ಆಧಾರ್‌-ಓಟರ್‌ ಕಾರ್ಡ್‌ ಲಿಂಕ್‌: ಸುಪ್ರೀಂನಿಂದ ಅರ್ಜಿ ವಿಚಾರಣೆ

Team Udayavani, Apr 20, 2018, 7:31 PM IST

ಹೊಸದಿಲ್ಲಿ : ಆಧಾರ್‌ ಕಾರ್ಡಿನ ಸಾಂವಿಧಾನಿಕ ಸಿಂಧುತ್ವವನ್ನು ತೀರ್ಮಾನಿಸಿದ ಬಳಿಕ ತಾನು ಆಧಾರ್‌ ಕಾರ್ಡನ್ನು ಮತದಾರರ ಗುರುತು ಕಾರ್ಡ್‌ ಮತ್ತು ಸ್ಥಿರಾಸ್ತಿ ದಾಖಲೆಪತ್ರಗಳೊಂದಿಗೆ ಜೋಡಿಸುವ ಬಗ್ಗೆ ತೀರ್ಮಾನಿಸುವುದಾಗಿ ಸುಪ್ರೀಂ ಕೋರ್ಟ್‌ ಇಂದು ಶುಕ್ರವಾರ ಹೇಳಿದೆ.

1950ರ ಜನತಾ ಪ್ರಾತಿನಿಧ್ಯ ಕಾಯಿದೆಯ ಸೆ.17 ಮತ್ತು 18ರ ಪ್ರಕಾರ ಗರಿಷ್ಠ ಸಂಖ್ಯೆಯ ಅರ್ಹ ಮತದಾರರು ಮತದಾನದಲ್ಲಿ  ಪಾಲ್ಗೊಳ್ಳುವಂತೆ ಮಾಡಲು, ಫೇಕ್‌, ಬೋಗಸ್‌ ಮತ್ತು ಡುಪ್ಲಿಕೇಟ್‌ ಓಟಿಂಗ್‌ ತಡೆಯಲು ಆಧಾರ್‌ ಕಾರ್ಡನ್ನು ಮತದಾರರ ಗುರುತು ಕಾರ್ಡ್‌ ನೊಂದಿಗೆ ಜೋಡಿಸುವ ಅಗತ್ಯವಿದ್ದು ಈ ಬಗ್ಗೆ  ಭಾರತದ ಚುನಾವಣಾ ಆಯೋಗಕ್ಕೆ ಸೂಕ್ತ ನಿರ್ದೇಶ ನೀಡುವಂತೆ ಬಿಜೆಪಿ ನಾಯಕ ಅಶ್ವಿ‌ನಿ ಕುಮಾರ್‌ ಉಪಾಧ್ಯಾಯ ಅವರು ಸಲ್ಲಿಸಿದ್ದ  ಸಾರ್ವಜನಿಕ ಹಿತಾಸಕ್ತಿ  ಅರ್ಜಿ ಮೇಲಿನ ವಿಚಾರಣೆಯ ವೇಳೆ ಸುಪ್ರೀಂ ಕೋರ್ಟ್‌ ಈ ವಿಷಯವನ್ನು ತಿಳಿಸಿತು.