ಕೊರಿಯ ಓಪನ್ ಬ್ಯಾಡ್ಮಿಂಟನ್: ಸಿಂಧು, ಶ್ರೀಕಾಂತ್ ಸೆಮಿಫೈನಲಿಗೆ
Team Udayavani, Apr 8, 2022, 11:03 PM IST
ಸಂಚಿಯೋನ್: ಭಾರತದ ಅಗ್ರ ಕ್ರಮಾಂಕದ ಶಟ್ಲರ್ಗಳಾದ ಪಿ.ವಿ. ಸಿಂಧು ಮತ್ತು ಕೆ. ಶ್ರೀಕಾಂತ್ ಸುಲಭ ಗೆಲುವು ಸಾಧಿಸಿ “ಕೊರಿಯ ಓಪನ್ ಸೂಪರ್ 500 ಬ್ಯಾಡ್ಮಿಂಟನ್’ ಕೂಟದ ಸೆಮಿಫೈನಲ್ ಹಂತಕ್ಕೇರಿದರು.
3ನೇ ಶ್ರೇಯಾಂಕದ ಸಿಂಧು ವನಿತೆಯರ ಸಿಂಗಲ್ಸ್ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಥಾಯ್ಲೆಂಡಿನ ಬುಸಾ ನನ್ ಅವರನ್ನು 21-10, 21-16 ಗೇಮ್ಗಳಿಂದ ಸೋಲಿಸಿದರು.
ಸಿಂಧು ಸೆಮಿಫೈನಲ್ ಹೋರಾಟ ದಲ್ಲಿ ದ್ವಿತೀಯ ಶ್ರೇಯಾಂಕದ ಕೊರಿಯದ ಆ್ಯನ್ ಸೆಯಂಗ್ ಅವರನ್ನು ಎದುರಿಸಲಿದ್ದಾರೆ. ಕಳೆದ ವರ್ಷ ಇವರಿಬ್ಬರು ಎರಡು ಬಾರಿ ಮುಖಾಮುಖಿಯಾಗಿದ್ದು, ಸಿಂಧು ಎರಡರಲ್ಲೂ ಸೋತಿದ್ದರು.
ಇದನ್ನೂ ಓದಿ:ಮೋಹನ್ದಾಸ್ ಪೈ ಟ್ವೀಟ್:ಸರ್ಕಾರದ ಯೋಗ್ಯತೆ ಪ್ರಶ್ನಿಸಿದ ಎಚ್ಡಿಕೆ
ಶ್ರೀಕಾಂತ್ಗೆ 3 ಗೇಮ್ ಜಯ
ಕೆ. ಶ್ರೀಕಾಂತ್ 3 ಗೇಮ್ಗಳ ಕಠಿನ ಹೋರಾಟದಲ್ಲಿ ಸ್ಥಳೀಯ ಭರವಸೆ ಸನ್ ವಾನ್ ಹೊ ಅವರನ್ನು ಕೆಡವಿದರು. ಕೊರಿಯದ ಹೊ ಅವರೆದುರು ಶ್ರೀಕಾಂತ್ 4-7ರ ದಾಖಲೆ ಹೊಂದಿದ್ದು, ಕಳೆದ 3 ಮುಖಾಮುಖಿಗಳಲ್ಲಿ ಶ್ರೀಕಾಂತ್ ಸೋತಿದ್ದರು. ಇಲ್ಲಿ ಅಮೋಘ ಪ್ರದರ್ಶನ ನೀಡಿದ ಶ್ರೀಕಾಂತ್ 21-12, 18-21, 21-12 ಗೇಮ್ಗಳಿಂದ ಗೆದ್ದು ಬಂದರು.
ಸೆಮಿಫೈನಲ್ನಲ್ಲಿ ಶ್ರೀಕಾಂತ್ 3ನೇ ಶ್ರೇಯಾಂಕದ ಇಂಡೋನೇಶ್ಯದ ಜೊನಾಥನ್ ಕ್ರಿಸ್ಟೀ ಅವರನ್ನು ಎದುರಿಸಲಿದ್ದಾರೆ. ಕ್ರಿಸ್ಟೀ ಕಳೆದ ತಿಂಗಳು ನಡೆದ ಸ್ವಿಸ್ ಓಪನ್ ಬ್ಯಾಡ್ಮಿಂಟನ್ ಕೂಟದ ಚಾಂಪಿಯನ್ ಎಂಬುದನ್ನು ಮರೆಯುವಂತಿಲ್ಲ.
ಡಬಲ್ಸ್ನಲ್ಲಿ ಭಾರತದ ಸಾತ್ವಿಕ್ ಸಾಯಿರಾಜ್ ರಾಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಸೆಮಿಫೈನಲ್ ತಲುಪಲು ವಿಫಲರಾದರು. ಅವರು 3 ಗೇಮ್ಗಳ ಕಠಿನ ಹೋರಾಟದಲ್ಲಿ ಕೊರಿಯದ ಕಾಂಗ್ ಮಿನ್ಹ್ಯುಕ್-ಸಿಯೊ ಅವ ರಿಗೆ 20-22, 21-18, 20-22 ಗೇಮ್ಗಳಿಂದ ಶರಣಾದರು.