ಈತನ ದೇಹದಲ್ಲಿ ಗುಂಡುಸೂಜಿಗಳದ್ದೇ ರಾಜ್ಯಭಾರ!
Team Udayavani, May 20, 2017, 4:32 AM IST
ಹೆಸರು ಬದ್ರಿಲಾಲ್ ಮೀನಾ. ವಯಸ್ಸು 56. ರಾಜಸ್ಥಾನದ ರೈಲ್ವೆ ನೌಕರ. ಇವರ ದೇಹದಲ್ಲಿ ಗುಂಡುಸೂಜಿಗಳದ್ದೇ ರಾಜ್ಯಭಾರ! ಅಚ್ಚರಿಯಾದರೂ ಇದು ಸತ್ಯ. ಬದ್ರಿಲಾಲ್ರ ಕುತ್ತಿಗೆ, ಹಣೆ, ಕಾಲುಗಳ ಚರ್ಮದಾಳದಲ್ಲಿ ಗುಂಡುಸೂಜಿಗಳು ಆರಾಮ ವಾಗಿ ಅತ್ತಿತ್ತ ಚಲಿಸುತ್ತಿವೆ. ಇದನ್ನು ಕಂಡು ವೈದ್ಯರೇ ತಲೆ ಚಚ್ಚಿಕೊಂಡಿದ್ದಾರೆ. ಈ ಪಿನ್ನುಗಳು ಹೇಗೆ ಒಳಗೆ ಹೋದವು ಎಂಬುದು ಯಾರಿಗೂ ಗೊತ್ತಿಲ್ಲ, ಸುಳಿವೂ ಸಿಗುತ್ತಿಲ್ಲ. ಒಟ್ಟಿನಲ್ಲಿ 75ಕ್ಕೂ ಹೆಚ್ಚು ಗುಂಡುಸೂಜಿಗಳು ಬದ್ರಿಲಾಲ್ ದೇಹದ ತುಂಬಾ ಆವರಿಸಿಬಿಟ್ಟಿದೆ. ಅದನ್ನು ತೆಗೆಯಲೂ ಆಗುತ್ತಿಲ್ಲ. ಬದ್ರಿಲಾಲ್ ಯಾರಿಗೂ ಗೊತ್ತಾಗದಂತೆ ಸೂಜಿಗಳನ್ನು ನುಂಗಿರಬಹುದೇ ಎಂದು ಯಾರದ್ರೂ ಪ್ರಶ್ನಿಸಿದರೆ, ಅದಕ್ಕೆ ವೈದ್ಯರು “ಇಲ್ಲ’ ಎನ್ನುತ್ತಾರೆ. ಯಾಕೆಂದರೆ, ಆತನೇ ನುಂಗಿದ್ದರೆ, ಹೊಟ್ಟೆ, ಕರುಳಿನಲ್ಲಿ ಸೂಜಿಗಳು ಇರುತ್ತಿದ್ದವು. ಆದರೆ, ಇಲ್ಲೆಲ್ಲೂ ಅವು ಕಾಣುತ್ತಿಲ್ಲ. ಹಾಗಾಗಿ, ಇದೊಂದು ಪವಾಡವೇ ಸರಿ ಎನ್ನುತ್ತಾರೆ ವೈದ್ಯರು.