ಅಪಹರಿಸಲ್ಪಟ್ಟು 8 ಮಂದಿಯಿಂದ ರೇಪಾದ ಹುಡುಗಿ ಆತ್ಮಹತ್ಯೆ
Team Udayavani, May 3, 2018, 6:06 PM IST
ಚಂಡೀಗಢ : ಅಪಹರಣಕ್ಕೆ ಗುರಿಯಾಗಿ ಎಂಟು ಮಂದಿಯಿಂದ ಅತ್ಯಾಚಾರಕ್ಕೆ ಒಳಗಾಗಿದ್ದ ಹರಿಯಾಣದ ಮೇವಾತ್ ನ ಹದಿನೇಳು ವರ್ಷ ಪ್ರಾಯದ ಹುಡುಗಿಯು ಆತ್ಮಹತ್ಯೆ ಮಾಡಿಕೊಂಡಿರುವುದು ವರದಿಯಾಗಿದೆ.
ನೂಹ್ ಜಿಲ್ಲೆಯ ನಿರ್ಜನ ಪ್ರದೇಶದಲ್ಲಿ ಅತ್ಯಾಚಾರಕ್ಕೆ ಗುರಿಯಾಗಿದ್ದ ಹುಡುಗಿಯು ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದುಕೊಂಡಿದ್ದಳು. ಹೆತ್ತವರು ಆಕೆಯನ್ನು ಪತ್ತೆಹಚ್ಚಿ ಮನೆಗೆ ತಂದಿದ್ದರು. ಆದರೆ ಮರುದಿನವೇ ಆಕೆ ಆತ್ಮಹತ್ಯೆ ಮಾಡಿಕೊಂಡಳು.
ಕಳೆದ ಸೋಮವಾರ ಹುಡುಗಿಯು ಮನೆಯಲ್ಲಿ ಒಬ್ಬಳೇ ಇದ್ದಾಗ ಬೈಕಿನಲ್ಲಿ ಬಂದಿದ್ದ ಇಬ್ಬರು ಆಕೆಯನ್ನು ಕಾರಿನಲ್ಲಿ ಅಪಹರಿಸಿದ್ದರು ಎಂದು ಹುಡುಗಿಯ ತಂದೆ ಪೊಲೀಸರಿಗೆ ಕೊಟ್ಟಿರುವ ದೂರಿನಲ್ಲಿ ಹೇಳಿದ್ದಾರೆ.
ಹುಡುಗಿಯು ತನ್ನ ಅಪಹರಣಕಾರ-ಅತ್ಯಾಚಾರಿಗಳನ್ನು ಗುರುತಿಸಿದ್ದು ಇವರು ಕೆಲ ಸಮಯದಿಂದ ತನ್ನ ಬೆನ್ನಿಗೆ ಬಿದ್ದು ಪೀಡಿಸುತ್ತಿದ್ದರು ಎಂದು ಆಕೆ ಈ ಮೊದಲೇ ಮನೆಯವರಲ್ಲಿ ಹೇಳಿದ್ದಳು.
ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ತಲೆಮರೆಸಿಕೊಂಡಿರುವ ಅತ್ಯಾಚಾರಿಗಳನ್ನು ಶೋಧಿಸುತ್ತಿದ್ದಾರೆ ಎಂದು ಮೇವಾತ್ನ ಎಸ್ಪಿ ನಝನೀನ್ ಭಾಸಿನ್ ತಿಳಿಸಿದ್ದಾರೆ.