ಹಸುರು ತೆರಿಗೆಗೆ ಅನುಮೋದನೆ
Team Udayavani, Jan 25, 2021, 6:00 AM IST
ಹೊಸದಿಲ್ಲಿ: ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಸೋಮವಾರ ಕೆಲವು ವರ್ಗದ ವಾಹನಗಳ ಮೇಲೆ “ಹಸುರು ತೆರಿಗೆ’ ವಿಧಿಸುವ ಪ್ರಸ್ತಾವಕ್ಕೆ ಅನುಮೋದನೆ ನೀಡಿದ್ದಾರೆ. ಇದು ಹಳೆಯ, ಮಾಲಿನ್ಯಕಾರಿ ವಾಹನಗಳ ಬಳಕೆಯನ್ನು ಕಡಿಮೆ ಮಾಡುವ ಕ್ರಮದ ಭಾಗ.ಸರಕಾರಿ ಇಲಾಖೆಗಳು ಮತ್ತು ಸಾರ್ವಜನಿಕ ರಂಗದ ಸಂಸ್ಥೆಗಳು ಹೊಂದಿರುವ 15 ವರ್ಷಗಳಿಗಿಂತ ಹಳೆಯ ವಾಹನ ನೋಂದಾವಣೆ ಮತ್ತು ಬಳಕೆಯಿಂದ ಹಿಂದೆಗೆತ ನೀತಿಗೂ ಗಡ್ಕರಿ ಅನುಮೋದನೆ ನೀಡಿದ್ದಾರೆ. ಈ ನೀತಿ 2022ರ ಎ. 1ರಿಂದ ಜಾರಿಗೆ ಬರಲಿದೆ.
ಪ್ರಸ್ತಾವಿತ ನೀತಿಯ ಪ್ರಕಾರ, ಸಾರಿಗೆ ಅಥವಾ ವಾಣಿಜ್ಯ ಉದ್ದೇಶದ ವಾಹನವು 8 ವರ್ಷಗಳಿಗಿಂತ ಹಳೆಯದಾಗಿದ್ದರೆ ಅವುಗಳ ಫಿಟ್ನೆಸ್ ಸರ್ಟಿಫಿಕೆಟ್ ನವೀಕರಣ ಸಂಬಂಧ ಹಸುರು ತೆರಿಗೆ ವಿಧಿಸಲಾಗುತ್ತದೆ. ರಸ್ತೆ ತೆರಿಗೆಯ ಶೇ. 10ರಿಂದ ಶೇ. 25ರ ವರೆಗೆ ಈ ತೆರಿಗೆ ಇರಲಿದೆ. ವೈಯಕ್ತಿಕ ವಾಹನಗಳಿಗೆ ಸಂಬಂಧಿಸಿ, 15 ವರ್ಷಗಳ ಬಳಿಕ ನೋಂದಣಿ ನವೀಕರಣ ಸಂದರ್ಭ ಈ ತೆರಿಗೆ ವಿಧಿಸಲಾಗುತ್ತದೆ.