ವನಿತಾ ಪ್ರೀಮಿಯರ್ ಲೀಗ್: ಮುಂಬೈಗೆ 143 ರನ್ ಬೃಹತ್ ಗೆಲುವು
Team Udayavani, Mar 5, 2023, 7:05 AM IST
ಮುಂಬಯಿ: ಮುಂಬೈ ಇಂಡಿಯನ್ಸ್ ಬೃಹತ್ ಜಯಭೇರಿಯೊಂದಿಗೆ ಪ್ರಥಮ ವನಿತಾ ಪ್ರೀಮಿ ಯರ್ ಲೀಗ್ ಪಂದ್ಯಾವಳಿಗೆ ಚಾಲನೆ ನೀಡಿದೆ.
ಏಕಪಕ್ಷೀಯ ಪಂದ್ಯದಲ್ಲಿ ಅದು ಗುಜರಾತ್ ಜೈಂಟ್ಸ್ಗೆ 143 ರನ್ನುಗಳ ಸೋಲುಣಿಸಿತು.
ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ಮುಂಬೈ ಇಂಡಿಯನ್ಸ್ 5 ವಿಕೆಟಿಗೆ 207 ರನ್ ರಾಶಿ ಹಾಕಿದರೆ, ಗುಜರಾತ್ ಜೈಂಟ್ಸ್ ಶೋಚನೀಯ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿ 15.1 ಓವರ್ಗಳಲ್ಲಿ ಕೇವಲ 64 ರನ್ನಿಗೆ ಆಲೌಟಾಯಿತು. ಸೈಕಾ ಇಸಾಕ್ 11 ರನ್ನಿಗೆ 4 ವಿಕೆಟ್ ಕಿತ್ತು ಗುಜರಾತ್ ತಂಡದ ಕುಸಿತಕ್ಕೆ ಕಾರಣರಾದರು.
ಕೌರ್, ಮ್ಯಾಥ್ಯೂಸ್ ಆಕರ್ಷಣೆ
ಓಪನರ್ ಹ್ಯಾಲಿ ಮ್ಯಾಥ್ಯೂಸ್ ಮತ್ತು ನಾಯಕಿ ಹರ್ಮನ್ಪ್ರೀತ್ ಕೌರ್ ಅವರ ಬಿರುಸಿನ ಆಟ ಮುಂಬೈ ಸರದಿಯ ಆಕರ್ಷಣೆ ಆಗಿತ್ತು.
ಮತ್ತೋರ್ವ ಓಪನರ್ ಯಾಸ್ತಿಕಾ ಭಾಟಿಯಾ (1) ಯಶಸ್ಸು ಕಾಣಲಿಲ್ಲ. ಆದರೆ ಹ್ಯಾಲಿ ಮ್ಯಾಥ್ಯೂಸ್ ಅಬ್ಬರಿಸಿ ದರು. 31 ಎಸೆತಗಳಿಂದ 47 ರನ್ ಹೊಡೆದರು. ಇದು 4 ಸಿಕ್ಸರ್, 3 ಬೌಂಡರಿಗಳನ್ನು ಒಳಗೊಂಡಿತ್ತು. ಕೌರ್ ಕೇವಲ 30 ಎಸೆತಗಳಿಂದ 65 ರನ್ ಚಚ್ಚಿದರು. ಸಿಡಿಸಿದ್ದು 14 ಫೋರ್. ಮೋನಿಕಾ ಪಟೇಲ್ ಅವರ ಒಂದೇ ಓವರ್ನಲ್ಲಿ 5 ಬೌಂಡರಿ ಬಾರಿಸುವ ಮೂಲಕ ಕೌರ್ ಧಾರಾಳ ರಂಜನೆ ಒದಗಿಸಿದರು.
ಅಮೇಲಿಯಾ ಕೆರ್ ಕೂಡ ಆಕರ್ಷಕ ಬ್ಯಾಟಿಂಗ್ ನಡೆಸಿದರು. ಅವರ ಕೊಡುಗೆ ಅಜೇಯ 45 ರನ್ (24 ಎಸೆತ, 6 ಬೌಂಡರಿ, 1 ಸಿಕ್ಸರ್). ಐಸಿ ಲಾಂಗ್ ಪಂದ್ಯದ ಅಂತಿಮ ಎಸೆತವನ್ನು ಸಿಕ್ಸರ್ಗೆ ಬಡಿದಟ್ಟಿದರು.
