ಮಾರ್ಚ್ 10 ರಿಂದ ಹೋಳಿ ಎಂದು ಮೊದಲೇ ಹೇಳಿದ್ದೆವು: ಪ್ರಧಾನಿ ಮೋದಿ

Team Udayavani, Mar 10, 2022, 8:05 PM IST

ನವದೆಹಲಿ: ಪ್ರಜಾಪ್ರಭುತ್ವದ ಹಬ್ಬದಲ್ಲಿ ಭಾಗವಹಿಸಿದ್ದಕ್ಕಾಗಿ ಮತ್ತು ಬಿಜೆಪಿಗೆ ಈ ವಿಜಯವನ್ನು ಖಚಿತಪಡಿಸಿದ್ದಕ್ಕಾಗಿ ನಾನು ಎಲ್ಲಾ ಮತದಾರರಿಗೆ ಧನ್ಯವಾದಗಳನ್ನು ಸಲ್ಲಿಸುತ್ತೇನೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.

ದೆಹಲಿಯ ಬಿಜೆಪಿ ಪ್ರಧಾನ ಕಚೇರಿಯಲ್ಲಿ ಗುರುವಾರ ಸಜೆ ಪಕ್ಷದ ಕಾರ್ಯಕರ್ತರನ್ನು ಉದ್ದೇಶಿಸಿ ಪ್ರಧಾನಿ ಮೋದಿ ಮಾತನಾಡಿದರು, ಉತ್ತರಪ್ರದೇಶ ದೇಶಕ್ಕೆ ಅನೇಕ ಪ್ರಧಾನ ಮಂತ್ರಿಗಳನ್ನು ನೀಡಿದೆ, ಆದರೆ ಐದು ವರ್ಷಗಳ ಅವಧಿಯನ್ನು ಪೂರ್ಣಗೊಳಿಸಿದ ಮುಖ್ಯಮಂತ್ರಿಯ ಮೊದಲ ನಿದರ್ಶನವಾಗಿದೆ. ಯುಪಿಯಲ್ಲಿ 37 ವರ್ಷಗಳ ನಂತರ, ಸತತ ಎರಡನೇ ಬಾರಿಗೆ ಸರ್ಕಾರ ಬಂದಿದೆ ಎಂದರು.

ಮಾರ್ಚ್ 10 ರಿಂದ ಹೋಳಿ ಆರಂಭವಾಗಲಿದೆ ಎಂದು ನಾವು ಮೊದಲೇ ಹೇಳಿದ್ದೆವು.ಇದು ನಮ್ಮ ಎನ್‌ಡಿಎ ಕಾರ್ಯಕರ್ತರ ‘ವಿಜಯ 4’ ಎಂದರು.

ಪಂಜಾಬ್ ಬಿಜೆಪಿ ಕಾರ್ಯಕರ್ತರಿಗೆ ನಾನು ವಿಶೇಷವಾಗಿ ಕೃತಜ್ಞತೆಗಳನ್ನು ಸಲ್ಲಿಸುತ್ತೇನೆ. ಪ್ರತಿಕೂಲ ಸ್ಥಿತಿಯಲ್ಲೂ ನಮ್ಮ ಪಕ್ಷದ ಧ್ವಜವನ್ನು ಎತ್ತಿ ಹಿಡಿದಿದ್ದೀರಿ. ಮುಂದಿನ ದಿನಗಳಲ್ಲಿ ಪಂಜಾಬ್ ನಲ್ಲೂ ಪಕ್ಷ ಅಧಿಕಾರಕ್ಕೆ ಬರಲಿದೆ ಎಂದರು.

2019 ರ ಚುನಾವಣಾ ಫಲಿತಾಂಶದ ನಂತರ, ಕೆಲವು ರಾಜಕೀಯ ತಜ್ಞರು 2017 ರ ಫಲಿತಾಂಶಗಳು 2019 ರ ಫಲಿತಾಂಶಗಳನ್ನು ನಿರ್ಧರಿಸುತ್ತವೆ ಎಂಡಿದ್ದರು. ನಾನು ಇಂದು ಹೇಳುತ್ತೇನೆ, 2022 ರ ಫಲಿತಾಂಶಗಳು 2024 ರ ಫಲಿತಾಂಶಗಳನ್ನು ನಿರ್ಧರಿಸಿವೆ ಎಂದು ಅವರು ಈ ಬಾರಿಯೂ ಹೇಳುತ್ತಾರೆ ಎಂದು ನಾನು ನಂಬುತ್ತೇನೆ ಎಂದರು.

ಉತ್ತರಪ್ರದೇಶದ ಚುನಾವಣೆಯಲ್ಲಿ ಜಾತಿ ಮಾತ್ರ ಓಡುತ್ತದೆ ಎಂದು ಕೆಲವರು ದೂಷಿಸುತ್ತಾರೆ. 2014 ರ ಫಲಿತಾಂಶಗಳನ್ನು ನೋಡಿ, 2017, 2019 ರ ಫಲಿತಾಂಶಗಳನ್ನು ನೋಡಿ ಮತ್ತು ಈಗ ಮತ್ತೊಮ್ಮೆ 2022 ರಲ್ಲಿಯೂ ಸಹ, ಪ್ರತಿ ಬಾರಿಯೂ ಯುಪಿಯ ಜನರು ಅಭಿವೃದ್ಧಿಯ ರಾಜಕೀಯವನ್ನು ಆಯ್ಕೆ ಮಾಡಿದ್ದಾರೆ ಎಂದರು.

