ಜೆರುಸಲೇಂ: ಸಂಭ್ರಮಕ್ಕೆ ಟ್ರಂಪ್‌ ಪೆಟ್ಟು!

Team Udayavani, Dec 26, 2017, 6:45 AM IST

ಬೆಥ್ಲೆಹೆಮ್‌/ಜೆರುಸಲೇಂ: ಜೆರುಸಲೇಂ ಅನ್ನು ಇಸ್ರೇಲ್‌ನ ರಾಜಧಾನಿಯನ್ನಾಗಿ ಮಾಡುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ನಿರ್ಧಾರವು ಅಲ್ಲಿನ ನಾಗರಿಕರು ಸೇರಿ ಸಾವಿರಾರು ಪ್ರವಾಸಿಗರು ಕ್ರಿಸ್‌ಮಸ್‌ ಸಂಭ್ರಮದಿಂದಲೇ ದೂರ ಉಳಿಯುವಂತೆ ಮಾಡಿದೆ. ಪ್ರತಿವರ್ಷ ಕಂಡುಬರುತ್ತಿದ್ದ ಸಂಭ್ರಮಾಚರಣೆ ಯೆಹೂದಿಗಳ ನಾಡಲ್ಲಿ ಕಂಡುಬರಲೇ ಇಲ್ಲ ಎಂದು ಮಾಧ್ಯಮಗಳು ವರದಿ ಮಾಡಿವೆ.

ಸಾಮಾನ್ಯವಾಗಿ ಕ್ರಿಸ್‌ಮಸ್‌ ದಿನವನ್ನು ಸ್ವಾಗತಿಸಲು ಸಹಸ್ರಾರು ಮಂದಿ ಇಲ್ಲಿನ ಮ್ಯಾಂಗರ್‌ಸ್ಕ್ವೇರ್‌ ಪ್ರದೇಶದಲ್ಲಿ ಸೇರುತ್ತಿದ್ದರು. ಆದರೆ ಈ ವರ್ಷ ಆ ಸಂಭ್ರಮ ಕಂಡು ಬರಲೇ ಇಲ್ಲ. ಪರಿಣಾಮ ಇಲ್ಲಿನ ವ್ಯಾಪಾರದ ಮೇಲೂ ಆಗಿದೆ. ಅಷ್ಟೇ ಅಲ್ಲ, ವ್ಯಾಪಾರದಲ್ಲಿ ಭಾರೀ ಇಳಿಮುಖವಾಗಿದೆ ಎನ್ನುವ ಅಭಿಪ್ರಾಯವನ್ನು ವ್ಯಾಪಾರಸ್ಥರು ವ್ಯಕ್ತಪಡಿಸಿದ್ದಾರೆ. ಅಷ್ಟೇ ಅಲ್ಲ, ಈ ಬೆಳವಣಿಗೆಯಿಂದ ಸಾಕಷ್ಟು ಅಸಮಾಧಾನ ಗೊಂಡಿರುವ ಮಂದಿ ಟ್ರಂಪ್‌ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇನ್ನೊಂದೆಡೆ, ಇಸ್ರೇಲ್‌ ಪ್ರಧಾನಿ ಬೆಂಜ ಮಿನ್‌ ನೆತನ್ಯಾಹು ಅವರು ಸೋಮವಾರ ಟ್ವಿಟರ್‌ನಲ್ಲಿ “ಮೆರ್ರಿ ಕ್ರಿಸ್‌ಮಸ್‌ ಫ‌Åಮ್‌ ಜೆರುಸಲೇಂ, ದ ಕ್ಯಾಪಿಟಲ್‌ ಆಫ್ ಇಸ್ರೇಲ್‌’ ಅರ್ಥಾತ್‌ “ಇಸ್ರೇಲ್‌ ರಾಜಧಾನಿ, ಜೆರು ಸಲೇಂನಿಂದ ಕ್ರಿಸ್‌ಮಸ್‌ ಶುಭಾಶಯಗಳು’  ಎಂದು ಪೋಸ್ಟ್‌ ಮಾಡಿದ್ದಾರೆ. ಇದಾದ ಬೆನ್ನಲ್ಲೇ, ಗ್ವಾಟೆಮಾಲಾ ಕೂಡ ತನ್ನ ರಾಯಭಾರ ಕಚೇರಿಯನ್ನು ಜೆರುಸಲೇಂಗೆ ಸ್ಥಳಾಂತರಿಸಿದೆ.