CONNECT WITH US  

ಕಡಬ: ಶೈಕ್ಷಣಿಕ ಅಗತ್ಯ ಪೂರೈಸಲು ಡಿಗ್ರಿ ಕಾಲೇಜು ಬೇಕೇ ಬೇಕು

ಸರಕಾರಿ ಪದವಿ ಕಾಲೇಜಿಗಾಗಿ ಕಡಬದಲ್ಲಿ ಕಾದಿರಿಸಲಾಗಿರುವ ಜಮೀನು.

ಕಡಬ: ಹೊಸ ತಾಲೂಕಿನ ಸಂಭ್ರಮದಲ್ಲೇನೊ ಜನರಿದ್ದಾರೆ. ಆದರೆ ಆಗಬೇಕಾದ ಅಭಿವೃದ್ಧಿಯ ಪಟ್ಟಿ ಹಿಡಿದು ಹೊರಟರೆ ಸಾಲು ಸಾಲೇ ಕಣ್ಣಿಗೆ ಬೀಳುತ್ತದೆ. ದೊಡ್ಡ ಆಸ್ಪತ್ರೆ ಬೇಕೆಂಬ ಬೇಡಿಕೆ ಇದ್ದೇ ಇದೆ. ಇದರೊಂದಿಗೆ ಶೈಕ್ಷಣಿಕವಾಗಿಯೂ ಮತ್ತಷ್ಟು ಸೌಲಭ್ಯಗಳು ಬೇಕಾಗಿವೆ. ಸರಕಾರಿ ಪ.ಪೂ. ಕಾಲೇಜು ಬಿಟ್ಟರೆ ಪದವಿ ಕಾಲೇಜು ಹಾಗೂ ವೃತ್ತಿಪರ ತರಬೇತಿ ಕೋರ್ಸ್‌ಗಳ ಕಾಲೇಜುಗಳು ಆರಂಭವಾಗಬೇಕಿವೆ. ಸುತ್ತಲಿನ ವಿವಿಧ ಪ.ಪೂ. ಕಾಲೇಜುಗಳಿಂದ ವರ್ಷಂಪ್ರತಿ ಸಾವಿರಾರು ವಿದ್ಯಾರ್ಥಿಗಳು ವ್ಯಾಸಂಗ ಮುಗಿಸಿ ಪದವಿ ಶಿಕ್ಷಣಕ್ಕಾಗಿ ದೂರದ ಸುಬ್ರಹ್ಮಣ್ಯ ಅಥವಾ ಉಪ್ಪಿನಂಗಡಿಗೆ ಹೋಗಬೇಕಿದೆ. ಕಡಬದಲ್ಲಿ ಪದವಿ ಕಾಲೇಜು ಆಗಬೇಕು ಎನ್ನುವ ಬೇಡಿಕೆಗೆ ಇನ್ನೂ ಮಾನ್ಯತೆ ಸಿಕ್ಕಿಲ್ಲ. ಪದವಿ ಕಾಲೇಜು ಹೋರಾಟ ಸಮಿತಿ ಮೂಲಕ ಊರ ಪ್ರಮುಖರು ವಿಜಯ ಕುಮಾರ್‌ ರೈ ಕರ್ಮಾಯಿ ನೇತೃತ್ವದಲ್ಲಿ ಕಾಲೇಜು ಮಂಜೂರಾತಿಗಾಗಿ ಪ್ರಯತ್ನ ನಡೆಸುತ್ತಿದ್ದಾರೆ.

