ಬ್ರಿಡ್ಜ್ ಕೋರ್ಸ್‌ ಪ್ರಸ್ತಾಪ ಕೈಬಿಟ್ಟ ಆರೋಗ್ಯ ಇಲಾಖೆ

Team Udayavani, Mar 28, 2018, 9:40 AM IST

ನವದೆಹಲಿ: ರಾಷ್ಟ್ರೀಯ ವೈದ್ಯಕೀಯ ಆಯೋಗ ವಿಧೇಯಕದಲ್ಲಿ ಪ್ರಸ್ತಾಪಿಸಲಾಗಿದ್ದ ವಿವಾದಾತ್ಮಕ ಬ್ರಿಡ್ಜ್ ಕೋರ್ಸ್‌ ನಿಬಂಧನೆಯನ್ನು ಕೇಂದ್ರ ಆರೋಗ್ಯ ಸಚಿವಾಲಯ ಕೈಬಿಟ್ಟಿದೆ. ಆಯುರ್ವೇದ (ಆಯುಷ್‌) ವೈದ್ಯರು ಬ್ರಿಡ್ಜ್ ಕೋರ್ಸ್‌ ಮಾಡುವ ಮೂಲಕ ಅಲೋಪಥಿಯನ್ನು ಪ್ರಾಕ್ಟೀಸ್‌ ಮಾಡಲು ಅವಕಾಶ ಕಲ್ಪಿಸುವ ಪ್ರಸ್ತಾಪವನ್ನು ವಿಧೇಯಕದಲ್ಲಿ ಸೇರಿಸಲಾಗಿತ್ತು. ದೇಶದಲ್ಲಿ ವೈದ್ಯರ ತೀವ್ರ ಕೊರತೆ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ಈ ಕ್ರಮ ಕೈಗೊಂಡಿತ್ತು. ಇದಕ್ಕೆ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ಈ ಪ್ರಸ್ತಾಪವನ್ನು ಕೈಬಿಡಲಾಗಿದೆ. ತಿದ್ದುಪಡಿಯಾಗಿರುವ ವಿಧೇಯಕವು ಬುಧವಾರ ಸಂಪುಟದಲ್ಲಿ ಚರ್ಚೆಗೆ ಬರುವ ಸಾಧ್ಯತೆಯಿದೆ. 

ಇದೇ ವೇಳೆ, ಪದವಿಪೂರ್ವ ಮತ್ತು ಸ್ನಾತಕೋತ್ತರ ಮಟ್ಟದಲ್ಲಿ ಏಕರೂಪದ ನೀಟ್‌ ಮತ್ತು ಕೌನ್ಸೆಲಿಂಗ್‌ ಪ್ರಸ್ತಾಪವನ್ನೂ ತಿದ್ದುಪಡಿ ಮಾಡಲಾಗಿದೆ. ಹೊಸ ವೈದ್ಯಕೀಯ ಕಾಲೇಜುಗಳ ಸ್ಥಾಪನೆಯ ಅಧಿಕಾರವನ್ನು ರಾಜ್ಯ ಸರ್ಕಾರಗಳಿಗೇ ನೀಡುವ ಸಂಸದೀಯ ಸಮಿತಿಯ ಶಿಫಾರಸನ್ನು ಸಚಿವಾಲಯವು ಒಪ್ಪಿಲ್ಲ.