ಜಪಾನ್ಗೆ ಆಘಾತವಿಕ್ಕಿದ ಭಾರತ ಫೈನಲಿಗೆ
Team Udayavani, Aug 21, 2019, 5:19 AM IST
ಟೋಕಿಯೊ: ಸ್ಟ್ರೈಕರ್ ಮನ್ದೀಪ್ ಸಿಂಗ್ ಅವರ ಆಕರ್ಷಕ ಹ್ಯಾಟ್ರಿಕ್ ಗೋಲುಗಳ ನೆರವಿನಿಂದ ಭಾರತೀಯ ಪುರುಷರ ಹಾಕಿ ತಂಡವು ಆತಿಥೇಯ ಜಪಾನ್ ತಂಡವನ್ನು 6-3 ಗೋಲುಗಳಿಂದ ಭರ್ಜರಿಯಾಗಿ ಸೋಲಿಸಿ ಒಲಿಂಪಿಕ್ ಟೆಸ್ಟ್ ಹಾಕಿ ಸರಣಿಯ ಫೈನಲ್ ಹಂತಕ್ಕೇರಿದೆ.
ಈ ಗೆಲುವಿನಿಂದ ಭಾರತ ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನಕ್ಕೇರಿತು. ಬುಧವಾರ ನಡೆಯುವ ಫೈನಲ್ ಹೋರಾಟದಲ್ಲಿ ಭಾರತವು ಅಗ್ರಸ್ಥಾನಿ ನ್ಯೂಜಿಲ್ಯಾಂಡ್ ತಂಡವನ್ನು ಎದುರಿಸಲಿದೆ. ಈ ಹಿಂದಿನ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್ ತಂಡಕ್ಕೆ 1-2 ಗೋಲುಗಳಿಂದ ಶರಣಾಗಿದ್ದ ಭಾರತ ಫೈನಲ್ನಲ್ಲಿ ಸೇಡು ತೀರಿಸಿಕೊಳ್ಳಲು ಯೋಚಿಸುತ್ತಿದೆ.
ಆತಿಥೇಯ ಜಪಾನ್ ತಂಡದೆದುರಿನ ಮಹತ್ವದ ಪಂದ್ಯದಲ್ಲಿ ಭಾರತ ವೀರೋಚಿತ ಪ್ರದರ್ಶನ ನೀಡಿ ಮಣಿಸುವಲ್ಲಿ ಯಶಸ್ವಿ ಯಾಯಿತು. ತವರಿನ ಲಾಭ ಪಡೆದ ಜಪಾನ್ ತಂಡವನ್ನು ಉರುಳಿಸಿದ ಭಾರತ ಫೈನಲಿಗೇರಿತು.
ನೀಲಕಂಠ ಶರ್ಮ, ನೀಲಮ್ ಸಂಜೀಪ್ ಕ್ಸೆಸ್ ಮತ್ತು ಗುರ್ಜಾಂತ್ ಸಿಂಗ್ ಗೋಲು ಹೊಡೆದ ಇತರ ಮೂವರು ಆಟಗಾರರು. ಕೆಂಟರೊ ಫಕುಡ, ಕೆಂಟ ತನಕ ಮತ್ತು ಕಜುಮ ಮುರಾಟ ಜಪಾನ್ ಪರ ಗೋಲು ಹೊಡೆದ ಆಟಗಾರರಾಗಿದ್ದಾರೆ.
ನೀಲಕಂಠ ಶುಭಾರಂಭ
ಪಂದ್ಯ ಆರಂಭವಾದ ಮೂರನೇ ನಿಮಿಷದಲ್ಲಿ ನೀಲಕಂಠ ಶರ್ಮ ಫೀಲ್ಡ್ ಗೋಲು ಬಾರಿಸಿ ಶುಭಾರಂಭಗೈದರು. ಈ ಮುನ್ನಡೆಯಿಂದ ಉತ್ಸಾಹಭರಿತಗೊಂಡ ಭಾರತೀಯರು ಜಪಾನ್ ರಕ್ಷಣಾ ಆಟಗಾರರಿಗೆ ಒತ್ತಡ ಹೇರುತ್ತ ಹೋದರು. ಗುರ್ಜಾಂತ್ ಸಿಂಗ್ ಗೋಲು ಹೊಡೆಯುವ ಪ್ರಯತ್ನ ನಡೆಸಿದರೂ ಆದು ಹೊರಗೆ ಹೋಯಿತು.
ಏಳನೇ ನಿಮಿಷದಲ್ಲಿ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಅವಕಾಶ ಲಭಿಸಿತು. ನೀಲಮ್ ಸಂಜೀಪ್ ಅದ್ಭುತ ಹೊಡೆತದ ಮೂಲಕ ಗೋಲಾಗಿ ಪರಿವರ್ತಿಸಿ ಭಾರತಕ್ಕೆ 2-0 ಮುನ್ನಡೆ ದೊರಕಿಸಿಕೊಟ್ಟರು. ಮೊದಲ ಕ್ವಾರ್ಟರ್ನಲ್ಲಿ ಭಾರತ 3-0 ಮುನ್ನಡೆಯಲ್ಲಿತ್ತು.
ದ್ವಿತೀಯ ಕಾರ್ಟರ್ನಲ್ಲೂ ಭಾರತೀಯರು ಪ್ರಾಬಲ್ಯ ಮೆರೆದರು. ಜರ್ಮನ್ಪ್ರೀತ್ ಸಿಂಗ್ ಮತ್ತು ನಾಯಕ ಹರ್ಮನ್ಪ್ರೀತ್ ಸಿಂಗ್ ಗೋಲು ಹೊಡೆಯುವ ಪ್ರಯತ್ನವನ್ನು ಜಪಾನ್ ಗೋಲ್ಕೀಪರ್ ತಕಾಶಿ ಯೊಶಿಕಾವ ಅದ್ಭುತವಾಗಿ ರಕ್ಷಿಸಿದರು.