ಟಿವಿ ಕಳ್ಳನ ಬಂಧನ

Team Udayavani, Nov 21, 2017, 12:01 PM IST

ಬೆಂಗಳೂರು: ನಕಲಿ ವಿಳಾಸದ ದಾಖಲೆಗಳನ್ನು ನೀಡಿ ಲಾಡ್ಜ್ಗಳಲ್ಲಿ ರೂಂ ಬಾಡಿಗೆ ಪಡೆದು ಕೊಠಡಿಗಳಲ್ಲಿರುವ ಎಲ್‌ಇಡಿ ಟಿವಿಗಳನ್ನು ಕದ್ದು ಪರಾರಿಯಾಗುತ್ತಿದ್ದ ಆರೋಪಿಯನ್ನು ಸಂಜಯ್‌ನಗರ ಪೊಲೀಸರು ಬಂಧಿಸಿದ್ದಾರೆ.ವಾಸುದೇವ್‌ (34) ಬಂಧಿತ. ಈತನಿಂದ 3.50 ಲಕ್ಷ ಮೌಲ್ಯದ 21 ಟಿವಿಗಳನ್ನು ವಶಕ್ಕೆ ಪಡೆಯಲಾಗಿದೆ.

ಮಡಿಕೇರಿಯವನಾದ ಆರೋಪಿ ಪೀಣ್ಯ ದಾಸರಹಳ್ಳಿಯಲ್ಲಿ ಬಾಡಿಗೆ ಮನೆಯಲ್ಲಿ ನೆಲೆಸಿದ್ದಾನೆ. ಮನೆಕಳವು, ಟಿವಿ ಕಳ್ಳತನ ಮಾಡುವುದನ್ನು ಕಳೆದ ಐದು ವರ್ಷಗಳಿಂದ ಕಸುಬನ್ನಾಗಿ ಮಾಡಿಕೊಂಡಿದ್ದು, ಶಿವಮೊಗ್ಗ, ಹೊಸೂರು, ಚಿಕ್ಕಮಗಳೂರು ಸೇರಿದಂತೆ ನಗರದ ಇತರೆ ಠಾಣೆಗಳಲ್ಲೂ ಈತನ ಮೇಲೆ ಲಾಡ್ಜ್ಗಳಿಂದ ಎಲ್‌ಇಡಿ ಟಿವಿಗಳನ್ನು ಕಳ್ಳತನ ಮಾಡಿರುವ ಪ್ರಕರಣ ದಾಖಲಾಗಿದೆ.

ಪ್ರವಾಸಿಗನಂತೆ ಲಾಡ್ಜ್ಗಳಿಗೆ ಹೋಗುತ್ತಿದ್ದ ವಾಸುದೇವ್‌ ನಕಲಿ ದಾಖಲೆಗಳನ್ನು ನೀಡಿ ಕೊಠಡಿಗಳನ್ನು ಬಾಡಿಗೆಗೆ ಪಡೆಯುತ್ತಿದ್ದ. ದೊಡ್ಡ ಬ್ಯಾಗಿನಲ್ಲಿ ಬಟ್ಟೆ ಗಳನ್ನು ತುಂಬಿಕೊಂಡು ಹೋಗಿ ಕೊಠಡಿಯಲ್ಲಿರುವ ಟಿವಿ ಬಿಚ್ಚಿ ಬ್ಯಾಗಿನಲ್ಲಿಟ್ಟುಕೊಂಡು ಲಾಡ್ಜ್ನ ಸಿಬ್ಬಂದಿ ಎದುರಲ್ಲಿಯೆ ಅನುಮಾನ ಬಾರದಂತೆ ಟಿವಿಗಳನ್ನು ಕದ್ದು ತರುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಸಾಲ ತೀರಿಸುವ ಸಲುವಾಗಿ ಕಳ್ಳತನ ಮಾಡಿರುವುದಾಗಿ ಪೊಲೀಸರ ವಿಚಾರಣೆ ವೇಳೆ ಬಾಯಿ ಬಿಟ್ಟಿದ್ದು, ಇದಕ್ಕಾಗಿಯೇ ನಕಲಿ ಚುನಾವಣ ಗುರುತಿನ ಚೀಟಿ, ನಕಲಿ ಐಡಿ ಕಾರ್ಡ್‌, ನಕಲಿ ಮೊಬೈಲ್‌ ನಂಬರ್‌ಗಳನ್ನು ಕೊಟ್ಟು ಲಾಡ್ಜ್ಗಳಲ್ಲಿ ರೂಮ್‌ ಮಾಡಿಕೊಳ್ಳುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಇತ್ತೀಚೆಗಷ್ಟೇ ಕಳ್ಳತನ ಮಾಡಿ ಎಲ್‌ಇಡಿ ಟಿವಿಗಳನ್ನು ಶೇಖರಣೆ ಮಾಡಿಟ್ಟಿದ್ದ.ಹಣ ಬೇಕಾದ ಹಿನ್ನೆಲೆಯಲ್ಲಿ ಸಂಜಯ್‌ನಗರ ಠಾಣಾ ವ್ಯಾಪ್ತಿಯಲ್ಲಿರುವ ಟಿವಿ ಅಂಗಡಿಗೆ 6 ಟಿವಿಗಳನ್ನು ಮಾರಾಟ ಮಾಡಿ ಹೋಗಿದ್ದ ಈ ಹಿನ್ನೆಲೆ ಪೊಲೀಸರು ಈತನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.