ಚೀನಾಕ್ಕೆ ಕ್ಯಾರೇ ಅನ್ನದ ತೈವಾನ್!
-ತೈವಾನ್ ಸನಿಹ 30 ಯುದ್ಧವಿಮಾನ ನಿಯೋಜಿಸಿದ ಚೀನಾ, ಯುದ್ಧಸದೃಶ
Team Udayavani, Jul 23, 2023, 7:12 AM IST
ತೈಪೈ: ಚೀನಾದ ಸಂಭಾವ್ಯ ಆಕ್ರಮಣ ಎದುರಿಸಲು ದ್ವೀಪ ರಾಷ್ಟ್ರ ತೈವಾನ್ ಸಮರಾಭ್ಯಾಸಕ್ಕೆ ಸಜ್ಜುಗೊಳ್ಳುತ್ತಿರುವ ನಡುವೆಯೇ, ಇತ್ತ ಡ್ರ್ಯಾಗನ್ ರಾಷ್ಟ್ರ ತನ್ನ ಹಿಡಿತ ಬಿಗಿಮಾಡಲು ಮುಂದಾಗಿದೆ. ಬಾಂಬರ್ಗಳು ಸೇರಿದಂತೆ 30ಕ್ಕೂ ಹೆಚ್ಚು ಪ್ರಬಲ ಯುದ್ಧವಿಮಾನಗಳನ್ನು ತೈವಾನ್ ಬಳಿ ನಿಯೋಜಿಸಿದೆ ಎಂದು ತೈವಾನ್ ರಕ್ಷಣಾ ಸಚಿವಾಲಯ ಶನಿವಾರ ತಿಳಿಸಿದೆ.
ವರದಿಗಳ ಪ್ರಕಾರ, ತೈವಾನ್ ನಾಗರಿಕರಿಗೆ ಪ್ರಕೃತಿ ವಿಕೋಪಗಳ ಸಂದರ್ಭದಲ್ಲಿ ಸ್ಥಳಾಂತರಗೊಳ್ಳುವುದರ ಬಗ್ಗೆ ಹಾಗೂ ಅಪಾಯಗಳನ್ನು ಎದುರಿಸುವ ಕುರಿತು ವಾರ್ಷಿಕವಾಗಿ ತರಬೇತಿ ನೀಡಲಾಗುತ್ತದೆ. ಇದೇ ವೇಳೆ ರಕ್ಷಣಾ ಪಡೆಗಳು ಕೂಡ ರಾಷ್ಟ್ರದ ಮೇಲಿನ ಆಕ್ರಮಣ ಹಿಮ್ಮೆಟ್ಟಸುವುದಕ್ಕೆ ಸಂಬಂಧಿಸಿದ ಸಮರಾಭ್ಯಾಸವನ್ನು ನಡೆಸುತ್ತವೆ. ಈ ವರ್ಷದ ಈ ತರಬೇತಿಗೆ ಇನ್ನೊಂದು ವಾರ ಬಾಕಿ ಇದ್ದು, ಈ ಸಂಬಂಧಿಸಿದ ಸಿದ್ಧತೆಗಳಲ್ಲಿ ಆಡಳಿತ ಸಜ್ಜುಗೊಂಡಿತ್ತು.
ಇದೇ ಸಂದರ್ಭದಲ್ಲಿ ಚೀನಾದ ಪೀಪಲ್ ಲಿಬರೇಷನ್ ಆರ್ಮಿಯು ಶುಕ್ರವಾರ ಬೆಳಗ್ಗೆ 6 ಗಂಟೆಯಿಂದ ಶನಿವಾರ ಬೆಳಗ್ಗೆ 6 ಗಂಟೆವರೆಗೆ 37 ಯುದ್ಧವಿಮಾನಗಳನ್ನು ಚೀನಾದ ವಾಯುಗಡಿಯಲ್ಲಿ ನಿಯೋಜಿಸಿದೆ. ಇವುಗಳ ಪೈಕಿ ಜೆ-10,ಜೆ-16 ಫೈಟರ್ಜೆಟ್ಗಳು ಹಾಗೂ ಎಚ್-6 ಬಾಂಬರ್ಗಳು ಮತ್ತು 22 ಯುದ್ಧವಿಮಾನಗಳೂ ಸೇರಿವೆ. ಇಷ್ಟೇ ಅಲ್ಲದೇ, ಸಾಗರದ ಮೂಲಕವೂ ತೈವಾನ್ ಸುತ್ತುವರಿಯಲು ಯೋಜಿಸಿರುವ ಚೀನಾ ತನ್ನ ನೌಕಾಪಡೆಯ 7 ಯುದ್ಧ ನೌಕೆಗಳನ್ನು ತೈವಾನ್ ಬಳಿ ನಿಯೋಜಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇತ್ತೀಚೆಗಷ್ಟೇ ಅಮೆರಿಕದ ಜತೆಗಿನ ತೈವಾನ್ ನಂಟಿನ ಬಗ್ಗೆ ಕಿಡಿಕಾರಿದ್ದ ಚೀನಾ, ಆಗಲೂ ತನ್ನ ದರ್ಪ ತೋರಿಸಿತ್ತು.