ಐದು ಎಕ್ರೆ ಜಾಗ ಗಡಿ ಗುರುತು
ಕಡಬ ಸ. ಪ್ರೌಢಶಾಲೆಯ 14.5 ಎಕ್ರೆಯಲ್ಲಿ  5 ಎಕ್ರೆ ಜಾಗವನ್ನು ಸರಕಾರಿ ಪ್ರಥಮ ದರ್ಜೆ ಕಾಲೇಜು ಸ್ಥಾಪನೆಗೆ ಜಿಲ್ಲಾಧಿಕಾರಿ ಕಾದಿರಿಸಿ ಸಹಾಯಕ ಕಮಿಷನರ್‌ಗೆ ಸೂಚಿಸಿದ ಹಿನ್ನೆಲೆಯಲ್ಲಿ ಗಡಿ ಗುರುತು ಮಾಡಲಾಗಿದೆ. ಆರಂಭದಲ್ಲಿ ಖಾಸಗಿ ಕಟ್ಟಡದಲ್ಲಿ ಕಾಲೇಜು ಆರಂಭಿಸಿ ಸರಕಾರಿ ಜಮೀನಿನಲ್ಲಿ ಕಟ್ಟಡ ನಿರ್ಮಾಣವಾದ ಬಳಿಕ ಸ್ಥಳಾಂತರಿಸಬಹುದು ಎನ್ನುವ ಸಲಹೆ ಸಮಿತಿಯದ್ದು. ಪದವಿ ಕಾಲೇಜಿನೊಂದಿಗೆ ವೃತ್ತಿಪರ ಶಿಕ್ಷಣ ಸಂಸ್ಥೆ ಮತ್ತು ವೃತ್ತಿಪರ ಶಿಕ್ಷಣ ಕೋರ್ಸ್‌ಗಳನ್ನೂ ಆರಂಭಿಸಿದಲ್ಲಿ ಗ್ರಾಮೀಣ ಭಾಗದ ವಿದ್ಯಾರ್ಥಿಗಳಿಗೆ ಅನುಕೂಲವಾಗುತ್ತದೆ ಎನ್ನುವುದು ಸಾರ್ವಜನಿಕರ ಆಗ್ರಹ.

ಮೂಲ ಸೌಲಭ್ಯಗಳಿಲ್ಲ
25 ವರ್ಷಗಳ ಹಿಂದೆ ಆರಂಭವಾದ ಸರಕಾರಿ ಪ.ಪೂ. ಕಾಲೇಜಿನಲ್ಲೂ ಮೂಲ ಸೌಕರ್ಯಗಳಿಲ್ಲ. 2 ವರ್ಷಗಳ ಹಿಂದೆ 2 ತರಗತಿ ಕೊಠಡಿಗಳು ನಿರ್ಮಾಣವಾಗಿವೆ. ಉಳಿದಂತೆ ಶೌಚಾಲಯದಿಂದ ಹಿಡಿದು ತರಗತಿ ಕೊಠಡಿಯ ತನಕ ಹತ್ತಿರದ ಪ್ರೌಢಶಾಲೆಯನ್ನೇ ಅವಲಂಬಿಸಬೇಕಾಗಿದೆ.

ಪತ್ಯೇಕ ವಲಯ
ತಾಲೂಕು ಅನುಷ್ಠಾನ ವಾಗುವ ಹಂತದಲ್ಲಿ ಸರಕಾರಿ ಪದವಿ ಕಾಲೇಜು ಲಭ್ಯವಾಗಲಿದೆ. ವೃತ್ತಿಪರ ತರಬೇತಿ ಕೋರ್ಸ್‌ಗಳ ಕಾಲೇಜಿಗೂ ಪ್ರಯತ್ನಿಸಬಹುದು. ಕಡಬವನ್ನು ಕೇಂದ್ರವಾಗಿರಿಸಿಕೊಂಡು ಪ್ರತ್ಯೇಕ ಶೈಕ್ಷಣಿಕ ವಲಯ ಆರಂಭಿಸಲು ಈಗಾಗಲೇ ಪ್ರಕ್ರಿಯೆ ಆರಂಭವಾಗಿದೆ. ಪ್ರತ್ಯೇಕ ಶೈಕ್ಷಣಿಕ ವಲಯವಾಗಿ ರೂಪುಗೊಂಡಾಗ ಬಿಇಒ ಕಚೇರಿ ತೆರೆಯಲಾಗುತ್ತದೆ. ಈ ನಿಟ್ಟಿನಲ್ಲಿ ಸರಕಾರಕ್ಕೆ ವರದಿ ಸಲ್ಲಿಸಲಾಗಿದೆ.
- ಶಶಿಧರ ಜಿ.ಎಸ್‌., ಬಿಇಒ

- ನಾಗರಾಜ್‌ ಎನ್‌. ಕೆ. ಕಡಬ

ಇಂದು ಹೆಚ್ಚು ಓದಿದ್ದು

Trending videos

Back to Top