ಉಗ್ರ ಹಫೀಜ್ನ ತೆಹ್ರೀಕ್ ಸಂಘಟನೆಗೆ ಪಾಕ್ ನಿಷೇಧ
Team Udayavani, Jul 2, 2017, 3:45 AM IST
ಇಸ್ಲಾಮಾಬಾದ್: ಉಗ್ರರನ್ನು ಪೋಷಿಸಿ, ಬೆಳೆಸುತ್ತಿರುವ ಪಾಕಿಸ್ಥಾನವು ಶನಿವಾರ ಉಗ್ರ ಹಫೀಜ್ ಸಯೀದ್ನ ಜಮಾತ್-ಉದ್-ದಾವಾ ಸಂಘಟನೆಯ ಅಂಗಸಂಸ್ಥೆಯಾದ ತೆಹ್ರೀಕ್-ಇ-ಆಜಾದಿ ಜಮ್ಮು ಆ್ಯಂಡ್ ಕಾಶ್ಮೀರ್ಗೆ ನಿಷೇಧ ಹೇರಿದೆ. ಉಗ್ರ ಸಂಘಟನೆಗಳು ಹಾಗೂ ಹಣಕಾಸು ನೆರವು ನೀಡುವವರ ವಿರುದ್ಧ ಕ್ರಮ ಕೈಗೊಳ್ಳಲು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತೀವ್ರ ಒತ್ತಡ ಬಂದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಉಗ್ರ ಸಯೀದ್ನನ್ನು ಲಾಹೋರ್ನಲ್ಲಿ 90 ದಿನಗಳ ಕಾಲ ಗೃಹಬಂಧನದಲ್ಲಿ ಇರಿಸಿದ ಬೆನ್ನಲ್ಲೇ ಅಂದರೆ ಫೆಬ್ರವರಿ 5ರಂದು ಈ ಸಂಘಟನೆಯು ಪಾಕಿಸ್ಥಾನದಾದ್ಯಂತ ಬ್ಯಾನರ್ಗಳನ್ನು ಹಿಡಿದು ರ್ಯಾಲಿಗಳನ್ನು ನಡೆಸಿತ್ತು. ಇದಕ್ಕೂ ಕೆಲ ದಿನಗಳ ಮೊದಲು ಸಯೀದ್, ತಾನು ತೆಹ್ರೀಕ್-ಇ-ಆಜಾದಿ ಎಂಬ ಹೊಸ ಸಂಘಟನೆಯನ್ನು ಹುಟ್ಟುಹಾಕುವುದಾಗಿ ಘೋಷಿಸಿದ್ದ.
ಪಾಕಿಸ್ಥಾನದಲ್ಲಿ ಸದ್ಯ ಜೈಶ್, ಅಲ್ಖೈದಾ, ತೆಹ್ರೀಕ್-ಇ-ತಾಲಿಬಾನ್, ಜೆಯುಡಿಯ ಸಶಸ್ತ್ರ ಘಟಕ ಲಷ್ಕರ್ಸೇರಿದಂತೆ 64 ಉಗ್ರ ಸಂಘಟನೆಗಳನ್ನು “ಬಹಿಷ್ಕೃತ ಪಟ್ಟಿ’ಗೆ ಸೇರಿಸಲಾಗಿದೆ. ಇತ್ತೀಚೆಗಷ್ಟೇ ನಡೆದ ಶಾಂಘೈ ಸಹಕಾರ ಶೃಂಗದಲ್ಲಿ ಮಾತನಾಡಿದ್ದ ಭಾರತವು, ಉಗ್ರರಿಗೆ ನೆರವು ನೀಡುವವರ ವಿರುದ್ಧ ಕಠಿಣ ಕ್ರಮಕ್ಕೆ ಆಗ್ರಹಿಸಿತ್ತು.