ಹಾಕಿ: ವನಿತೆಯರಿಗೆ ಕ್ವಾರ್ಟರ್ ಫೈನಲ್ ಅರ್ಹತೆ
Team Udayavani, Aug 1, 2021, 6:20 AM IST
ಟೋಕ್ಯೊ: ಸ್ಟ್ರೈಕರ್ ವಂದನಾ ಕಟಾರಿಯಾ ಅವರ ಹ್ಯಾಟ್ರಿಕ್ ಪರಾಕ್ರಮದಿಂದ ದಕ್ಷಿಣ ಆಫ್ರಿಕಾವನ್ನು ಮಣಿಸಿದ ಭಾರತದ ವನಿತಾ ಹಾಕಿ ತಂಡಕ್ಕೆ ಬ್ರಿಟನ್ ಮೂಲಕ ಕ್ವಾರ್ಟರ್ ಫೈನಲ್ ಕದ ತೆರೆದಿದೆ.
“ಎ’ ವಿಭಾಗದ ಅಂತಿಮ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಗೆಲುವು ಕಾಣಲೇಬೇಕಿದ್ದ ರಾಣಿ ರಾಮ್ಪಾಲ್ ಪಡೆ ಇಲ್ಲಿ 4-3 ಗೋಲುಗಳ ಯಶಸ್ಸು ಸಾಧಿಸಿತು. ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೆ ಏರಿತು.
ಆದರೆ ಭಾರತದ ನಾಕೌಟ್ ಪ್ರವೇಶಕ್ಕೆ ಈ ಜಯ ಸಾಲುತ್ತಿರಲಿಲ್ಲ. ಇದು 5 ಪಂದ್ಯಗಳಲ್ಲಿ ಭಾರತಕ್ಕೆ ಒಲಿದ ಕೇವಲ ಎರಡನೇ ಗೆಲುವಾಗಿತ್ತು. ಹೀಗಾಗಿ ಮತ್ತೂಂದು ಲೀಗ್ ಪಂದ್ಯದಲ್ಲಿ ಐರ್ಲೆಂಡ್ ವಿರುದ್ಧ ಬ್ರಿಟನ್ ವಿಜಯವನ್ನು ಹಾರೈಸಬೇಕಿತ್ತು, ಕನಿಷ್ಠ ಡ್ರಾ ಫಲಿತಾಂಶವಾದರೂ ದಾಖಲಾಗಬೇಕಿತ್ತು. ಆದರೆ ಬ್ರಿಟನ್ 2-0 ಅಂತರದ ಜಯ ದಾಖಲಿಸಿ ಭಾರತದ ಹಾದಿಯನ್ನು ಸುಗಮಗೊಳಿಸಿತು.
ವಂದನಾ ಅಮೋಘ ಸಾಧನೆ: ವಂದನಾ ಕಟಾರಿಯಾ 4, 17 ಹಾಗೂ 49ನೇ ನಿಮಿಷದಲ್ಲಿ ಗೋಲು ಸಿಡಿಸಿ ಹ್ಯಾಟ್ರಿಕ್ ಸಾಧನೆಗೈದರು. ಇದು ಒಲಿಂಪಿಕ್ಸ್ ಇತಿಹಾಸದ ವನಿತಾ ಹಾಕಿಯಲ್ಲಿ ಭಾರತ ದಾಖಲಿಸಿದ ಪ್ರಥಮ ಹ್ಯಾಟ್ರಿಕ್. ಇನ್ನೊಂದು ಗೋಲು ನೇಹಾ ಗೋಯಲ್ ಅವರಿಂದ 32ನೇ ನಿಮಿಷದಲ್ಲಿ ದಾಖಲಾಯಿತು. ದಕ್ಷಿಣ ಆಫ್ರಿಕಾ ಪರ ಟ್ಯಾರಿನ್ ಗ್ಲಾಸಿº (15), ನಾಯಕಿ ಎರಿನ್ ಹಂಟರ್ (30) ಮತ್ತು ಮರಿನ್ ಮರಾಯ್ಸ (39) ಗೋಲು ಹೊಡೆದರು. ಹ್ಯಾಟ್ರಿಕ್ ಸೋಲಿನಿಂದ ಕೂಟದಿಂದಲೇ ನಿರ್ಗಮಿಸುವ ಆತಂಕದಲ್ಲಿದ್ದ ಭಾರತದ ವನಿತೆಯರಿಗೆ ಅದೃಷ್ಟ ಇದೆ ಎಂಬುದು ಸಾಬೀತಾಗಿದೆ. ನಾಕೌಟ್ನಲ್ಲಿ ಇನ್ನಷ್ಟು ಸುಧಾರಿತ ಆಟವಾಡಬೇಕಾದ ಅಗತ್ಯವಿದೆ.
ವನಿತಾ ಹಾಕಿ: ಎ ವಿಭಾಗದ ಅಂಕಪಟ್ಟಿ
ತಂಡ ಪಂದ್ಯ ಜಯ ಸೋಲು ಅಂಕ
ನೆದರ್ಲೆಂಡ್ಸ್ 5 5 0 15
ಜರ್ಮನಿ 5 4 1 12
ಗ್ರೇಟ್ ಬ್ರಿಟನ್ 5 3 2 9
ಭಾರತ 5 2 3 6
ಐರ್ಲೆಂಡ್ 5 1 4 3
ದಕ್ಷಿಣ ಆಫ್ರಿಕಾ 5 0 5 0