ಕ್ಯಾನ್ಸರ್ ಗೆದ್ದ ನವಾರೊ ಫ್ರೆಂಚ್ ಕಣಕ್ಕೆ : ಕಳೆದ ತಿಂಗಳಷ್ಟೇ ಮುಗಿದಿತ್ತು ಚಿಕಿತ್ಸೆ
Team Udayavani, May 27, 2021, 7:15 AM IST
ಪ್ಯಾರಿಸ್: ವಿಶ್ವದ ಮಾಜಿ ನಂ. 6 ಆಟಗಾರ್ತಿ, ಸ್ಪೇನಿನ 32ರ ಹರೆಯದ ಕಾರ್ಲಾ ಸೂರೆಜ್ ನವಾರೊ ಮುಂಬರುವ ಫ್ರೆಂಚ್ ಓಪನ್ ಪಂದ್ಯಾವಳಿಯಲ್ಲಿ ರ್ಯಾಕೆಟ್ ಹಿಡಿಯಲಿದ್ದಾರೆ. ಪ್ಯಾರಿಸ್ನ ಆವೆಯಂಗಳದಲ್ಲಿ ಮತ್ತೂಂದು ಸುತ್ತಿನ ಕದನಕ್ಕೆ ಅಣಿಯಾಗಲಿದ್ದಾರೆ. ಇದರಲ್ಲೇನು ವಿಶೇಷ ಅಂದಿರಾ? ವಿಶೇಷ ಇದೆ. ನವಾರೊ ಇತ್ತೀಚೆಗಷ್ಟೇ ಕ್ಯಾನ್ಸರ್ ಮಾರಿಯನ್ನು ಹಿಮ್ಮೆಟ್ಟಿಸಿ ಹೊಸ ಸ್ಫೂರ್ತಿಯೊಂದಿಗೆ ಬಂದಿದ್ದಾರೆ!
32 ವರ್ಷದ ಕಾರ್ಲಾ ಸೂರೆಜ್ ನವಾರೊ ಅವರಲ್ಲಿ ಕಳೆದ ಸೆಪ್ಟಂಬರ್ ವೇಳೆ ಬಿಳಿ ರಕ್ತಕಣದ ಕ್ಯಾನ್ಸರ್ ಗೋಚರಿಸಿತ್ತು. ಇದು ಆರಂಭಿಕ ಹಂತದಲ್ಲೇ ಪತ್ತೆಯಾದ್ದರಿಂದ ಅವರು ಪ್ರಾಣಾಪಾಯಕ್ಕೆ ಸಿಲುಕಲಿಲ್ಲ. ಸತತ 6 ತಿಂಗಳ ಕಾಲ ಕಿಮೋಥೆರಪಿಗೆ ಒಳಗಾಗಿ ಜಯಿಸಿ ಬಂದರು. ಈ ನಡುವೆ ಡಿಸೆಂಬರ್ನಲ್ಲೇ ಮರಳಿ ಅಭ್ಯಾಸಕ್ಕೆ ಇಳಿದಿದ್ದರು. ಆಗಿನ್ನೂ ಚಿಕಿತ್ಸೆ ಜಾರಿಯಲ್ಲಿತ್ತು. ಕಳೆದ ತಿಂಗಳಷ್ಟೇ ಚಿಕಿತ್ಸೆ ಮುಗಿದಿತ್ತು. ಅಷ್ಟರಲ್ಲಿ ಪ್ಯಾರಿಸ್ ಅಂಗಳಕ್ಕೆ ಧುಮುಕಲು ಸಜ್ಜಾಗಿದ್ದಾರೆ!
“ಅಂಕಣದಲ್ಲೇ ಗುಡ್ಬೈ ಹೇಳಬೇಕು’
“ನನ್ನ ಪಾಲಿಗೆ ಇದು ಯಾವತ್ತೂ ಸ್ಪೆಷಲ್ ಟೂರ್ನಮೆಂಟ್. ಪ್ಯಾರಿಸ್ನಲ್ಲಿ ಆಡುವ ಮೂಲಕವೇ ಮತ್ತೂಂದು ಸುತ್ತಿನ ರ್ಯಾಕೆಟ್ ಸ್ಪರ್ಧೆಗೆ ಅಣಿಯಾಗಬೇಕು ಎಂಬುದು ನನ್ನ ಯೋಜನೆ ಆಗಿತ್ತು. ಇದೀಗ ಸಾಕಾರಗೊಳ್ಳುತ್ತಿದೆ’ ಎಂದು ಎರಡು ಬಾರಿ ಫ್ರೆಂಚ್ ಓಪನ್ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ ನವಾರೊ ಖುಷಿಯಿಂದ ಹೇಳಿದ್ದಾರೆ. ಸದ್ಯ ಅವರು ವಿಶ್ವ ರ್ಯಾಂಕಿಂಗ್ನಲ್ಲಿ 118ನೇ ಸ್ಥಾನದಲ್ಲಿದ್ದಾರೆ.
“ಟೆನಿಸ್ ನನಗೆ ಎಲ್ಲವನ್ನೂ ಕೊಟ್ಟಿದೆ. ರೊಲ್ಯಾಂಡ್ ಗ್ಯಾರಸ್ ಸವಿನೆನಪು ರೋಮಾಂಚನ. ನನ್ನ ವೃತ್ತಿ ಬದುಕಿನ ಸ್ಮರಣೀಯ ಕ್ಷಣಗಳಿಗೆ ಇದು ಸಾಕ್ಷಿಯಾಗಿದೆದ. ಟೆನಿಸ್ ಅಂಕಣದಲ್ಲೇ ಗುಡ್ಬೈ ಹೇಳುವುದು ನನ್ನ ಯೋಜನೆಯೂ ಹೌದು’ ಎಂದು ನವಾರೊ ಹೇಳಿದರು.