9 ಸೆಕೆಂಡಲ್ಲಿ ನೆಲಸಮವಾಗಲಿದೆ ಅವಳಿ ಟವರ್‌!

4 ಟನ್‌ ಸ್ಫೋಟಕ ಬಳಸಿ 40 ಮಹಡಿಯ ಕಟ್ಟಡ ಧ್ವಂಸಕ್ಕೆ ನಿರ್ಧಾರ

Team Udayavani, Mar 16, 2022, 7:40 AM IST

ನೋಯ್ಡಾ:2,500 ಕೆಜಿ ಸ್ಫೋಟಕ, 9 ಸೆಕೆಂಡು, 40 ಅಂತಸ್ತಿನ ಅವಳಿ ಕಟ್ಟಡ ನೆಲಸಮ…

ಉತ್ತರಪ್ರದೇಶದ ನೋಯ್ಡಾ ವಲಯದಲ್ಲಿ ಅಕ್ರಮವಾಗಿ ನಿರ್ಮಿಸಲಾಗಿರುವ 100 ಮೀಟರ್‌ ಎತ್ತರದ ಸೂಪರ್‌ಟೆಕ್‌ ಅವಳಿ ಟವರ್‌ಗಳನ್ನು ಕೇವಲ 9 ಸೆಕೆಂಡುಗಳಲ್ಲಿ ಧ್ವಂಸಗೊಳಿಸುವುದಾಗಿ ಸುಪ್ರೀಂ ಕೋರ್ಟ್‌ಗೆ ನೋಯ್ಡಾ ಪ್ರಾಧಿಕಾರ ಮಾಹಿತಿ ನೀಡಿದೆ.

ಯುಪಿ ಅಪಾರ್ಟ್‌ಮೆಂಟ್‌ ಕಾಯ್ದೆಯ ನಿಯಮಗಳನ್ನು ಉಲ್ಲಂಘಿಸಿ ಈ ಅವಳಿ ಟವರ್‌ಗಳನ್ನು ನಿರ್ಮಿಸಲಾಗಿತ್ತು ಎಂಬ ಆರೋಪದ ಮೇರೆಗೆ, ಕಟ್ಟಡಗಳನ್ನು ಧ್ವಂಸಗೊಳಿಸುವಂತೆ ಸುಪ್ರೀಂ ಕೋರ್ಟ್‌ 2021ರ ಆ.31ರಂದು ತೀರ್ಪು ನೀಡಿತ್ತು.

ಅದರಂತೆ, ಮೇ 22ರ ಮಧ್ಯಾಹ್ನ 2.30ಕ್ಕೆ ಈ ಪ್ರಕ್ರಿಯೆ ನಡೆಯಲಿದೆ. ಕಟ್ಟಡ ನೆಲಸಮ ಪ್ರಕ್ರಿಯೆಯ ವೆಚ್ಚವನ್ನು ಸೂಪರ್‌ಟೆಕ್‌ ಕಂಪನಿಯೇ ಭರಿಸಲಿದೆ.

ಇದನ್ನೂ ಓದಿ:ಆಧುನಿಕತೆ ಬಳಸಿ ಕಲೆಗೆ ರೂಪ ನೀಡಿದ ಕಲಾಕಾರರು;ಬನಹಟ್ಟಿಯಲ್ಲಿ ವೈವಿದ್ಯಮಯ ಕಾಮಣ್ಣನ ಮೂರ್ತಿಗಳು

ಏನೇನು ಪ್ರಕ್ರಿಯೆ?
ಈ ಟವರ್‌ಗಳ ಸುತ್ತಮುತ್ತ ವಾಸಿಸುವ ಸುಮಾರು 1500 ಕುಟುಂಬಗಳನ್ನು 5 ಗಂಟೆಗಳ ಕಾಲ ಸ್ಥಳಾಂತರಿಸ ಲಾಗುತ್ತದೆ. 1 ಗಂಟೆ ಕಾಲ ನೋಯ್ಡಾ-ಗ್ರೇಟರ್‌ ನೋಯ್ಡಾ ಎಕ್ಸ್‌ಪ್ರೆಸ್‌ವೇಯನ್ನು ಮುಚ್ಚಲಾಗುತ್ತದೆ. ಭಾರೀ ಸಂಖ್ಯೆಯ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗುತ್ತದೆ. ಅವಳಿ ಟವರ್‌ಗಳಿಂದ 9 ಮೀ. ದೂರದಲ್ಲಿರುವ 12 ಅಂತಸ್ತಿನ ಕಟ್ಟಡವನ್ನು ರಕ್ಷಿಸಲು ಉಕ್ಕಿನ ಶಿಪ್ಪಿಂಗ್‌ ಕಂಟೈನರ್‌ಗಳನ್ನು ಇಡಲಾಗುತ್ತದೆ. ಪಕ್ಕದ 4 ಕಟ್ಟಡಗಳ ರಕ್ಷಣೆಗಾಗಿ ಜಿಯೋಟೆಕ್ಸ್‌ಟೈಲ್‌ ಫ್ಯಾಬ್ರಿಕ್‌ನ ಪರದೆ ಹಾಕಲಾಗುತ್ತದೆ. ಧ್ವಂಸಗೊಂಡಾಗ ಏಳುವ ದಟ್ಟ ಧೂಳುಮಿಶ್ರಿತ ಹೊಗೆ ಮಾಯವಾಗಲು ಸುಮಾರು 10 ನಿಮಿಷ ಬೇಕಾಗಬಹುದು ಎಂದು ಅಂದಾಜಿಸಲಾಗಿದೆ.

ಟವರ್‌ಗಳ ಎತ್ತರ – ಮೊದಲ ಟವರ್‌ 103 ಮೀಟರ್‌, ಎರಡನೇ ಟವರ್‌ 97 ಮೀ.
ಒಟ್ಟು ವಿಸ್ತೀರ್ಣ – 7.5 ಲಕ್ಷ ಚದರ ಅಡಿ
ನೆಲಸಮಗೊಳಿಸಲು ಬಳಸಲಾಗುವ ಸ್ಫೋಟಕ – 2500 ಕೆಜಿ
ನೆಲಸಮಕ್ಕೆ ತಗಲುವ ಅವಧಿ – 9 ಸೆಕೆಂಡು