Romanian flight; ಕೊನೆಗೂ ಮುಂಬೈ ತಲುಪಿದ ಫ್ರಾನ್ಸ್ ನಲ್ಲಿ ಬಂಧಿಯಾಗಿದ್ದ ವಿಮಾನ
Team Udayavani, Dec 26, 2023, 8:20 AM IST
ಮುಂಬೈ: ಮಾನವ ಕಳ್ಳಸಾಗಾಣಿಕೆ ಸಂಶಯ ಕಾರಣದಿಂದ ಪ್ಯಾರಿಸ್ ನಲ್ಲಿ ಬಂಧಿಯಾಗಿದ್ದ 276 ಭಾರತೀಯರಿದ್ದ ರೊಮೇನಿಯನ್ ವಿಮಾನವು ಕೊನೆಗೂ ಮುಂಬೈ ವಿಮಾನ ನಿಲ್ದಾಣ ತಲುಪಿದೆ.
ವಿಮಾನವು ತನ್ನ ಪ್ರಯಾಣವನ್ನು ಪುನರಾರಂಭಿಸಲು ಫ್ರೆಂಚ್ ಅಧಿಕಾರಿಗಳು ಅನುಮತಿಸಿದ ನಂತರ ವಿಮಾನವು ಮುಂಬೈಗೆ ಮರಳಿತು. ಇದು 300 ಪ್ರಯಾಣಿಕರನ್ನು ಹೊಂದಿತ್ತು, ಆದರೆ ಅವರಲ್ಲಿ 25 ಜನರು ಫ್ರಾನ್ಸ್ನಲ್ಲಿ ಉಳಿಯಲು ನಿರ್ಧರಿಸಿದರು.
ರೊಮೇನಿಯನ್ ಕಂಪನಿ ಲೆಜೆಂಡ್ ಏರ್ಲೈನ್ಸ್ ನಿರ್ವಹಿಸುವ ವಿಮಾನವು ಸೋಮವಾರ ಮಧ್ಯಾಹ್ನ 2:30 ರ ನಂತರ (ಸ್ಥಳೀಯ ಕಾಲಮಾನ) ಹೊರಟು ಮಂಗಳವಾರ ಬೆಳಿಗ್ಗೆ 4 ಗಂಟೆಗೆ ಮುಂಬೈ ತಲುಪಿತು.
ಸೋಮವಾರ ಬೆಳಗ್ಗೆ ವಿಮಾನ ಟೇಕ್ ಆಫ್ ಆಗುವ ನಿರೀಕ್ಷೆಯಿತ್ತು, ಆದರೆ ಕೆಲವು ಪ್ರಯಾಣಿಕರು ಭಾರತಕ್ಕೆ ಮರಳಲು ಬಯಸದ ಕಾರಣ ನಿರ್ಗಮನ ವಿಳಂಬವಾಯಿತು.
ಇದನ್ನೂ ಓದಿ:Disneyland ಮಾದರಿಯಲ್ಲಿ ಕಾಶ್ಮೀರ ಅಭಿವೃದ್ಧಿ: ಹಿರಿಯ ಐಎಎಸ್ ಅಧಿಕಾರಿ ರಾಜೇಶ್ ಪ್ರಸಾದ್
ವರದಿಗಳ ಪ್ರಕಾರ, ಇಬ್ಬರು ಅಪ್ರಾಪ್ತ ವಯಸ್ಕರು ಸೇರಿದಂತೆ 25 ಪ್ರಯಾಣಿಕರು ಆಶ್ರಯಕ್ಕಾಗಿ ಅರ್ಜಿ ಸಲ್ಲಿಸಿದ್ದರಿಂದ ಫ್ರಾನ್ಸ್ನಲ್ಲಿದ್ದಾರೆ. ನ್ಯಾಯಾಧೀಶರ ಮುಂದೆ ಹಾಜರುಪಡಿಸಲಾದ ಇತರ ಇಬ್ಬರನ್ನು ಬಿಡುಗಡೆ ಮಾಡಲಾಗಿದೆ.
ಯುನೈಟೆಡ್ ಅರಬ್ ಎಮಿರೇಟ್ಸ್ನ ದುಬೈನಿಂದ 303 ಪ್ರಯಾಣಿಕರನ್ನು ಹೊತ್ತ ನಿಕರಾಗುವಾಗೆ ಹೋಗುವ ಚಾರ್ಟರ್ ಫ್ಲೈಟ್ ಅನ್ನು ಗುರುವಾರ ಮಾನವ ಕಳ್ಳಸಾಗಣೆ ಶಂಕೆಯಿಂದ ಪ್ಯಾರಿಸ್ನಿಂದ 150 ಕಿಮೀ ಪೂರ್ವಕ್ಕೆ ವ್ಯಾಟ್ರಿ ವಿಮಾನ ನಿಲ್ದಾಣದಲ್ಲಿ ತಡೆದು ನಿಲ್ಲಿಸಲಾಗಿತ್ತು. ಪ್ರಯಾಣಿಕರಲ್ಲಿ 21 ತಿಂಗಳ ಮಗು ಮತ್ತು 11 ಅಪ್ರಾಪ್ತ ವಯಸ್ಕರು ಸೇರಿದ್ದಾರೆ.