ಮಹಿಳೆಯರೇ ಕಟ್ಟಿದ ಮನೆ!
Team Udayavani, Dec 17, 2018, 6:45 AM IST
ಇಡುಕ್ಕಿ: ಕೇರಳದ ಇಡುಕ್ಕಿಯಲ್ಲಿ 475 ಚದರಡಿ ಮನೆಯೊಂದನ್ನು ಸಂಪೂರ್ಣವಾಗಿ ಮಹಿಳೆಯರೇ ನಿರ್ಮಿಸಿ ಸಾಧನೆ ಮಾಡಿದ್ದಾರೆ. ಅಚ್ಚರಿಯ ಸಂಗತಿಯೆಂದರೆ, ಯಾವ ವಾಸ್ತುಶಿಲ್ಪ ತಜ್ಞರೂ ಇರಲಿಲ್ಲ. ಕೇವಲ 20 ಸಾಮಾನ್ಯ ದಿನಗೂಲಿ ಮಹಿಳೆಯರೇ ಸೇರಿ ಈ ಸಾಧನೆ ಮಾಡಿದ್ದಾರೆ.
ವೆಳ್ಳಿಯ ಮಟ್ಟಂ ಗ್ರಾಮದ ಸುತ್ತಲಿನ ಮಹಿಳೆಯರು ಈ ಮನೆ ನಿರ್ಮಿಸಲು ಎರಡು ತಿಂಗಳು ತೆಗೆದುಕೊಂಡಿದ್ದಾರೆ. ಆರಂಭದಲ್ಲಿ 30 ಮಹಿಳೆಯರು ಕೆಲಸ ಪ್ರಾರಂಭಿಸಿದ್ದರೂ, 10 ಮಹಿಳೆಯರು ಮಧ್ಯದಲ್ಲೇ ಕೈಬಿಟ್ಟರು. ನಿರ್ಮಾಣಶ್ರೀ ಕನ್ಸ್ಟ್ರಕ್ಷನ್ಸ್ ಈ ಮಹಿಳೆಯರಿಗೆ ತರಬೇತಿ ನೀಡಿದ್ದು, ವಿಶಿಷ್ಟ ಸಾಧನೆಗೆ ನೆರವಾಗಿದೆ. ಈ ಯಶಸ್ಸಿನಿಂದಾಗಿ ಅವರು ಇನ್ನೊಂದು ಪ್ರಾಜೆಕ್ಟ್ ಆರಂಭಿಸುವ ಬಗ್ಗೆಯೂ ಮಾತುಕತೆ ನಡೆಸಿದ್ದಾರೆ. ತರಬೇತಿ ಅವಧಿಯಲ್ಲಿ ಇವರು ಪ್ರತಿ ದಿನ 320 ರೂ. ವೇತನ ಪಡೆಯುತ್ತಿದ್ದರು. ಈಗ ಪುರುಷರಿಗೆ ಸಮಾನವಾಗಿ 1 ಸಾವಿರ ರೂ. ಪಡೆಯಲು ಅರ್ಹರಾಗಿದ್ದಾರೆ.