ಮೋದಿ ಜಾಕೆಟ್‌ ಯುವಕರ ಫ್ಯಾಶನ್‌ 

Team Udayavani, Nov 5, 2018, 5:10 AM IST

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಧರಿಸುವ, ಜನಸಾಮಾನ್ಯರಲ್ಲಿ ‘ಮೋದಿ ಡ್ರೆಸ್‌’ ಎಂದೇ ಖ್ಯಾತಿ ಗಳಿಸಿರುವ ‘ಕುರ್ತಾ-ಜಾಕೆಟ್‌ ಉಡುಪು’ ಇಂದಿನ ಯುವಜನರಲ್ಲಿ ಹೊಸ ಫ್ಯಾಶನ್‌ ಟ್ರೆಂಡ್‌ ಆಗಿ ಮಾರ್ಪಟ್ಟಿದ್ದು, ದೇಶದ ಖಾದಿ ರಂಗಕ್ಕೆ ಹೊಸ ಉತ್ತೇಜನ ಕೊಟ್ಟಿದೆ. ಸೆ. 17ರಂದು ಪ್ರಧಾನಿ ಮೋದಿ ಜನ್ಮದಿನದ ಹಿನ್ನೆಲೆಯಲ್ಲಿ ಖಾದಿ ಗ್ರಾಮೋದ್ಯೋಗ ಆಯೋಗವು (ಕೆವಿಐಸಿ) ದಿಲ್ಲಿಯಲ್ಲಿರುವ ಕನ್ನಾಟ್‌ಪ್ಲೇಸ್‌ನಲ್ಲಿರುವ ತನ್ನ ಶೋರೂಂನಲ್ಲಿ ಹೊಸ ವಿನ್ಯಾಸದ “ಮೋದಿ ಕುರ್ತಾ’ ಹಾಗೂ ‘ಮೋದಿ ಜಾಕೆಟ್‌’ಗಳನ್ನು ಬಿಡುಗಡೆ ಮಾಡಿತ್ತು. ಇದು ಎಷ್ಟರ ಮಟ್ಟಿಗೆ ಯಶಸ್ವಿಯಾಗಿದೆ ಎಂದರೆ, ಅ.ನಲ್ಲಿ ಕನ್ನಾಟ್‌ಪ್ಲೇಸ್‌ ಶೋರೂಂ ಒಂದರಲ್ಲೇ 14.76 ಕೋ.ರೂ. ಮೌಲ್ಯದಷ್ಟು ಮೋದಿ ಕುರ್ತಾ-ಜಾಕೆಟ್‌ ಸೆಟ್‌ಮಾರಾಟವಾಗಿವೆ ಎಂದು ಕೆವಿಐಸಿಯ ಮುಖ್ಯಸ್ಥ ಸಕ್ಸೇನಾ ತಿಳಿಸಿದ್ದಾರೆ.

ದಿಲ್ಲಿಯಲ್ಲಿರುವ ಕೆವಿಐಸಿಯ 7 ಪ್ರಧಾನ ಮಳಿಗೆಗಳಲ್ಲಿ ದಿನವೊಂದಕ್ಕೆ ಸರಾಸರಿ 1,400 ಜತೆ “ಮೋದಿ ಕುರ್ತಾ-ಜಾಕೆಟ್‌ ಸೆಟ್‌’ ಮಾರಾಟ ವಾಗುತ್ತಿದ್ದು, ಕೋಲ್ಕತಾ, ಜೈಪುರ, ಜೋಧಪುರ, ಭೋಪಾಲ್‌, ಮುಂಬಯಿ, ಎರ್ನಾಕುಳಂನ ಕೆವಿಐಸಿಯ ಪ್ರಧಾನ ಶೋರೂಂಗಳಲ್ಲಿ ದಿನವೊಂದಕ್ಕೆ ಸರಾಸರಿ 200 ಜತೆ ಮೋದಿ ಡ್ರೆಸ್‌ ಮಾರಾಟವಾಗುತ್ತಿವೆ. ಇದು ಈ ಉಡುಪಿನ ಬಗ್ಗೆ ಹೆಚ್ಚುತ್ತಿರುವ ಜನಪ್ರಿಯತೆಗೆ ಸಾಕ್ಷಿ ಎಂದು ಸೆಕ್ಸೇನಾ ಅಭಿಪ್ರಾಯ ಪಟ್ಟಿದ್ದಾರೆ.

ಯುವ ಜನರಲ್ಲಿ ಹೇಗಿದೆ ಟ್ರೆಂಡ್‌?
ಆನ್‌ಲೈನ್‌ನಲ್ಲೂ ಮೋದಿ ಕುರ್ತಾ ಭರಾಟೆ ಜೋರಾಗಿಯೇ ಇದೆ. ಇ-ಮಾರುಕಟ್ಟೆ ಜಾಲತಾಣಗಳಲ್ಲಿ ಮೋದಿ ಕುರ್ತಾ, ಜಾಕೆಟ್‌ಗಳನ್ನು ಜನರು ಕೊಳ್ಳುತ್ತಿದ್ದು, ಸಿದ್ಧ ಉಡುಪುಗಳ ಬದಲಿಗೆ ಹೊಲಿಸಿ ಕೊಂಡು ಹಾಕಿಕೊಳ್ಳಲು ಇಷ್ಟಪಡುವ ಜನರು ಮೋದಿ ಜ್ಯಾಕೆಟ್‌ಗಳ ಡಿಸೈನ್‌ ಹೇಗಿರುತ್ತೆ ಎಂದು ತಿಳಿಯಲು ಗೂಗಲ್‌ ಮುಂತಾದ ಅಂತರ್ಜಾಲ ಸರ್ಚ್‌ ಎಂಜಿನ್‌ಗಳ ಮೊರೆ ಹೋಗುತ್ತಿದ್ದಾರೆ.

ಕುರ್ತಾ, ಪೈಜಾಮಗಳ ಮೇಲಷ್ಟೇ ಅಲ್ಲದೆ ಮೋದಿ ಜಾಕೆಟ್‌, ಫಾರ್ಮಲ್‌ ಬಟ್ಟೆಗಳಿಗೂ ಹೊಸ ಲುಕ್‌ ಕೊಡುವುದರಿಂದ ಯುವ ಜನರಲ್ಲಿ ಈ ಜಾಕೆಟ್‌ಗಳು ಹೊಸ ಫ್ಯಾಶನ್‌ ಟ್ರೆಂಡ್‌ ಆಗಿ ಮಾರ್ಪಟ್ಟಿದೆ. ಕಪ್ಪು ಬಣ್ಣದ ಜಾಕೆಟ್‌ ಹೆಚ್ಚು ಬಿಕರಿಯಾಗುತ್ತಿವೆ. ಪ್ರಿಂಟೆಡ್‌ ಜಾಕೆಟ್‌ಗಳನ್ನೂ ಯುವಜನರು ಇಷ್ಟಪಡುತ್ತಿದ್ದಾರೆ.