ಅಭ್ಯಾಸಕ್ಕೂ ಮೊದಲು ಫಿಟ್ನೆಸ್ ಅಗತ್ಯ: ರೋಹಿತ್
Team Udayavani, May 25, 2020, 5:01 AM IST
ಮುಂಬಯಿ: ಕ್ರಿಕೆಟ್ ಅಭ್ಯಾಸ ಆರಂಭಿಸಬೇಕಾದರೆ ಮೊದಲು ಫಿಟ್ ಆಗಬೇಕು ಎಂಬು ದಾಗಿ ರೋಹಿತ್ ಶರ್ಮ ಹೇಳಿದ್ದಾರೆ. ರೋಹಿತ್ ನ್ಯೂಜಿಲ್ಯಾಂಡ್ ಎದುರಿನ ಟಿ20 ಸರಣಿ ವೇಳೆ ಗಾಯಾಳಾಗಿ ಫೆ. 2ರಂದು ಭಾರತಕ್ಕೆ ವಾಪಸಾಗಿದ್ದರು. ಬಳಿಕ ತವರಲ್ಲಿ ದ. ಆಫ್ರಿಕಾ ವಿರುದ್ಧ ನಡೆಯಬೇಕಿದ್ದ 3 ಪಂದ್ಯಗಳ ಏಕದಿನ ಸರಣಿಯಿಂದಲೂ ಹೊರಗುಳಿದಿದ್ದರು. ಈಗ ದೈಹಿಕ ಕ್ಷಮತೆಯನ್ನು ಮರಳಿ ಪಡೆದರೂ ಲಾಕ್ಡೌನ್ ಕಾರಣದಿಂದ ಅವರಿಗಿನ್ನೂ ಫಿಟ್ನೆಸ್ ಟೆಸ್ಟ್ನಲ್ಲಿ ಪಾಲ್ಗೊಳ್ಳಲು ಸಾಧ್ಯವಾಗಿಲ್ಲ.
“ಲಾಕ್ಡೌನ್ಗಿಂತ ಮೊದಲೇ ನಾನು ಆಡಲು ಬಹುತೇಕ ಸಜ್ಜಾ ಗಿದ್ದೆ. ಆದರೆ ಫಿಟ್ನೆಸ್ ಟೆಸ್ಟ್ ನಡೆಸ ಲಾಗಿಲ್ಲ. ಒಮ್ಮೆ ಕೋವಿಡ್-19 ಪರಿಸ್ಥಿತಿ ನಿಯಂತ್ರಣಕ್ಕೆ ಬಂದೊಡನೆ ನೇರವಾಗಿ ಎನ್ಸಿಎಗೆ ತೆರಳಿ ಫಿಟ್ನೆಸ್ ಟೆಸ್ಟ್ ಕೊಡಲಿದ್ದೇನೆ. ಇದರಲ್ಲಿ ತೇರ್ಗಡೆಯಾದೊಡನೆ ನನ್ನ ಕ್ರಿಕೆಟ್ ಚಟುವಟಿಕೆಗಳನ್ನು ಪುನರಾರಂಭಿಸಲಿದ್ದೇನೆ’ ಎಂದು ರೋಹಿತ್ ಹೇಳಿದರು. ಆದರೆ ಮುಂಬಯಿಯಲ್ಲಿ ಕೋವಿಡ್-19 ತೀವ್ರ ಗತಿಯಲ್ಲಿ ಹಬ್ಬುತ್ತಿರುವ ಕಾರಣ ತನ್ನ ಕ್ರಿಕೆಟ್ ಅಭ್ಯಾಸ ವಿಳಂಬಗೊಳ್ಳುವುದು ಖಂಡಿತ ಎಂಬುದು ಅವರ ಲೆಕ್ಕಾಚಾರ.