ಹೀಗೂ ಉಂಟೇ! ಸೈಕಲ್ ಡಿಕ್ಕಿ ಹೊಡೆದು ಕಾರಿನ ಮುಂಭಾಗವೇ ಜಖಂ

Team Udayavani, Jan 4, 2019, 12:49 PM IST

ಬೀಜಿಂಗ್: ಈ ವೈರಲ್ ಚಿತ್ರವನ್ನು ಕಂಡ ಪ್ರತಿಯೊಬ್ಬರು ಅಚ್ಚರಿಯಿಂದ ಕೇಳುತ್ತಿದ್ದ ಪ್ರಶ್ನೆ ಒಂದೇ..ಅಬ್ಬಾ ಅದೆಂತಹ ಸೈಕಲ್ ಅನ್ನು ತಯಾರಿಸಿಬಿಟ್ಟಿದ್ದಾರೆ ಎಂದು! ಯಾಕೆಂದರೆ ಕಾರು ಮತ್ತು ಸೈಕಲ್ ನಡುವೆ ನಡೆದ ಡಿಕ್ಕಿಯಲ್ಲಿ ಕಾರಿನ ಮುಂಭಾಗವೇ ಗುದ್ದಿ ಹೋಗಿರುವುದು!

ಹೌದು ಕಾರು ಮತ್ತು ಸೈಕಲ್ ಹೊಡೆದರೆ ಸೈಕಲ್ ಪುಡಿ, ಪುಡಿಯಾಗೋದು ಸಾಮಾನ್ಯ ಸಂಗತಿ. ಆದರೆ ಸೈಕಲ್ ಡಿಕ್ಕಿ ಹೊಡೆದು ಕಾರಿನ ಮುಂಭಾಗದ ಬಂಪರ್ ನಜ್ಜುಗುಜ್ಜಾಗಿದ್ದರೆ, ಸೈಕಲ್ ಗೆ ಯಾವುದೇ ಹಾನಿಯಾಗದಿರುವ ಚಿತ್ರ ಚೀನಾದ ಸಾಮಾಜಿಕ ಜಾಲತಾಣ, ವೆಬ್ ಸೈಟ್ ನಲ್ಲಿ ಭಾರೀ ವೈರಲ್ ಆಗಿಬಿಟ್ಟಿದೆ.

ಈ ಚಿತ್ರ ವೈರಲ್ ಆದ ಬಳಿಕ ಫೇಸ್ ಬುಕ್ ನಲ್ಲಿ ಜೋಕ್ಸ್ ಹರಿದಾಡತೊಡಗಿದೆ..ಓಹ್ ಇದೀಗ ನೋಕಿಯಾ ಬೈಕ್ಸ್ ಅನ್ನು ತಯಾರಿಸುತ್ತದೆಯೇ? ಎಂಬುದಾಗಿ..ನನಗೆ ಈ ಬೈಕ್ ಬೇಕು ಎಂದು ಮತ್ತೊಬ್ಬರು ವ್ಯಂಗ್ಯವಾಡಿದ್ದಾರೆ. ಬಹುತೇಕರು ಇದು ನಕಲಿ ಚಿತ್ರ ಎಂದು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ ಶುರುವಾಗಿತ್ತು. ಆದರೆ ಸ್ಥಳೀಯ ಪೊಲೀಸರು ಘಟನೆ ನಡೆದ ಸ್ಥಳದ ವಿಡಿಯೋ ರಿಲೀಸ್ ಮಾಡುವ ಮೂಲಕ ನಿಜವಾದ ಘಟನೆ ಎಂದು ಸ್ಪಷ್ಟಪಡಿಸಿದ್ದಾರಂತೆ!