ತಾಯಿ ನಿರ್ಲಕ್ಷ್ಯಕ್ಕೆ ಮಕ್ಕಳ ಸಾವು

Team Udayavani, Feb 26, 2017, 3:50 AM IST

ನವದೆಹಲಿ: ಮೂರು ವರ್ಷದ ಅವಳಿ ಮಕ್ಕಳನ್ನು ಮನೆಯಲ್ಲಿ ಬಿಟ್ಟು, ಸಾಬೂನು ತರಲೆಂದು ಹೋಗಿ ಮರಳುವಷ್ಟರಲ್ಲಿ ಮಗು ನೀರು ತುಂಬಿಕೊಂಡಿದ್ದ ವಾಷಿಂಗ್‌ಮಷಿನ್‌ಗೆ ಇಳಿದು ಸಾವನ್ನಪ್ಪಿರುವ ಘಟನೆ ದೆಹಲಿಯ ರೋಹಿಣಿಯಲ್ಲಿ ಶನಿವಾರ ನಡೆದಿದೆ.

ಘಟನೆಯ ಬಗ್ಗೆ ಪೊಲೀಸರು ತಿಳಿಸಿರುವ ಮಾಹಿತಿ ಪ್ರಕಾರ, “ತಾಯಿ ಬಟ್ಟೆ ಒಗೆಯಲೆಂದು ವಾಷಿಂಗ್‌ಮಷಿನ್‌ಗೆ ನೀರು ತುಂಬಿಸಿದ್ದಳು. ವಾಷಿಂಗ್‌ಮಷಿನ್‌ಗೆ ಬಟ್ಟೆಗಳನ್ನು ಹಾಕುವುದಕ್ಕೂ ಮೊದಲು ಮಾರ್ಜಾಲ ಇಲ್ಲದ ಕಾರಣ ಮನೆಯಾಚೆ ಇರುವ ಅಂಗಡಿಯಿಂದ ತರಲೆಂದು ಅವಳಿ ಮಕ್ಕಳನ್ನು ಅಲ್ಲಿಯೇ ಬಿಟ್ಟು, ಬಾಗಿಲು ಹಾಕಿಕೊಂಡು ಹೋಗಿದ್ದಾಳೆ. ವಾಪಸ್‌ ಆಗಲು ಕೇವಲ 6 ನಿಮಿಷವಾಗಿದ್ದು, ಅಷ್ಟರಲ್ಲಿ ಮಕ್ಕಳು ನೀರು ತುಂಬಿಕೊಂಡಿದ್ದ ವಾಷಿಂಗ್‌ಮಷಿನ್‌ಗೆ ಇಳಿದು ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಘಟನೆ ವಿವರ: ಬಟ್ಟೆ ಒಗೆಯಲು ತಾಯಿ ಸಿದ್ದತೆ ಮಾಡಿಕೊಳ್ಳುವಾಗ 3 ವರ್ಷದ ಅವಳಿ ಮಕ್ಕಳು ಅಲ್ಲಿಯೇ ಆಟವಾಡಿಕೊಂಡಿದ್ದರು. ಆದರೆ ಮನೆಯಲ್ಲಿ ಮಾರ್ಜಕ ತಂದಿದ್ದು ಇರಲಿಲ್ಲ. ಹೀಗಾಗಿ ತಾಯಿ ಮಕ್ಕಳನ್ನು ಅಲ್ಲಿಯೇ ಬಿಟ್ಟು ಮಾರ್ಜಕ ತರಲು ಅಂಗಡಿಗೆ ತೆರಳಿದ್ದಳು. ತಾಯಿ ಕೇವಲ 6 ನಿಮಿಷದ ಅಂತರದಲ್ಲಿ ಮನೆಗೆ ವಾಪಸ್‌ ಆದಾಗ ಮಕ್ಕಳಾದ ನಿಶಾಂತ್‌ ಮತ್ತು ನಕ್ಷ್ಯ ಕಾಣಿಸಲಿಲ್ಲ. ಗಾಬರಿಯಾದ ತಾಯಿ ಮನೆಯೆಲ್ಲ ಹುಡುಕಾಡಿದರೂ ಕಾಣಿಸಲಿಲ್ಲ. ವಾಷಿಂಗ್‌ ಮಷಿನ್‌ಗೆ ಇಳಿದಿರಬಹುದೆಂದೂ ಊಹಿಸಲಿಲ್ಲ. ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿದ್ದಾಳೆ. 20 ನಿಮಿಷಗಳಲ್ಲಿ ಪೊಲೀಸರು ಸ್ಥಳಕ್ಕೆ ಆಗಮಿಸಿ, ಮನೆಯನ್ನೆಲ್ಲ ಹುಡುಕಾಡಿಧಿದ್ದಾರೆ. ಅಷ್ಟರಲ್ಲಿ ಅವಳಿ ಮಕ್ಕಳ ತಂದೆಯೂ ಮನೆಗೆ ಆಗಮಿಸಿ ಹುಡುಕಾಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.