ದಿಲ್ಲಿಯ ಪ್ರಗತಿ ಮೈದಾನ್ ಮೆಟ್ರೋ ಹೆಸರು ಇನ್ಮುಂದೆ “ಸುಪ್ರೀಂಕೋರ್ಟ್ ಮೆಟ್ರೋ ಸ್ಟೇಶನ್”

Team Udayavani, Dec 31, 2019, 6:39 PM IST

ನವದೆಹಲಿ: ದಿಲ್ಲಿಯ ಜನಪ್ರಿಯ ಪ್ರಗತಿ ಮೈದಾನ್ ಮೆಟ್ರೋ ನಿಲ್ದಾಣದ ಹೆಸರನ್ನು “ಸುಪ್ರೀಂಕೋರ್ಟ್ ಮೆಟ್ರೋ ನಿಲ್ದಾಣ” ಎಂದು ಮರುನಾಮಕರಣ ಮಾಡಿರುವುದಾಗಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ನೇತೃತ್ವದ ದಿಲ್ಲಿ ಸರ್ಕಾರ ಮಂಗಳವಾರ ಘೋಷಿಸಿದೆ.

ನೂತನ ಹೆಸರು ಬದಲಾವಣೆ ಮಾಡಲು ದಿಲ್ಲಿ ಮೆಟ್ರೋ ವ್ಯವಸ್ಥೆಯಲ್ಲಿ ಒಂದು ತಿಂಗಳ ಕಾಲಾವಕಾಶ ಬೇಕಾಗಲಿದೆ ಎಂದು ತಿಳಿಸಿದೆ. ಈ ವರದಿಯನ್ನು ದಿಲ್ಲಿ ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಖಚಿತಪಡಿಸಿದ್ದು, ಹೆಸರು ಬದಲಾವಣೆಗೆ ಹಲವಾರು ಮನವಿಗಳು ಬಂದ ಹಿನ್ನೆಲೆಯಲ್ಲಿ ಸರ್ಕಾರ ಈ ನಿರ್ಧಾರ ತೆಗೆದುಕೊಂಡಿರುವುದಾಗಿ ಹೇಳಿದೆ.

ಅಲ್ಲದೇ ದ ಮುಕಾರ್ಬಾ ಚೌಕ್ ಮತ್ತು ಪ್ಲೈಓವರ್ ಹೆಸರನ್ನು ಕ್ಯಾಪ್ಟನ್ ವಿಕ್ರಮ್ ಬಾತ್ರಾ ಚೌಕ್ ಎಂದು ಮರುನಾಮಕರಣ ಮಾಡಲಾಗುವುದು ಎಂದು ಹೇಳಿದರು. ಬಾತ್ರಾ ಕಾರ್ಗಿಲ್ ಯುದ್ಧದಲ್ಲಿ ಹುತಾತ್ಮರಾಗಿದ್ದು, ಆ ಗೌರವಾರ್ಥ ಹೆಸರನ್ನು ಇಡಲು ನಿರ್ಧರಿಸಲಾಗಿದೆ ಎಂದರು.

ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ ಸಿಸೋಡಿಯಾ, ಹೆಸರು ಮರುನಾಮಕರಣ ಮತ್ತು ಮೆಟ್ರೋ ಟ್ರೈನ್ ಆಡಿಯೋ ಅನೌನ್ಸ್ ಮೆಂಟ್ ನ ಎಲ್ಲಾ ಪ್ರಕ್ರಿಯೆಗಳು ಒಂದು ತಿಂಗಳೊಳಗೆ ಮುಕ್ತಾಯಗೊಳ್ಳಲಿದೆ ಎಂದರು. ಅದೇ ರೀತಿ ಬಾದ್ರಾಪುರ್-ಮೆಹ್ರೂಲಿ ರಸ್ತೆಯ ಹೆಸರನ್ನು ಮರುನಾಮಕರಣ ಮಾಡುವುದಾಗಿ ತಿಳಿಸಿದರು.