ಗುಜರಾತ್ನ ಅಗ್ರ ಕ್ರಮಾಂಕದ ಐವರಲ್ಲಿ ಮೂವರು ಖಾತೆಯನ್ನೇ ತೆರೆಯಲಿಲ್ಲ. ಕುಸಿತ ಎಷ್ಟು ತೀವ್ರವಾಗಿತ್ತೆಂದರೆ, 23 ರನ್ ಆಗುವಷ್ಟರಲ್ಲಿ 7 ಮಂದಿ ಪೆವಿಲಿಯನ್ ಸೇರಿ ಆಗಿತ್ತು.
ಮೊದಲಿಗರು…
ಪಂದ್ಯಾವಳಿಯ ಮೊದಲ ಟಾಸ್ ಗೆದ್ದವರು ಗುಜರಾತ್ ಜೈಂಟ್ಸ್ ನಾಯಕಿ ಬೆತ್ ಮೂನಿ. ಮೊದಲ ಓವರ್ ಆ್ಯಶ್ಲಿ ಗಾರ್ಡನರ್ ಎಸೆದರೆ, ಮೊದಲ ಎಸೆತ ಯಾಸ್ತಿಕಾ ಭಾಟಿಯಾ ಎದುರಿಸಿದರು. ಅವರೇ ಮೊದಲ ರನ್ ಹೊಡೆದು ಮೊದಲಿಗರಾಗಿ ಔಟಾದರು. ಕೂಟದ ಈ ಪ್ರಥಮ ವಿಕೆಟ್ ತನುಜಾ ಕನ್ವರ್ ಪಾಲಾಯಿತು. ಮೊದಲ ಸಿಕ್ಸರ್ ಹಾಗೂ ಬೌಂಡರಿ ಹ್ಯಾಲಿ ಮ್ಯಾಥ್ಯೂಸ್ ಬ್ಯಾಟ್ನಿಂದ ಸಿಡಿಯಿತು. ಇದನ್ನು ನೀಡಿದವರು ಮಾನ್ಸಿ ಜೋಶಿ. ಮೊದಲ ಅರ್ಧ ಶತಕ ಕೌರ್ ಅವರಿಂದ ದಾಖಲಾಯಿತು.
ಸಂಕ್ಷಿಪ್ತ ಸ್ಕೋರ್: ಮುಂಬೈ ಇಂಡಿ ಯನ್ಸ್-5 ವಿಕೆಟಿಗೆ 207 (ಕೌರ್ 65, ಮ್ಯಾಥ್ಯೂಸ್ 47, ಕೆರ್ ಔಟಾಗದೆ 45, ಸ್ಕಿವರ್ 23, ಪೂಜಾ 15). ಗುಜರಾತ್ ಜೈಂಟ್ಸ್ 15.1 ಓವರ್ಗಳಲ್ಲಿ 64 ರನ್ನಿಗೆ ಆಲೌಟ್ (ದಯಾಲನ್ ಹೇಮಲತಾ 29, ಸೈಕಾ ಐಶಾಕ್ 11ಕ್ಕೆ 4).
ಟಾಪ್ ನ್ಯೂಸ್
ಈ ವಿಭಾಗದಿಂದ ಇನ್ನಷ್ಟು ಇನ್ನಷ್ಟು ಸುದ್ದಿಗಳು
MUST WATCH
ಹೊಸ ಸೇರ್ಪಡೆ
HD Revanna, ಪ್ರಜ್ವಲ್ ಮೇಲೆ ಲೈಂಗಿಕ ದೌರ್ಜನ್ಯ ಕೇಸ್!
CET ಮೌಲ್ಯಮಾಪನ: 50 ಪಠ್ಯೇತರ ಪ್ರಶ್ನೆಗೆ ಕೊಕ್; ಮರು ಪರೀಕ್ಷೆ ನಡೆಸದಿರಲು ನಿರ್ಧಾರ
Chennai ಅಪಾರ್ಟ್ಮೆಂಟ್ನ ಟಿನ್ ರೂಫ್ನಲ್ಲಿ ಸಿಲುಕಿದ ಮಗುವಿನ ರೋಚಕ ರಕ್ಷಣೆ
Vande Bharat Metro ರೈಲು ಸೇವೆ ಜುಲೈಯಿಂದ ಶುರು? ವಿಶೇಷತೆಗಳೇನು?
Lok Sabha Election 2024; ದಕ್ಷಿಣ ಕನ್ನಡ: ಈಗ “ಮತ ಗಣಿತ’ ಲೆಕ್ಕಾಚಾರ!