ಮದುಮಗ ಸಿಲಿಕ್ ದ್ವಿತೀಯ ಸುತ್ತಿಗೆ
Team Udayavani, May 30, 2018, 6:00 AM IST
ಪ್ಯಾರಿಸ್: ನಾಲ್ಕು ವಾರಗಳ ಹಿಂದೆಯಷ್ಟೇ ಮದುವೆ ಯಾಗಿರುವ 3ನೇ ಶ್ರೇಯಾಂಕದ ಮರಿನ್ ಸಿಲಿಕ್, ಮಾಜಿ ಚಾಂಪಿ ಯನ್ ರಫೆಲ್ ನಡಾಲ್ ಮತ್ತು ಸರ್ಬಿಯಾ ನೊವಾಕ್ ಜೊಕೋವಿಕ್ ಅವರು ತಮ್ಮ ಎದು ರಾಳಿಯೆ ದುರು ವಿಜಯ ಸಾಧಿಸಿ ಫ್ರೆಂಚ್ ಓಪನ್ ಗ್ರ್ಯಾನ್ಸ್ಲಾಮ್ ಕೂಟದ ದ್ವಿತೀಯ ಸುತ್ತಿಗೇರಿದ್ದಾರೆ.
ಮೊದಲ ಸೆಟ್ನಲ್ಲಿ ಸುಲಭ ಗೆಲುವು ಪಡೆದ ಸಿಲಿಕ್ ಮತ್ತೆರಡು ಸೆಟ್ ಗೆಲ್ಲಲು ಶಕ್ತಿಮೀರಿ ಪ್ರಯತ್ನ ನಡೆಸಿದರು. ಅಂತಿಮವಾಗಿ ಅವರು ಆಸ್ಟ್ರೇಲಿಯದ ಜೇಮ್ಸ್ ಡಕ್ವರ್ತ್ ಅವರನ್ನು 6-3, 7-5, 7-6 (7-4) ಸೆಟ್ಗಳಿಂದ ಕೆಡಹಿ ಮುನ್ನಡೆದರು. 2014ರಲ್ಲಿ ಸಿಲಿಕ್ ಯುಎಸ್ ಓಪನ್ನ ಪ್ರಶಸ್ತಿ ಗೆದ್ದಿದ್ದಾರೆ. ಆದರೆ ಮದುವೆ ಆದ ಸಂಭ್ರಮದಲ್ಲಿರುವ ಕಾರಣ ಗ್ರ್ಯಾನ್ ಸ್ಲಾಮ್ ಪ್ರಶಸ್ತಿ ಗೆದ್ದರೆ ಅದರ ಪ್ರಾಮುಖ್ಯ ಬಹಳಷ್ಟು ಎತ್ತರಕ್ಕೆ ಏರಲಿದೆ ಎಂದು ಸಿಲಿಕ್ ಹೇಳಿದ್ದಾರೆ.
29ರ ಹರೆಯದ ಸಿಲಿಕ್ ತನ್ನ ದೀರ್ಘಕಾಲದ ಗೆಳತಿ ಇಂಟಿರಿಯರ್ ಡಿಸೈನರ್ ಆಗಿರುವ ಕ್ರಿಸ್ಟಿನಾ ಮಿಲೋವಿಕ್ ಅವರನ್ನು ಡುಬ್ರೋವ್ನಿಕ್ನಲ್ಲಿ ನಾಲ್ಕು ವಾರಗಳ ಹಿಂದೆ ಮದುವೆಯಾಗಿದ್ದರು. ಕುಟುಂಬ ಮತ್ತು ಸ್ನೇಹಿತರ ಜತೆ ನಾವು ಆನಂದದ ಸಮಯ ಕಳೆದಿದ್ದೇವೆ. ಕ್ರಿಸ್ಟಿನಾ ಮತ್ತು ನಾನು ದೀರ್ಘ ಸಮಯದಿಂದ ಜತೆಗಿದ್ದೇವೆ ಎಂದು ಸಿಲಿಕ್ ತಿಳಿಸಿದರು.
ವಿಂಬಲ್ಡನ್ ಮತ್ತು ಆಸ್ಟ್ರೇಲಿಯನ್ ಓಪನ್ನಲ್ಲಿ ರನ್ನರ್ ಅಪ್ ಸ್ಥಾನ ಪಡೆದಿದ್ದ ಸಿಲಿಕ್ ದ್ವಿತೀಯ ಸುತ್ತಿನಲ್ಲಿ ಪೋಲ್ಯಾಂಡಿನ ಅರ್ಹತಾ ಆಟಗಾರ ಹ್ಯುಬರ್ಟ್ ಹರ್ಕಾಜ್ ಅವರನ್ನು ಎದುರಿಸಲಿದ್ದಾರೆ. ಕಳೆದ ವರ್ಷ ಇಲ್ಲಿ ಕ್ವಾರ್ಟರ್ಫೈನಲ್ ತಲುಪಿದ್ದ ಸಿಲಿಕ್ ಡಕ್ವರ್ತ್ ವಿರುದ್ಧದ ಪಂದ್ಯದಲ್ಲಿ 13 ಏಸ್ ಸಿಡಿಸಿದರಲ್ಲದೇ 47 ವಿಜಯಿ ಹೊಡೆತ ದಾಖಲಿಸಿದ್ದರು.
