CONNECT WITH US  

ಭಾರತೀಯ ಸೇನೆಗಿಂದು ಕೆ9 ವಜ್ರ, ಹೊವಿಟ್ಜರ್‌ ತೋಪು ಸೇರ್ಪಡೆ

ಹೊಸದಿಲ್ಲಿ : ಭಾರತೀಯ ಸೇನೆ ಇಂದು ಶುಕ್ರವಾರ ಎರಡು ಅತ್ಯಾಧುನಿಕ ಗನ್‌ ಸಿಸ್ಟಮ್‌ ಗಳನ್ನು ತನ್ನ ಶಸ್ತ್ರಾಗಾರಕ್ಕೆ ಸೇರಿಸಿಕೊಳ್ಳಲಿದೆ. ಅವೆಂದರೆ ಕೆ9 ವಜ್ರ ಮತ್ತು ಎಂ 777 ಹೊವಿಟ್ಜರ್‌ ತೋಪು. 

ಈ ಎರಡು ಅತ್ಯಾಧುನಿಕ ತೋಪುಗಳನ್ನು ಭಾರತೀಯ ಸೇನೆಗೆ ಸೇರಿಸಿಕೊಳ್ಳುವ ಸಲುವಾಗಿ ಮಹಾರಾಷ್ಟ್ರದ ದೇವಲಾಲಿಯಲ್ಲಿ ಕಾರ್ಯಕ್ರಮವೊಂದು ನಡೆಯಲಿದೆ. 

ಕೇಂದ್ರ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌, ಸೇನಾ ಮುಖ್ಯಸ್ಥ ಜನರಲ್‌ ಬಿಪಿನ್‌ ರಾವತ್‌ ಮತ್ತು ಕೇಂದ್ರ ಸಹಾಯಕ ಸಚಿವ ಸುಭಾಷ್‌ ಭಾಮರೆ ಮೊದಲಾದವರು ಭಾಗವಹಿಸಲಿದ್ದಾರೆ. 

ಈ ವಿಷಯವನ್ನು ತಿಳಿಸಿರುವ ರಕ್ಷಣಾ ಸಚಿವಾಲಯ, ಈ ಅತ್ಯಾಧುನಿಕ ಲಘು ತೋಪುಗಳನ್ನು ಹೆಲಿಕಾಪ್ಟರ್‌ ಮೂಲಕ ಪರ್ವತ ಪ್ರದೇಶಗಳಲ್ಲೂ  ಎತ್ತೂಯ್ಯಬಹುದಾಗಿದೆ ಎಂದು ತಿಳಿಸಿದೆ. ಪರ್ವತ ಪ್ರದೇಶಗಳಲ್ಲಿ ಶತ್ರು ಸೇನೆಯನ್ನು ಎದುರಿಸುವುದಕ್ಕೆ ಈ ತೋಪುಗಳು ತುಂಬ ಪರಿಣಾಮಕಾರಿಯೂ ಸಹಕಾರಿಯೂ ಆಗಲಿವೆ. 

ಲಘು ಭಾರದ 145 ಹೊವಿಟ್ಜರ್‌ ಎಂ-777 ತೋಪುಗಳನ್ನು ಪೂರೈಸುವ ಸಂಬಂಧ ಅಮೆರಕದ ಜತೆಗೆ ಈಗಾಗಲೇ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಈ ಪೈಕಿ 25 ತೋಪುಗಳನ್ನು ಸಮರ ಸನ್ನದ್ಧ ಸ್ಥಿತಿಯಲ್ಲಿ ಭಾರತಕ್ಕೆ ತರಲಾಗುವುದು.

ಉಳಿದ 125 ತೋಪುಗಳನ್ನು ಮಹಿಂದ್ರಾ ಡಿಫೆನ್ಸ್‌ ನೆರವಿನಲ್ಲಿ ಭಾರತದಲ್ಲೇ ನಿರ್ಮಿಸಲಾಗುವುದು. 2019ರ ಮಾರ್ಚ್‌ ವೇಳೆಗೆ ತೋಪುಗಳ ಪೂರೈಕೆ ಆರಂಭವಾಗುವುದನ್ನು ನಿರೀಕ್ಷಿಸಲಾಗಿದೆ ಎಂದು ರಕ್ಷಣಾ ಸಚಿವಾಲಯ ಹೇಳಿದೆ. 

Trending videos

Back to Top