡಿ ಭಾಗದಲ್ಲಿರುವ ಚೆಕ್‌ ಪೋಸ್ಟ್‌ದಲ್ಲಿ 2ನೇ ಹಂತದ ಬಿಗಿ ಪೊಲೀಸ್‌ ಭದ್ರತೆ ಕಲ್ಪಿಸಲಾಗಿದ್ದು, ಗ್ರಾಮಗಳನ್ನು ಸ್ವಯಂ ಪ್ರೇರಿತವಾಗಿ ಸೀಲ್‌ಡೌನ್‌ ಮಾಡಿದ್ದಾರೆ.

ಗಡಿ ಭಾಗದ ಗ್ರಾಮಗಳಲ್ಲಿ ನೂರಕ್ಕೆ 60 ಜನರು ಮುಂಬೈ ಮತ್ತು ಪುಣೆಯಲ್ಲಿ ವಾಸವಾಗಿದ್ದಾರೆ. ಈ ನಗರಗಳಲ್ಲಿ ಕೋವಿಡ್ ಹಾವಳಿ ಹೆಚ್ಚಾಗಿದ್ದರಿಂದ ಅಲ್ಲಿ ವಾಸವಿದ್ದ ಜನರು ಮರಳಿ ತಮ್ಮ ಗ್ರಾಮಗಳಿಗೆ ಬರುತ್ತಿದ್ದಾರೆ. ಪಂಡೆಗಾಂವ, ಖೋತವಾಡಿ, ಖೀಳೇಗಾಂವ, ಶಿರೂರ, ಸಂಬರಗಿ, ಅನಂತಪುರ, ಆಜೂರ, ಮಲಾಬಾದ, ಬಳ್ಳಿಗೇರಿ, ತಾವಂಶಿ ಸೇರಿದಂತೆ ಹಲವಾರು ಗ್ರಾಮಗಳಿಗೆ ಜನರು ಬರುತ್ತಿದ್ದಾರೆ. ಮಹಾರಾಷ್ಟ್ರದ ಜನರನ್ನು ಕಂಡರೆ ಸ್ಥಳೀಯರು ಭಯಪಡುವಂತಾಗಿದೆ.

ಗಡಿ ಗ್ರಾಮಗಳಾದ ಖೀಳೇಗಾಂವ, ಅನಂತಪುರ, ಬಳ್ಳಿಗೇರಿ, ಬ್ಯಾಡರಟ್ಟಿ ಸೇರಿದಂತೆ ಗಡಿ ಗ್ರಾಮಗಳಲ್ಲಿ ಚೆಕ್‌ಪೋಸ್ಟ್‌ ಅಳವಡಿಸಲಾಗಿದೆ. ಆದರೆ, ಈ ಗಡಿಭಾಗದ ಗ್ರಾಮಗಳಿಗೆ ಮಹಾರಾಷ್ಟ್ರದಿಂದ ಸುಮಾರು 2000ಕ್ಕೂ ಮೇಲ್ಪಟ್ಟು ಜನರು ಬಂದಿದ್ದಾರೆ.

ಅನಂತಪುರ ಗ್ರಾಮಕ್ಕೆ ಮುಂಬೈನಿಂದ ಒಂದೇ ಕುಟುಂಬ 7 ಜನರು ಬಂದಿದ್ದು, ಅದರಲ್ಲಿ ಇಬ್ಬರಿಗೆ ಪಾಸಿಟಿವ್‌ ಬಂದಿದ್ದು, ಉಳಿದ 5 ಐವರನ್ನು ಜಿರಗ್ಯಾಳ ತೋಟದ ಶಾಲೆಯಲ್ಲಿ ಕ್ವಾರಂಟೈನ್‌ ಮಾಡಲಾಗಿದೆ. ಮತ್ತೂಮ್ಮೆ ಅವರ ಗಂಟಲು ದ್ರವದ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಆರೋಗ್ಯ ಇಲಾಖೆಯ ಮೇಲ್ವಿಚಾರಕ ಸುರೇಶ ವಾಲಿಕರ ಹೇಳಿದ್ದಾರೆ.