ಒಬ್ಬೊಬ್ಬರ ಬಳಿ ಮೈತ್ರಿ ಸರ್ಕಾರದ ಸ್ಟೇರಿಂಗ್,ಬ್ರೇಕ್: ಸಚಿವ ರೂಪಾಲಾ
Team Udayavani, Feb 24, 2019, 1:49 AM IST
ವಿಜಯಪುರ: ಕರ್ನಾಟಕದಲ್ಲಿ ಜೆಡಿಎಸ್-ಕಾಂಗ್ರೆಸ್ ಮೈತ್ರಿ ಸರ್ಕಾರ ತ್ರಿಚಕ್ರ ವಾಹನದಂತಿದೆ. ಅದರ ಚಾಲನೆ ಮಾಡುವ ಸ್ಟೇರಿಂಗ್ ಒಬ್ಬರ ಬಳಿ, ಬ್ರೇಕ್ ಮತ್ತೂಬ್ಬರ ಬಳಿ ಇದೆ. ಇಂಥ ಸ್ಥಿತಿಯಲ್ಲಿ ಈ ಸರ್ಕಾರ ನಡೆಸುವುದು ಕಷ್ಟವಾಗಿದ್ದು, ಸಿಎಂ ಹೆಸರಿಗೆ ಮಾತ್ರ ಅಧಿಕಾರದಲ್ಲಿದ್ದಾರೆ ಎಂದು ಕೇಂದ್ರ ಕೃಷಿ ಸಚಿವ ಪುರಷೋತ್ತಮ ರೂಪಾಲಾ ಆರೋಪಿಸಿದರು.
ವಿಜಯಪುರ-ಬಾಗಲಕೋಟೆ ಲೋಕಸಭಾ ಕ್ಷೇತ್ರದ ಮೋದಿ ವಿಜಯ ಸಂಕಲ್ಪ ಯಾತ್ರೆ ಹಾಗೂ ಶಕ್ತಿ ಕೇಂದ್ರ ಸಮಾವೇಶಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಮೈತ್ರಿ ಸರ್ಕಾರಕ್ಕೆ ಸ್ವತಂತ್ರ ಶಕ್ತಿ ಇಲ್ಲ. ಇದರ ಒಂದೊಂದು ಭಾಗವೂ ಒಬ್ಬೊಬ್ಬರ ಬಳಿ ಇವೆ. ಸ್ಟೇರಿಂಗ್ ಯಾರೋ ತಿರುಗಿಸಿದರೆ, ಇನ್ಯಾರೋ
ಬ್ರೇಕ್ ಹಾಕುತ್ತಾರೆ. ಮತ್ಯಾರೋ ಗೇರ್ ಎಳೆಯುತ್ತಾರೆ, ಮತ್ತೂಬ್ಬರು ಹಾರ್ನ್ ಬಾರಿಸುತ್ತಾರೆ. ಮೈತ್ರಿ ಸರ್ಕಾರದಲ್ಲಿ ಆಡಳಿತ ಸಂಪೂರ್ಣ ಹಾಳಾಗಿದೆ ಎಂದರು.