ನಡಾಲ್ ಜಯಭೇರಿ
ಮಳೆಯಿಂದ ಮಂಗಳವಾರಕ್ಕೆ ಮುಂದೂಡಿದ ಪಂದ್ಯದಲ್ಲಿ ವಿಶ್ವದ ನಂಬರ್ ವನ್ ಸ್ಪೇನ್ನ ರಫೆಲ್ ನಡಾಲ್ ಅವರು ಕೊನೆಗೂ ಗೆಲುವಿನ ನಗೆ ಚೆಲ್ಲಿದ್ದಾರೆ. ಸೋಮವಾರ ಸಂಜೆ ಮಳೆಯಿಂದ ಆಟ ನಿಂತಾಗ ನಡಾಲ್ ಅವರು ಇಟಲಿಯ ಸಿಮೋನ್ ಬೊಲೇಲಿ ವಿರುದ್ಧ 6-4, 6-3, 0-3 ಸೆಟ್ಗಳಿಂದ ಮುನ್ನಡೆಯಲ್ಲಿದ್ದರು. ಮೂರನೇ ಸೆಟ್ನಲ್ಲಿ ನಡಾಲ್ ಮಳೆ ವಿರಾಮದ ಬಳಿಕ ಭರ್ಜರಿಯಾಗಿ ಆಡಿ 7-6 (11-9) ಅಂತರದಿಂದ ಗೆದ್ದು ಜಯಭೇರಿ ಬಾರಿಸಿದರು.
ಜೊಕೋವಿಕ್ಗೆ ಸುಲಭ ಜಯ
12 ಬಾರಿಯ ಗ್ರ್ಯಾನ್ ಸ್ಲಾಮ್ ವಿಜೇತ ಜೊಕೋವಿಕ್ ಅವರು ರೊಜಾರಿಯೊ ದುತ್ರ ಸಿಲ್ವ ಅವರನ್ನು 6-3, 6-4, 6-4 ಸೆಟ್ಗಳಿಂದ ಪರಾಭವಗೊಳಿಸಿದರು. ಗೆಲುವಿನೊಂದಿಗೆ ಈ ವರ್ಷ ಆರಂಭ ಮಾಡಿರುವುದು ಒಳ್ಳೆಯದಾಗಿದೆ. ಅವರು ಬಹಳಷ್ಟು ಸ್ಪಿನ್ ಮಾಡುತ್ತ ಆಡಿದರು ಎಂದು ಜೊಕೋವಿಕ್ ತಿಳಿಸಿದರು. ಅವರು ಮುಂದಿನ ಸುತ್ತಿನಲ್ಲಿ ಜಾಮಿ ಮುನಾರ್ ಅವರನ್ನು ಎದುರಿಸಲಿದ್ದಾರೆ.
ಶಪೋವಲೋವ್ಗೆ ಗೆಲುವು
ಕೆನಡದ ಹದಿಹರೆಯದ ಡೆನಿಸ್ ಶಪೋವಲೋವ್ ಅವರು ಆಸ್ಟ್ರೇಲಿಯದ ಜಾನ್ ಮಿಲ್ಮನ್ ಅವರನ್ನು ಸುಲಭವಾಗಿ ಮಣಿಸಿ ದ್ವಿತೀಯ ಸುತ್ತು ತಲುಪಿದರು. ಫ್ರೆಂಚ್ ಓಪನ್ನ ಮುಖ್ಯ ಡ್ರಾದಲ್ಲಿ ಮೊದಲ ಬಾರಿ ಆಡಿದ ಮಿಲ್ಮನ್ ಅವರನ್ನು ಶಪೋವಲೋವ್ 7-5, 6-4, 6-2 ಸೆಟ್ಗಳಿಂದ ಉರುಳಿಸಿದರು. ಮುಂದಿನ ಸುತ್ತಿನಲ್ಲಿ ಅವರು ಜರ್ಮನಿಯ ಮ್ಯಾಕ್ಸಿ ಮಿಲಿಯನ್ ಮಾರ್ಟೆರರ್ ಅವರನ್ನು ಎದುರಿಸಲಿದ್ದಾರೆ. ಈ ಅಂಗಣದಲ್ಲಿ ಕಳೆದ ಕೆಲವು ವಾರಗಳಲ್ಲಿ ನಂಬಲಸಾಧ್ಯ ರೀತಿಯಲ್ಲಿ ಟೆನಿಸ್ ಆಟ ಆಡುತ್ತಿದ್ದೇನೆ ಎಂದು ಶಪೋವಲೋವ್ ಹೇಳಿದ್ದಾರೆ. ಗ್ರ್ಯಾನ್ ಸ್ಲಾಮ್ ಕೂಟದಲ್ಲಿ ಅವರಿಗೆ ಇದೇ ಮೊದಲ ಬಾರಿ ಶ್ರೇಯಾಂಕ ನೀಡಲಾಗಿದೆ.