ಈ ಚುನಾವಣೆಗಳಲ್ಲಿ ಮಹಿಳೆಯರು ನಿರ್ಣಾಯಕ ಪಾತ್ರ ವಹಿಸಿದ್ದಾರೆ. ಅವರು ನಮಗೆ ಆಶೀರ್ವಾದ ಮಾಡಿದ್ದಾರೆ. ಮಹಿಳಾ ಮತದಾರರು ಪ್ರಾಬಲ್ಯ ಹೊಂದಿರುವ ಕ್ಷೇತ್ರಗಳಲ್ಲಿ ನಾವು ಅದ್ಭುತವಾಗಿ ಗೆದ್ದಿದ್ದೇವೆ. ಈ ವಿಜಯದಲ್ಲಿ ನಮ್ಮ ನಾರಿ ಶಕ್ತಿ ನಮ್ಮ ಪಾಲುದಾರರಾಗಿದ್ದಾರೆ ಎಂದರು.

ಬಡವರ ಹೆಸರಿನಲ್ಲಿ ಸಾಕಷ್ಟು ಘೋಷಣೆಗಳನ್ನು ಮಾಡಿದರು, ಯೋಜನೆಗಳನ್ನು ಬಹಳಷ್ಟು ಮಾಡಿದರು, ಆದರೆ ಬಲ ಹೊಂದಿದವರು ಅದನ್ನು ಪಡೆದರು. ಬಡವರು ಯಾವುದೇ ತೊಂದರೆಯಿಲ್ಲದೆ ಆ ಹಕ್ಕನ್ನು ಪಡೆಯಲು ಉತ್ತಮ ಆಡಳಿತ ಮತ್ತು ವಿತರಣೆ ಅವರಿಗೆ ಬಹಳ ಮುಖ್ಯವಾಗಿದೆ. ಇದನ್ನು ಬಿಜೆಪಿ ಅರ್ಥಮಾಡಿಕೊಂಡಿದೆ ಎಂದರು.

ಈ ಫಲಿತಾಂಶಗಳು ಬಿಜೆಪಿಯ ಬಡವರ ಪರ ಮತ್ತು ಸಕ್ರಿಯ ಆಡಳಿತವನ್ನು ಬಲವಾಗಿ ಸಮರ್ಥಿಸುತ್ತವೆ. ಈ ಹಿಂದೆ ಜನರು ವಿದ್ಯುತ್, ಅನಿಲ ಮತ್ತು ನೀರಿನಂತಹ ಮೂಲಭೂತ ಸೌಕರ್ಯಗಳಿಗಾಗಿ ಸರ್ಕಾರವನ್ನು ತಲುಪಲು ಸಾಧ್ಯವಾಗಲಿಲ್ಲ ಎಂದರು.

ಈ ರಾಜ್ಯಗಳ ಸವಾಲುಗಳು ಬೇರೆ ಬೇರೆ, ಪ್ರತಿಯೊಬ್ಬರ ಅಭಿವೃದ್ಧಿಯ ಪಥ ಬೇರೆ, ಆದರೆ ಎಲ್ಲರನ್ನೂ ಒಂದೇ ಎಳೆಯಲ್ಲಿ ಕಟ್ಟಿ ಹಾಕುತ್ತಿರುವುದು ಬಿಜೆಪಿಯ ಮೇಲಿನ ನಂಬಿಕೆ, ಬಿಜೆಪಿಯ ನೀತಿ, ಬಿಜೆಪಿಯ ಉದ್ದೇಶ ಮತ್ತು ಬಿಜೆಪಿಯ ನಿರ್ಧಾರಗಳ ಮೇಲಿನ ಅಪಾರ ನಂಬಿಕೆ ಎಂದರು.

ಗಡಿಗೆ ಹೊಂದಿಕೊಂಡಿರುವ ಗುಡ್ಡಗಾಡು ರಾಜ್ಯ, ಕಡಲತೀರದ ರಾಜ್ಯ, ಗಂಗೆಯ ವಿಶೇಷ ಆಶೀರ್ವಾದ ಹೊಂದಿರುವ ರಾಜ್ಯ, ಈಶಾನ್ಯ ಗಡಿಯಲ್ಲಿ ನಾಲ್ಕೂ ದಿಕ್ಕಿನ ಆಶೀರ್ವಾದ ಬಿಜೆಪಿಗೆ ಸಿಕ್ಕಿದೆ ಎಂದರು.

ಮೂರು ರಾಜ್ಯಗಳಾದ ಯುಪಿ, ಗೋವಾ ಮತ್ತು ಮಣಿಪುರದಲ್ಲಿ ಬಿಜೆಪಿಯ ಮತಗಳಿಕೆ ಹೆಚ್ಚಿದೆ. ಗೋವಾದಲ್ಲಿ ಚುನಾವಣೋತ್ತರ ಸಮೀಕ್ಷೆ ಗಳೆಲ್ಲವೂ ತಪ್ಪಾಗಿದ್ದು, ಅಲ್ಲಿನ ಜನ ಮೂರನೇ ಬಾರಿಗೆ ಸೇವೆ ಸಲ್ಲಿಸಲು ಅವಕಾಶ ನೀಡಿದ್ದಾರೆ ಎಂದರು.