ಚೀನಾ ಸ್ಪೈ ಡ್ರೋನ್ ಪರೀಕ್ಷೆ
Team Udayavani, Nov 1, 2017, 6:00 AM IST
ಬೀಜಿಂಗ್: ಚೀನಾ ತನ್ನ ಮಿಲಿಟರಿ ಗುಪ್ತಚರ ಕಾರ್ಯಾಚರಣೆಗೆ ಉಪಯೋಗವಾಗುವಂತ ಸ್ಪೈ ಡ್ರೋನ್ ಒಂದನ್ನು ಸಮುದ್ರ ಮಟ್ಟದಿಂದ 20 ಕಿಲೋ ಮೀಟರ್ ಎತ್ತರದಲ್ಲಿ ಯಶಸ್ವಿಯಾಗಿ ಪರೀಕ್ಷೆಗೊಳಪಡಿಸಿದೆ. ಬೇಹುಗಾರಿಕೆಗೆ ಸಂಬಂಧಿಸಿ ಹದ್ದಿನ ಕಣ್ಣಿಡುವ ಹಿನ್ನೆಲೆಯಲ್ಲಿ ಚೀನಾ ಇಂಥ ಪ್ರಯತ್ನ ಮಾಡಿದೆ.
ಸಮುದ್ರ ಮಟ್ಟದಿಂದ 20 ಕಿಲೋ ಮೀಟರ್ ಎತ್ತರದ ಪ್ರದೇಶದಲ್ಲಿ ಅತೀ ಕಡಿಮೆ ಉಷ್ಣತೆ ಹಾಗೂ ತೆಳುವಾದ ಗಾಳಿ ಇರುವ ಹಿನ್ನೆಲೆಯಲ್ಲಿ ಇದನ್ನು “ಸಾವಿನ ವಲಯ’ ಎಂದೇ ಪರಿಗಣಿಸಲಾಗುತ್ತದೆ. ಇದೀಗ ಚೀನಾ ಇಂಥ ವಲಯದಲ್ಲಿ ಸ್ಪೈ ಡ್ರೋನ್ ಪರೀಕ್ಷೆಗೊಳಪಡಿಸುವ ಮೂಲಕ ಸಂಚಲನ ಮೂಡಿಸುವಂತೆ ಮಾಡಿದೆ. ಚೀನಾ ಮಾಧ್ಯಮಗಳ ಪ್ರಕಾರ ಚೀನಾ ತನ್ನ ಮಿಲಿಟರಿ ಗುಪ್ತಚರ ಉದ್ದೇಶಕ್ಕಾಗಿಯೇ ಇದನ್ನು ಪರೀಕ್ಷೆಗೊಳಪಡಿಸಿದೆ.
ಉಷ್ಣತೆ ಕಡಿಮೆ ಇರುವ ಪ್ರದೇಶದಲ್ಲಿ ಬ್ಯಾಟರಿಯಂತಹ ಎಲೆಕ್ಟ್ರಾನಿಕ್ ಉಪಕರಣ ಗಳು ಸ್ಪಂದಿಸುವ ಸಾಧ್ಯತೆಗಳೂ ಕಡಿಮೆ ಇರುವ ಹಿನ್ನೆಲೆಯಲ್ಲಿ ಇದಕ್ಕೆ ಪೂರಕವಾಗಿ ಸ್ಪಂದಿಸುವ ಮಾದರಿಯ ಡ್ರೋನ್ ಅಭಿವೃದ್ಧಿಪಡಿಸಿ ಪರೀಕ್ಷಿಸಿದ್ದಾಗಿ ಹಾಂಕಾಂಗ್ ಮೂಲದ ದಕ್ಷಿಣ ಚೀನಾ ಮಾರ್ನಿಂಗ್ ಪೋಸ್ಟ್ ವರದಿ ಮಾಡಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಬೀಜಿಂಗ್ನ ಚೀನಾ ಅಕಾಡೆಮಿ ಆಫ್ ಸೈನ್ಸಸ್ನ ವಿಜ್ಞಾನಿ ಯಾಂಗ್ ಯಾಂಚು, “ಡ್ರೋನ್ ಬುಲೆಟ್ ಚಿಮ್ಮುವ ರೀತಿ ತೆರೆದುಕೊಂಡಿದೆ. ಇಂಥ ನೂರಾರು ಡ್ರೋನ್ಗಳನ್ನು ಅಭಿವೃದ್ಧಿ ಗೊಳಿ ಸುವ ಉದ್ದೇಶವನ್ನು ನಾವು ಹೊಂದಿದ್ದೇವೆ. ಅದು ನಮ್ಮ ಗುರಿ’ ಎಂದಿ ದ್ದಾರೆ. ಕಳೆದ ತಿಂಗಳಷ್ಟೇ ಮಂಗೋಲಿಯಾ ಅಧ್ಯಯನ ಉದ್ದೇಶದಿಂದ 25 ಕಿ. ಮೀ. ಎತ್ತರದಲ್ಲಿ ಡ್ರೋನ್ ಅನ್ನು ಪರೀಕ್ಷೆಗೊಳಪಡಿಸಿತ್ತು.