“ವಂದೇ ಭಾರತ್’ನಲ್ಲಿ ವಿಶೇಷ ಆಸನ ವ್ಯವಸ್ಥೆ; 180 ಡಿಗ್ರಿ ರೊಟೇಶನ್ ಮಾದರಿಯ ಆಸನಗಳು
ಸೆಪ್ಟಂಬರ್ನಿಂದ ಆರಂಭವಾಗಿ ವರ್ಷದೊಳಗೆ ಆಸನ ಯೋಜನೆ ಪೂರ್ಣ
Team Udayavani, Aug 1, 2022, 7:10 AM IST
ನವದೆಹಲಿ: ರೈಲ್ವೆ ಇಲಾಖೆಯ “ವಂದೇ ಭಾರತ್’ ಎಕ್ಸ್ಪ್ರೆಸ್ ರೈಲುಗಳಿಗಾಗಿ ವಿಶೇಷ ಆಸನ ವ್ಯವಸ್ಥೆಯನ್ನು ರೂಪಿಸುವ ಹೊಣೆಗಾರಿಕೆಯನ್ನು ಹೊತ್ತಿರುವ ಪ್ರತಿಷ್ಠಿತ ಟಾಟಾ ಗ್ರೂಪ್ ಸಂಸ್ಥೆ, ದೇಶದಲ್ಲೇ ಇದೇ ಮೊದಲ ಬಾರಿಗೆ ರೈಲುಗಳಲ್ಲಿ ವಿಮಾನಗಳಲ್ಲಿರುವಂಥ ಆರಾಮದಾಯಕವಾದ, ವಿಶೇಷ ಸೌಕರ್ಯಗಳುಳ್ಳ ಆಸನಗಳನ್ನು ನೀಡಲು ನಿರ್ಧರಿಸಿದೆ.
ಹಾಗಾಗಿ, ಇಂಥ ವಿಶೇಷ ಆಸನಗಳನ್ನು ವಿನ್ಯಾಸಗೊಳಿಸಲು ತನ್ನ ಸಂಶೋಧನೆ ಮತ್ತು ಅಭಿವೃದ್ಧಿ ವಿಭಾಗದಲ್ಲಿ ಟಾಟಾ ಸಂಸ್ಥೆ 3 ಸಾವಿರ ಕೋಟಿ ರೂ. ಹೂಡಿಕೆ ಮಾಡಲು ನಿರ್ಧರಿಸಿದೆ.
“ವಂದೇ ಭಾರತ್’ನ 22 ರೈಲುಗಳಿಗೆ ಆಸನ ವ್ಯವಸ್ಥೆಯನ್ನು ಕಲ್ಪಿಸಬೇಕಿದೆ. ಒಂದು ರೈಲಿನಲ್ಲಿ 16 ಕೋಚ್ಗಳಿರುತ್ತವೆ. ಈ ಹದಿನಾರು ಕೋಚ್ಗಳಲ್ಲಿ ಒಟ್ಟು 1,040 ಸೀಟುಗಳಿರುತ್ತವೆ.
ವಿಶೇಷತೆಯೇನು?
ಇವು 180 ಡಿಗ್ರಿ ರೊಟೇಶನ್ ಮಾದರಿಯ ಆಸನಗಳಾಗಿದ್ದು, ವಿಮಾನಗಳಲ್ಲಿರುವಂಥ ಆರಾಮದಾಯಕವಾಗಿರುತ್ತವೆ. ಇದೇ ವರ್ಷ ಸೆಪ್ಟಂಬರ್ನಿಂದ ಹೊಸ ಆಸನ ವ್ಯವಸ್ಥೆಯ ಕೆಲಸಗಳು ಆರಂಭವಾಗಲಿದ್ದು ಒಂದು ವರ್ಷದೊಳಗೆ ಎಲ್ಲಾ ವಂದೇ ಭಾರತ್ ರೈಲುಗಳಲ್ಲಿ ಹೊಸ ಆಸನಗಳನ್ನು ಅಳವಡಿಸುವ ಗುರಿಯನ್ನು ಟಾಟಾ ಕಂಪನಿ ಹೊಂದಿದೆ.