ಅಬ್ಬಾ ಭಾರತದ ಈ ರೈಲ್ವೆ ಬ್ರಿಡ್ಜ್ ಐಫೆಲ್ ಟವರ್ ಅನ್ನೂ ಮೀರಿಸಲಿದೆ!

Team Udayavani, May 3, 2017, 6:38 PM IST

ನವದೆಹಲಿ:ಜಮ್ಮು-ಕಾಶ್ಮೀರದ ಉತ್ತರ ಭಾಗದ ಚೆನಾಬ್ ನದಿ ದಡದ ಮೇಲೆ ಅತೀ ಎತ್ತರದ ರೈಲ್ವೆ ಸೇತುವೆ ನಿರ್ಮಾಣವಾಗುತ್ತಿದ್ದು, ಇದು ಪ್ಯಾರಿಸ್ ನ ಐಫೆಲ್ ಟವರ್ ಗಿಂತಲೂ ಸುಮಾರು 35 ಮೀಟರ್ ಎತ್ತರವಿರಲಿದೆ ಎಂದು ಅಂದಾಜಿಸಲಾಗಿದೆ.  2019ಕ್ಕೆ ಸೇತುವೆ ಕಾಮಗಾರಿ ಪೂರ್ಣಗೊಳ್ಳಲಿದೆ. ಇದು ಜಗತ್ತಿನ ಅತೀ ಎತ್ತರದ ರೈಲ್ವೆ ಸೇತುವೆಯಾಗಲಿದೆ.

1.3ಕಿಲೋ ಮೀಟರ್ ಉದ್ದದ ಈ ಅದ್ಭುತ ಕಾಮಗಾರಿಯ ಸೇತುವೆ ಜಮ್ಮುವಿನ ಬಕ್ಕಾಲ್ ಮತ್ತು ಶ್ರೀನಗರದ ಕೌರಿ ಪ್ರದೇಶಕ್ಕೆ ಸಂಪರ್ಕ ಸಾಧಿಸಲಿದೆ. ಸುಮಾರು 1,100 ಕೋಟಿ ರೂಪಾಯಿ ವೆಚ್ಚದಲ್ಲಿ 35 ಮೀಟರ್ ಕಮಾನಿನಾಕಾರದಲ್ಲಿ ಸೇತುವೆ ನಿರ್ಮಾಣವಾಗುತ್ತಿದೆ ಎಂದು ಮಾಧ್ಯಮದ ವರದಿ ತಿಳಿಸಿದೆ.

ದೇಶದ ಉಳಿದೆಲ್ಲಾ ಭಾಗಗಳಿಗಿಂತಲೂ ಈ ಸೇತುವೆ ಕಾಶ್ಮೀರ ಕಣಿವೆಯನ್ನು ಸಂಪರ್ಕಿಸುತ್ತಿರುವ ಅತ್ಯಂತ ಕಠಿಣ ಮಾರ್ಗವಾಗಿದೆ. ಈ ರೈಲ್ವೆ ಸೇತುವೆ ಕಾಮಗಾರಿ ಪೂರ್ಣಗೊಂಡಲ್ಲಿ ಇದು ಚೀನಾದ ಶುಬೈ ರೈಲ್ವೆ ಸೇತುವೆಯ(275 ಮೀಟರ್) ದಾಖಲೆಯನ್ನು ಮುರಿಯಲಿದೆ.

ಚೆನಾಬ್ ನದಿಯಿಂದ ಸುಮಾರು 1,178 ಅಡಿ (ಐಫೆಲ್ ಟವರ್ ಎತ್ತರ ಅಂದಾಜು 1064 ಅಡಿ) ಎತ್ತರದಲ್ಲಿ ಈ ರೈಲ್ವೆ ಸೇತುವೆ ನಿರ್ಮಾಣವಾಗುತ್ತಿದೆ. ಇದಕ್ಕೆ ತಗಲುವ ವೆಚ್ಚ 1,100 ಕೋಟಿ, ಇದಕ್ಕೆ 24 ಸಾವಿರ ಟನ್ ಸ್ಟೀಲ್ ಉಪಯೋಗಿಸಲಾಗುತ್ತಿದೆ. ಅಷ್ಟೇ ಅಲ್ಲ ಗಾಳಿಯ ಒತ್ತಡವನ್ನು ಅಳೆಯಲು ಅತ್ಯಾಧುನಿಕ ಸೆನ್ಸಾರ್ ಉಪಕರಣ ಕೂಡಾ ಅಳವಡಿಸಲಾಗುತ್ತಿದೆ ಎಂದು ವರದಿ ವಿವರಿಸಿದೆ.