ಕಛೇರಿಗೆ ಮೂರು ನಿಮಿಷ ತಡವಾಗಿದ್ದಕ್ಕೆ ವೇತನ ಕಡಿತ

Team Udayavani, Jun 22, 2018, 4:05 AM IST

ಜಪಾನ್‌ನ ಉದ್ಯೋಗ ಸಂಸ್ಕೃತಿಯನ್ನು ಕೊಂಡಾಡದ ದೇಶವೇ ಇಲ್ಲ. ಆದರೆ ಜಪಾನ್‌ನ ಅತಿ ಶಿಸ್ತಿನ ಉದ್ಯೋಗ ಸಂಸ್ಕೃತಿಯಿಂದ ಅಲ್ಲಿಯ ನಾಗರಿಕರು ಪಡುವ ಪಾಡು ಅಷ್ಟಿಷ್ಟಲ್ಲ. ಜಪಾನ್‌ನ ಕೊಬೊ ನಗರದ ಅಧಿಕಾರಿಯೊಬ್ಬರಿಗೆ ಅಲ್ಲಿಯ ಆಡಳಿತ ವಾಗ್ಧಂಡನೆ ಮಾಡಿ, ಅರ್ಧ ದಿನದ ವೇತನ ಕಡಿತ ಮಾಡಿದೆ.

ಕೆಲಸದ ಅವಧಿ ವೇಳೆ ಅವರು ಪದೇ ಪದೆ ಹೊರಗೆ ಹೋಗುತ್ತಿದ್ದರೆಂದು ಅವರಿಗೆ ಈ ಶಿಕ್ಷೆ. ಆದರೆ ಅವರು ಹೊರಗೆ ಹೋದ ಅವಧಿ 3 ನಿಮಿಷ ಮಾತ್ರ. ನಗರದ ಜಲನಿರ್ವಹಣೆ ವಿಭಾಗದ ಅಧಿಕಾರಿ ಈ ಶಿಕ್ಷೆಗೆ ಗುರಿಯಾಗಿರುವುದು. ಇವರು ಊಟದ ಬಿಡುವಿನಲ್ಲಿ ಊಟ ತೆಗೆದುಕೊಂಡು ಬರಲು ಹೋದಾಗ 3 ನಿಮಿಷ ತಡವಾಗುತ್ತಿತ್ತಂತೆ. ಈ ರೀತಿ ತಡವಾಗಿರುವುದು 7 ತಿಂಗಳಲ್ಲಿ 26 ಬಾರಿ.ಇದಕ್ಕೆ ಆಡಳಿತ ಸುದ್ದಿಗೋಷ್ಠಿ ಕರೆದು.

ವ್ಯಕ್ತಿಯಿಂದ ಕರ್ತವ್ಯಕ್ಕಾದ ಚ್ಯುತಿಯ ಬಗ್ಗೆ ಹೇಳಿದೆ. ಮತ್ತು ಅವರನ್ನು ಸಾರ್ವಜನಿಕವಾಗಿ ಕ್ಷಮೆ ಕೇಳುವಂತೆ ಮಾಡಿದೆ.ಜಪಾನ್‌ ಜಾಲತಾಣಿಗರು ಈ ಘಟನೆಯನ್ನು ಇನ್ನಿಲ್ಲದಂತೆ ವ್ಯಂಗ್ಯ ಮಾಡುತ್ತಿದ್ದಾರೆ. ಉದ್ಯೋಗದ ಅವಧಿಯಲ್ಲಿ ಊಟ, ಶೌಚ ಕೂಡ ಮಾಡಬಾರದೇ ಎಂದು ಕೇಳುತ್ತಿದ್ದಾರೆ.