ಸಯ್ಯದ್‌ ಮುಷ್ತಾಕ್‌ ಅಲಿ ಟಿ20: ಫೈನಲ್‌ ಹಾದಿಯಲ್ಲಿ  ಕರ್ನಾಟ

Team Udayavani, Mar 11, 2019, 4:48 AM IST

ಇಂದೋರ್‌: ಸಯ್ಯದ್‌ ಮುಷ್ತಾಕ್‌ ಅಲಿ ಟಿ20 ಕ್ರಿಕೆಟ್‌ನಲ್ಲಿ ಕರ್ನಾಟಕ ತನ್ನ ಗೆಲುವಿನ ಓಟವನ್ನು ಮುಂದುವರಿಸಿದೆ. ಸೂಪರ್‌ ಲೀಗ್‌ನಲ್ಲಿ 3, ಲೀಗ್‌ನಲ್ಲಿ 7 ಸೇರಿ ಸತತ 10ನೇ ಜಯ ಸಾಧಿಸಿದೆ. ರವಿವಾರ ದಿಲ್ಲಿ ವಿರುದ್ಧ 8 ವಿಕೆಟ್‌ಗಳ ಜಯ ಸಾಧಿಸಿದ ಕರ್ನಾಟಕ, ಬಿ ಗುಂಪಿನಿಂದ ಫೈನಲ್‌ ಸ್ಥಾನವನ್ನು ಬಹುತೇಕ ಖಾತ್ರಿಪಡಿಸಿಕೊಂಡಿದೆ.

ಮೊದಲು ಬ್ಯಾಟಿಂಗ್‌ ಮಾಡಿದ ದಿಲ್ಲಿ 20 ಓವರ್‌ಗಳಲ್ಲಿ 9 ವಿಕೆಟ್‌ ಕಳೆದುಕೊಂಡು 109 ರನ್‌ ಗಳಿಸಿತು. ಇದನ್ನು ಬೆನ್ನತ್ತಿ ಹೊರಟ ಕರ್ನಾಟಕ ಕೇವಲ 15.3 ಓವರ್‌ಗಳಲ್ಲಿ 2 ವಿಕೆಟ್‌ ಕಳೆದುಕೊಂಡು 112 ರನ್‌ ಗಳಿಸಿತು.

ದಿಲ್ಲಿ ಬ್ಯಾಟಿಂಗ್‌ ವೈಫ‌ಲ್ಯ
ದಿಲ್ಲಿ ಬ್ಯಾಟಿಂಗ್‌ನಲ್ಲಿ ಸಂಪೂರ್ಣ ವಿಫ‌ಲವಾಯಿತು. ನಿತೀಶ್‌ ರಾಣಾ 37 ರನ್‌ ಗಳಿಸಿದ್ದೇ ಗರಿಷ್ಠ ವೈಯಕ್ತಿಕ ಮೊತ್ತ. ಲಲಿತ್‌ ಯಾದವ್‌ 33 ರನ್‌ ಮಾಡಿದರು. ಎಡಗೈ ವೇಗಿ ವಿ. ಕೌಶಿಕ್‌ ಸತತ 2 ಪಂದ್ಯಗಳಲ್ಲಿ ಮಿಂಚಿ 4 ವಿಕೆಟ್‌ ಕಿತ್ತರು. ಲೆಗ್‌ಸ್ಪಿನ್ನರ್‌ ಕಾರಿಯಪ್ಪ 3 ವಿಕೆಟ್‌ ಕಬಳಿಸಿದರು.

ಕರ್ನಾಟಕ ತುಂಬು ಆತ್ಮವಿಶ್ವಾಸದಲ್ಲಿ ಬ್ಯಾಟಿಂಗ್‌ ಆರಂಭಿಸಿತು. ಆರಂಭಕಾರ ರೋಹನ್‌ ಕದಂ, ಬಿ.ಆರ್‌. ಶರತ್‌ 37 ರನ್‌ ಆಗಿದ್ದಾಗ ಔಟಾದರು. ಅನಂತರ ಒಟ್ಟುಗೂಡಿದ ಮಾಯಾಂಕ್‌ ಅಗರ್ವಾಲ್‌ ಹಾಗೂ ಕರುಣ್‌ ನಾಯರ್‌ ಅಜೇಯ ಜತೆಯಾಟ ದಾಖಲಿಸಿ ತಂಡವನ್ನು ದಡ ಮುಟ್ಟಿಸಿದರು. ಅಗರ್ವಾಲ್‌ 43 ರನ್‌ ಗಳಿಸಿದರೆ, ಸ್ಫೋಟಕ ಬ್ಯಾಟಿಂಗ್‌ ನಡೆಸಿದ ನಾಯರ್‌ 23 ಎಸೆತಗಳಲ್ಲಿ 42 ರನ್‌ ಬಾರಿಸಿದರು.