ದನುಷ್ಕ ಗುಣತಿಲಕಗೆ 6 ಪಂದ್ಯಗಳ ನಿಷೇಧ
Team Udayavani, Jul 28, 2018, 6:00 AM IST
ಕೊಲಂಬೊ: ದುರ್ನಡತೆಯ ಹಿನ್ನೆಲೆಯಲ್ಲಿ ಶ್ರೀಲಂಕಾ ಕ್ರಿಕೆಟ್ ತಂಡದ ಆರಂಭಕಾರ ದನುಷ್ಕ ಗುಣತಿಲಕ ಅವರಿಗೆ “ಶ್ರೀಲಂಕಾ ಕ್ರಿಕೆಟ್ ಮಂಡಳಿ’ 6 ಪಂದ್ಯಗಳ ನಿಷೇಧ ವಿಧಿಸಿದೆ. ಇದು ಮುಂದಿನ ಅಂತಾರಾಷ್ಟ್ರೀಯ ಪಂದ್ಯದಿಂದಲೇ ಜಾರಿಗೆ ಬರಲಿದೆ.
ಹೊಟೇಲಿನಲ್ಲಿ ನಾರ್ವೆ ಮಹಿಳೆಯ ಮೇಲೆ ಗುಣತಿಲಕ ಸ್ನೇಹಿತನೊಬ್ಬ ಅತ್ಯಾಚಾರವೆಸಗಿ ಬಂಧನಕ್ಕೊಳಗಾಗಿದ್ದ. ಈ ಸಂದರ್ಭದಲ್ಲಿ ಗುಣತಿಲಕ ಪೊಲೀಸ್ ವಿಚಾರಣೆಗೆ ಒಳಗಾಗಿ ಬಳಿಕ ತಪ್ಪಿತಸ್ಥನಲ್ಲ ಎಂದು ಸಾಬೀತಾಗಿತ್ತು. “ನಮ್ಮ ತನಿಖೆ ಪ್ರಕಾರ ಗುಣತಿಲಕ ಈ ಪ್ರಕರಣದಲ್ಲಿ ಯಾವುದೇ ತಪ್ಪೆಸಗಿಲ್ಲ. ಈ ಘಟನೆಯ ವೇಳೆ ಅವರು ಹೊಟೇಲ್ ಕೊಠಡಿಯಲ್ಲಿ ನಿದ್ದೆ ಮಾಡು ತ್ತಿದ್ದರು. ಆದರೆ ಅವರನ್ನು ಶ್ರೀಲಂಕಾ ಕ್ರಿಕೆಟ್ ಮಂಡಳಿ ವಿಚಾರಣೆಗೆ ಒಳಪಡಿಸಿದರೆ ತಮ್ಮ ಅಭ್ಯಂತರವಿಲ್ಲ’ ಎಂದು ಪೊಲೀಸರು ಹೇಳಿದ್ದರು.
ಕಳೆದ 10 ತಿಂಗಳಲ್ಲಿ ಗುಣತಿಲಕ ವಿರುದ್ಧ ದಾಖಲಾದ 3ನೇ ಅಶಿಸ್ತಿನ ಪ್ರಕರಣ ಇದಾಗಿದೆ. ಇವೆಲ್ಲವನ್ನೂ ಈ ಸಂದರ್ಭದಲ್ಲಿ ಪರಿಗಣಿಸಿ ನಿಷೇಧವನ್ನು ಜಾರಿಗೊಳಿಸಲಾಗಿದೆ ಎಂದು ಲಂಕಾ ಕ್ರಿಕೆಟ್ ಮಂಡಳಿ ತಿಳಿಸಿದೆ.