ಕೊಹ್ಲಿ ಶತಕ; ಭಾರತಕ್ಕೆ 3ನೇ ಜಯ

Team Udayavani, Feb 8, 2018, 6:00 AM IST

ಕೇಪ್‌ಟೌನ್‌: ನಾಯಕ ವಿರಾಟ್‌ ಕೊಹ್ಲಿ ಅವರ ಅಮೋಘ 34ನೇ ಶತಕ ಸಾಹಸದಿಂದ ಆತಿಥೇಯ ದಕ್ಷಿಣ ಆಫ್ರಿಕಾವನ್ನು 3ನೇ ಪಂದ್ಯದಲ್ಲೂ 124ರನ್‌ಗಳಿಂದ ಬಗ್ಗುಬಡಿದ ಟೀಮ್‌ ಇಂಡಿಯಾ 3-0 ಮುನ್ನಡೆಯೊಂದಿಗೆ ಸರಣಿ ಜಯದತ್ತ ಮುನ್ನುಗ್ಗಿದೆ. ಈ ಐತಿಹಾಸಿಕ ಸಾಧನೆಗೆ ಹಾಗೂ ನಂ.1 ಪಟ್ಟ ಗಟ್ಟಿಗೊಳ್ಳಲು ಭಾರತಕ್ಕೆ ಬೇಕಿರುವುದು ಇನ್ನೊಂದು ಗೆಲುವು ಮಾತ್ರ.

ಬುಧವಾರ ನ್ಯೂಲ್ಯಾಂಡ್ಸ್‌’ನಲ್ಲಿ ನಡೆದ ಮುಖಾಮುಖೀಯಲ್ಲಿ ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಭಾರತ 6 ವಿಕೆಟಿಗೆ 303 ರನ್‌ ಪೇರಿಸಿತು. ಕೊಹ್ಲಿ ಅಜೇಯ 160 ರನ್‌ ಬಾರಿಸಿ ಅನೇಕ ದಾಖಲೆಗಳನ್ನು ತಮ್ಮ ಹೆಸರಿಗೆ ಬರೆಸಿಕೊಂಡರು. ಜವಾಬಿತ್ತ ದಕ್ಷಿಣ ಆಫ್ರಿಕಾ 40 ಓವರ್‌ಗಳಲ್ಲಿ 179 ರನ್ನಿಗೆ ಸರ್ವಪತನ ಕಂಡಿತು.