ಫೆಡ್‌ ಕಪ್‌ ಟೆನಿಸ್‌: ಚೀನಾ ವಿರುದ್ಧ ಸೋತ ಭಾರತ

Team Udayavani, Feb 8, 2018, 6:15 AM IST

ನವದೆಹಲಿ: ಅಂಕಿತಾ ರೈನಾ ವೀರೋಚಿತ ಆಟದ ಹೊರತಾಗಿಯೂ ನವದೆಹೆಲಿಯಲ್ಲಿ ನಡೆಯುತ್ತಿರುವ ಏಷ್ಯಾ-ಒಶಿಯಾನಿಯಾ ಗುಂಪು 1 ಫೆಡರೇಷನ್‌ ಕಪ್‌ ಟೆನಿಸ್‌ ಕೂಟದಲ್ಲಿ ಭಾರತ 2-1 ಅಂಕಗಳ ಅಂತರದಿಂದ ಚೀನಾ ವಿರುದ್ಧ ಸೋಲು ಅನುಭವಿಸಿದೆ.

ಭಾರತ ಗುರುವಾರ ನಡೆಯಲಿರುವ ಮಾಡು ಇಲ್ಲವೆ ಮಡಿ ಪಂದ್ಯದಲ್ಲಿ ಕಜಕೀಸ್ಥಾನ ತಂಡವನ್ನು ಎದುರಿಸಲಿದೆ. ಇಲ್ಲಿ ಗೆದ್ದರಷ್ಟೇ ಭಾರತಕ್ಕೆ ಮುಂದಿನ ಅವಕಾಶ ತೆರೆದುಕೊಳ್ಳಲಿದೆ. ಕಜಕ್‌ ಈಗಾಗಲೇ ಹಾಂಕಾಂಗ್‌ ವಿರುದ್ಧ 3-0 ಅಂತರದ ಸೋಲು ಕಂಡಿದೆ. ಮುಂದಿನ ಪಂದ್ಯವನ್ನು ಗೆಲ್ಲಲೇಬೇಕಾದ ಒತ್ತಡದಲ್ಲಿದೆ.

ಅಂಕಿತಾ ತಂದ ಏಕೈಕ ಗೆಲುವು: ವಿಶ್ವ ಮಹಿಳಾ ಶ್ರೇಯಾಂಕದಲ್ಲಿ 253ನೇ ಶ್ರೇಯಾಂಕ ಹೊಂದಿರುವ ಅಂಕಿತಾ ರೈನಾ ತನಗಿಂತ ಅಧಿಕ ಶ್ರೇಯಾಂಕ ಹೊಂದಿರುವ ಲಿನ್‌ ಝು ವಿರುದ್ಧ 6-3, 6-2 ಅಂತರದ ಗೆಲುವು ಸಾಧಿಸಿದ್ದಾರೆ. ಲಿನ್‌ ಝು ವಿಶ್ವ 120ನೇ ಶ್ರೇಯಾಂಕ ಹೊಂದಿದವರು ಎನ್ನುವುದು ವಿಶೇಷ. ಅಂಕಿತಾ ಅದ್ಭುತ ಆಟ ಪ್ರದರ್ಶಿಸಿದರೂ, 19 ವರ್ಷದ ಕರ¾ನ್‌ ಕೌರ್‌ ಥಾಂಡಿ 2-6, 2-6 ಸೆಟ್‌ಗಳ ಅಂತರದಿಂದ ವಿಶ್ವ 25ನೇ ಶ್ರೇಯಾಂಕಿತ ಯಾಫ‌ನ್‌ ವಾಂಗ್‌ ವಿರುದ್ಧ ಸೋಲು ಅನುಭವಿಸಿದರು. ಹೀಗಾಗಿ ಚೀನಾ 1-1 ರಿಂದ ಸಮಸಾಧಿಸಿಕೊಂಡಿತು.

ಮೂರನೇ ಪಂದ್ಯದಲ್ಲಿ ಪ್ರಾರ್ಥನಾ ತೊಂಬ್ರೆ ಜತೆಗೆ ಡಬಲ್ಸ್‌ ಆಟಗಾರ್ತಿಯಾಗಿ ಅಂಕಿತಾ ರೈನಾ ಜತೆಯಾದರು. ಇವರ ಮೇಲೆ ಬಾರೀ ನಿರೀಕ್ಷೆ ಇತ್ತು. ಆದರೆ ವಾಂಗ್‌- ಝೋಕ್ಸುವಾನ್‌ ಯಾಂಗ್‌ ವಿರುದ್ಧ 2-6, 6-7(1) ಸೆಟ್‌ಗಳ ಅಂತರದಿಂದ ಸೋಲುವ ಮೂಲಕ ಭಾರತ ಶರಣಾಗಬೇಕಾಯಿತು. ಹೊಂದಾಣಿಕೆ ಕೊರತೆಯೆ ಅಂತಿಮ ಪಂದ್ಯವನ್ನು ಕಳೆದುಕೊಳ್ಳಲು ಕಾರಣವಾಯಿತು.